V2V Technology | ଗାଡ଼ି ନିଜେ ଚିହ୍ନିବ ବିପଦ ! ଆସୁଛି ଏମିତି ଟେକ୍ନୋଲୋଜି, ଦୁର୍ଘଟଣା ପୂର୍ବରୁ ଦେବ ସତର୍କ ସଙ୍କେତ

ବ୍ୟୁରୋ ୨୮/୦୭ : ଭାବନ୍ତୁ… ଆପଣ ଗାଡ଼ି ଚଳାଉଛନ୍ତି, ହଠାତ୍ ଏକ ମୋଡ଼ ଆସିଲା। ସାମ୍ନାରୁ ଆସୁଥିବା ଗାଡ଼ି ଆପଣଙ୍କ ଆଖିକୁ ଦେଖାଯାଉନି। କିନ୍ତୁ ଆପଣଙ୍କ ଗାଡ଼ି ନିଜେ ସତର୍କ କରିଦେଲା “ସାବଧାନ, ସାମ୍ନାରେ ବିପଦ !” କିମ୍ବା ଆବଶ୍ୟକ ପଡ଼ିଲେ ନିଜେ ବ୍ରେକ୍ ଲଗାଇଦେଲା। ଶୁଣିବାକୁ ସିନେମା ଭଳି ଲାଗୁଥିଲେ ମଧ୍ୟ ଖୁବଶୀଘ୍ର ଏହା ଭାରତୀୟ ରାସ୍ତାରେ ବାସ୍ତବତା ହେବାକୁ ଯାଉଛି।

କାରଣ ଏବେ ଆସୁଛି ଭାରତର ସ୍ମାର୍ଟ ଗାଡ଼ି ସୁରକ୍ଷା ଯୁଗ ! ସଡ଼କ ଦୁର୍ଘଟଣା କମାଇବା ପାଇଁ ସରକାର ଗାଡ଼ିଗୁଡ଼ିକୁ ପରସ୍ପର ସହ ଯୋଡ଼ିବାକୁ ପ୍ରସ୍ତୁତ ହେଉଛନ୍ତି । ଖୁବଶୀଘ୍ର ଭାରତୀୟ ଗାଡ଼ିରେ ଲାଗିପାରେ V2V (Vehicle-to-Vehicle) କମ୍ୟୁନିକେସନ୍ ଟେକ୍ନୋଲୋଜି।

ଏହି ଟେକ୍ନୋଲୋଜି ଆସିଲେ ଗାଡ଼ିମାନେ କେବଳ ଚାଲିବେ ନୁହେଁ, ପରସ୍ପର ସହ କଥା ମଧ୍ୟ କହିବେ। ସେମାନେ ନିଜର ସ୍ଥାନ, ଗତି, ବ୍ରେକିଂ ସ୍ଥିତି ଭଳି ତଥ୍ୟ ଆଦାନ-ପ୍ରଦାନ କରିବେ। ଫଳରେ ଅନେକ ଦୁର୍ଘଟଣା ପୂର୍ବରୁ ହିଁ ରୋକାଯାଇପାରିବ।

ସରକାର Central Motor Vehicle Rules, ୧୯୮୯ ରେ ନୂଆ ନିୟମ ଯୋଡ଼ିବାକୁ ପ୍ରସ୍ତୁତ ହୋଇଛନ୍ତି । ଏହା ଦୁଇଚକିଆ, ତିନିଚକିଆ, କାର, ବସ୍ ଓ ଟ୍ରକ୍ ସମେତ ବିଭିନ୍ନ ଯାନ ପାଇଁ ଲାଗୁ ହେବ। AIS-230 ମାନଦଣ୍ଡ ଅନୁସାରେ V2V ସିଷ୍ଟମ୍ ଲାଗୁ କରିବା ଯୋଜନା ରହିଛି ।

୧ ଅକ୍ଟୋବର, ୨୦୨୭ ଠାରୁ, V2V ସିଷ୍ଟମ୍ ସହିତ ସଜ୍ଜିତ ଯେକୌଣସି ଯାନକୁ AIS-230 ମାନଦଣ୍ଡ ପାଳନ କରିବାକୁ ପଡିବ। ୧ ଅକ୍ଟୋବର ୨୦୨୮ ଠାରୁ ଦେଶରେ ବିକ୍ରି ହେଉଥିବା ସମସ୍ତ ନୂତନ ଯାନଗୁଡ଼ିକରେ AIS-230 ମାନଦଣ୍ଡ ସହିତ V2V ସିଷ୍ଟମ୍ ଲାଗୁ କରିବାକୁ ପଡିବ।

V2V ପ୍ରଯୁକ୍ତିବିଦ୍ୟା କ’ଣ ?

V2V, କିମ୍ବା ଯାନ-ଯାନ ଯୋଗାଯୋଗ, ଏକ ତାରହୀନ ପ୍ରଯୁକ୍ତିବିଦ୍ୟା ଯାହା ଯାନଗୁଡ଼ିକୁ ସେମାନଙ୍କର ସ୍ଥାନ, ଗତି ଏବଂ ବ୍ରେକିଂ ସ୍ଥିତି ଭଳି ବାସ୍ତବ-ସମୟ ସୂଚନା ପଠାଇବାକୁ ଅନୁମତି ଦିଏ। ଯାନରେ ଥିବା ସ୍ୱତନ୍ତ୍ର ସେନ୍ସର ଏବଂ ଉତ୍ସର୍ଗୀକୃତ କ୍ଷୁଦ୍ର-ପରିସର ଯୋଗାଯୋଗ (DSRC) ଡିଭାଇସଗୁଡ଼ିକ ନିକଟବର୍ତ୍ତୀ ଅନ୍ୟ ଯାନଗୁଡ଼ିକୁ ସିଗନାଲ ପଠାଇଥାଏ, ଯାହା ସେମାନଙ୍କୁ ପରସ୍ପର ସହିତ ଯୋଗାଯୋଗ କରିବାକୁ ଅନୁମତି ଦିଏ। ଏହି ପ୍ରଯୁକ୍ତିର ଅନେକ ଲାଭ ଅଛି ଏବଂ ଏହା ସଡ଼କ ଦୁର୍ଘଟଣାକୁ ରୋକିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରେ। ଭାରତ ସଡ଼କ ଦୁର୍ଘଟଣାକୁ ୫୦% ହ୍ରାସ କରିବାକୁ ଲକ୍ଷ୍ୟ ରଖିଛି, ତେଣୁ V2V ପ୍ରଯୁକ୍ତିବିଦ୍ୟା ଗ୍ରହଣ କରୁଛି।

V2V ର କ’ଣ ଲାଭ ?

୩୬୦ ଡିଗ୍ରୀ ସୁରକ୍ଷା:ଏହି ସିଷ୍ଟମ ଘନ କୁହୁଡ଼ି କିମ୍ବା ଅନ୍ଧାର ସ୍ଥାନଗୁଡ଼ିକରେ ଲୁଚି ରହିଥିବା ବିପଦକୁ ଚିହ୍ନଟ କରିବ।

ସ୍ୱୟଂଚାଳିତ ବ୍ରେକ୍ ଏବଂ ସତର୍କତା:ସାମ୍ନା ଗାଡ଼ିଟି ହଠାତ୍ ବ୍ରେକ୍ ଲଗାଇବା ମାତ୍ରେ ଆପଣଙ୍କ ଗାଡ଼ି ଏକ ସିଗନାଲ ପାଇବ, ଯାହା ଫଳରେ ପଛ ପାର୍ଶ୍ୱ ଧକ୍କାର ସମ୍ଭାବନା ଦୂର ହୋଇଯିବ।

ଟ୍ରାଫିକ ଜାମରୁ ଦେବ ମୁକ୍ତି:ଯାନଗୁଡ଼ିକ ପରସ୍ପର ସହିତ ଟ୍ରାଫିକ୍ ତଥ୍ୟ ସେୟାର କରିବେ, ଯାହା ଦ୍ଵାରା ଆପଣ ଜାମରେ ଫସିବା ପୂର୍ବରୁ ଆପଣଙ୍କର ରୁଟ୍ ପରିବର୍ତ୍ତନ କରିପାରିବେ।

ଏହି ଡ୍ରାଫ୍ଟ ନିୟମ ଉପରେ ସରକାର ଜନସାଧାରଣଙ୍କଠାରୁ ପରାମର୍ଶ ଏବଂ ଆପତ୍ତି ପାଇବା ପାଇଁ ଲୋଡ଼ିଛନ୍ତି। ଆପଣ ୩୦ଦିନ ମଧ୍ୟରେ ମନ୍ତ୍ରଣାଳୟକୁ ଆପଣଙ୍କର ମତାମତ ଦାଖଲ କରିପାରିବେ। ଆପଣ ଆପଣଙ୍କର ମତାମତ comments-morth@gov.in ରେ ଇମେଲ୍ କରିପାରିବେ କିମ୍ବା ଅତିରିକ୍ତ ସଚିବ (MVL), ସଡ଼କ ପରିବହନ ଏବଂ ରାଜପଥ ମନ୍ତ୍ରଣାଳୟ, ପରିବହନ ଭବନ, ସଂସଦ ମାର୍ଗ, ନୂଆଦିଲ୍ଲୀ-110001 କୁ ମେଲ୍ କରିପାରିବେ।

ସୌଜନ୍ୟ ପ୍ରମେୟ