IPL Betting Case: ବ୍ରହ୍ମପୁରକୁ ଲମ୍ବିଛି ଆଇପିଏଲ୍ ବେଟିଂ ଚେର, ପଶ୍ଚିମବଙ୍ଗରୁ ଅପରେଟ୍ କରୁଛି ନମସ୍ତେ ଗ୍ରୁପ୍ର ମାଷ୍ଟମାଇଣ୍ଡ୍, ପୁଲିସ ସ୍କାନ୍ରେ ଲିଙ୍କ୍ରେ ଥିବା ବୁକି
ବ୍ରହ୍ମପୁର, ୩୦/୦୭: ଆଇପିଏଲ୍ ବେଟିଂ ଚେର ବ୍ରହ୍ମପୁର ସାରା ମାଡିଛି । ସହରର ସବୁ ଥାନା ଅଞ୍ଚଳରେ ଅଛନ୍ତି ଆଇପିଏଲ୍ ବୁକି । ବୈଦ୍ୟନାଥପୁର ଥାନା ପୁଲିସ ଏପ୍ରିଲ୍ ୩୦ ତାରିଖରେ କରିଥିବା ଏକ ଆଇପିଏଲ୍ ବେଟିଂମାମଲାର ତଦନ୍ତ ସମୟରେ ଆଉ ଜଣଙ୍କ ଲିଙ୍କ୍ ପଦାକୁ ଆସିଛି । ଲାଞ୍ଜିପଲ୍ଲୀ ଗାଈଗୋଠ ପଡ଼ିଆ ଅଞ୍ଚଳର ମନୋଜ ବେହେରାଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିବା ପ୍ରେସ୍ ବିବୃତିରେ ସୂଚନା ଦେଇଛନ୍ତି ବ୍ରହ୍ମପୁର ଏସ୍ପି ଡା.ସରବଣା ବିବେକ ଏମ୍ । ଅଭିଯୁକ୍ତ ଠାରୁ ଦୁଇଟି ମୋବାଇଲ୍ ଫୋନ୍ ଜବତ କରାଯାଇଛି । ଅଭିଯୁକ୍ତ ନାମରେ ଥିବା ବ୍ୟାଙ୍କ୍ ଆକାଉଣ୍ଟ ଯାଞ୍ଚ କରୁଥିବାବେଳେ ତାହା ଫ୍ରିଜ୍ କରିବାକୁ ବ୍ୟାଙ୍କ୍କୁ ଚିଠି କରାଯିବ ବୋଲି ପୁଲିସ ପ୍ରକାଶ କରିଛି ।
ଏହି ମାମଲାରେ ପୂର୍ବରୁ ଗୋସାଇଁନୂଆଗାଁ ନେହରୁ ନଗରର ଶୁଭମ ପ୍ରଧାନ(୨୧)ଙ୍କୁ ଗିରଫ କରିଥିଲା ପୁଲିସ । ଅଭିଯୁକ୍ତ ଠାରୁ ଦୁଇଟି ଦାମୀ ମୋବାଇଲ୍ ଫୋନ୍ ଜବତ ହୋଇଥିଲା । ଗୋଟିଏ ବ୍ୟାଙ୍କ ଆକାଉଣ୍ଟରେ ୭.୩୭ଲକ୍ଷ ଟଙ୍କା ବେଟିଂ ପାଇଁ ସେ ରଖିଥିବା ବେଳେ ଆଉ ଗୋଟିଏ ଆକାଉଣ୍ଟରେ ବେଟ୍ ଲଗାଇଥିବା ୭୦ଜଣଙ୍କ ୧୨.୮୬ଲକ୍ଷ ଟଙ୍କା ଥିବା ଜଣାପଡିଥିଲା । ଦୁଇଟି ବ୍ୟାଙ୍କ୍ ଆକାଉଣ୍ଟରେ ଥିବା ୨୦.୨୩ଲକ୍ଷ ଟଙ୍କା ଫ୍ରିଜ୍ ହୋଇଥିବାବେଳେ ଜବତ ମୋବାଇଲ୍ର ତଥ୍ୟ ଯାଞ୍ଚ୍ ପାଇଁ ଫରେନ୍ସିକ୍ ଲାବ୍ ପଠାଯାଇଥିଲା । ଶୁଭମ୍ ସହ ମନୋଜ ବେହେରାଙ୍କ ଲିଙ୍କ୍ ଥିବା ଜଣାପଡିବା ପରେ ପୁଲିସ ତାଙ୍କୁ କୋର୍ଟ ଚାଲାଣ କରିଛି । ଏହି ର୍ୟାକେଟ୍ରେ ଆହୁରି ବହୁ ବୁକିଙ୍କ ଲିଙ୍କ୍ ଥିବା ପୁଲିସ ତଦନ୍ତରେ ଜଣାପଡିଛି । ସେମାନଙ୍କ ଉପରେ ପୁଲିସ ନଜର ରଖିଛି ।
ସୌଜନ୍ୟ ପ୍ରମେୟ
