Chameli Ojha FIR: ୮ ଦିନ ପରେ ଅନାସ୍ଥା ଭୋଟ୍, ଜୀବନ ପ୍ରତି ବିପଦ ଥିବା ଦର୍ଶାଇ ଏତଲା ଦେଲେ ଚାମେଲି
କେନ୍ଦ୍ରାପଡ଼ା,୦୪/୦୮: ମହାକାଳପଡ଼ା ବ୍ଲକ୍ ତିଖିରିର ଚର୍ଚ୍ଚିତ ସରପଞ୍ଚ ଚାମେଲି ଓଝା, ତାଙ୍କ ସହ ପୂରା ପରିବାର ଲୋକଙ୍କ ଜୀବନ ପ୍ରତି ବିପଦ ଥିବା ଦର୍ଶାଇ ଆଜି ମାର୍ଶାଘାଇ ଥାନାରେ ଏତଲା ଦେଇଛନ୍ତି । ମହାକାଳପଡା ବିଧାୟକ ଡ. ଦୁର୍ଗା ପ୍ରସନ୍ନ ନାୟକ ଓ ତାଙ୍କ ସମର୍ଥକ କୁହାଯାଉଥିବା ଗ୍ୟାଙ୍ଗଷ୍ଟର୍ ସାଜନ୍ ବେହେରା ଓ ତା’ର ସହଯୋଗୀମାନଙ୍କ ଆଡୁ ସେ ବିପଦ ଆଶଙ୍କା କରୁଥିବା ଏତଲାରେ ଦର୍ଶାଇଛନ୍ତି । ଏଥିପାଇଁ ପୁଲିସର ହସ୍ତକ୍ଷେପ ଲୋଡ଼ିଛନ୍ତି ଚାମେଲି । ଚଳିତ ଅଗଷ୍ଟ ମାସ ୧୩ ତାରିଖରେ ପଞ୍ଚାୟତ କାର୍ଯ୍ୟାଳୟରେ ଚାମେଲିଙ୍କ ବିରୋଧରେ ଅନାସ୍ଥା ଭୋଟ କରିବାକୁ ପ୍ରଶାସନ ଧାର୍ଯ୍ୟ କରିଛି ।
ଏତଲାରେ ଚାମେଲି ଦର୍ଶାଇଛନ୍ତି ଯେ, ତାଙ୍କୁ ଦେଢ଼ ମାସ ଆଗରୁ ବିନା କାରଣରେ ଗିରଫ କରାଯାଇଥିଲା । ଜାତୀୟ ମାନବାଧିକାର କମିସନ (ଏନ୍ଏଚ୍ଆର୍ସି) ଏହି ମାମଲାର ତଦନ୍ତ କରୁଛନ୍ତି । ସେ ଦୁର୍ନୀତି ବିରୋଧରେ ୯ ଦିନ ଆମରଣ ଅନଶନରେ ବସିଥିଲେ ଯାହା ବିଧାୟକ ଓ ତାଙ୍କ ସମର୍ଥକମାନଙ୍କୁ କ୍ଷୁବ୍ଧ କରିଥିଲା । ସେ ଅନଶନ ସାରି ଜୁଲାଇ ୨୩ରେ ଗାଁକୁ ଫେରିଥିଲାବେଳେ ବିଧାୟକ, ତାଙ୍କ ସମର୍ଥକ ଓ ଅପରାଧିକ ପୃଷ୍ଠଭୂମି ଥିବା କିଛି ବ୍ୟକ୍ତି ତାଙ୍କୁ ଧମକ ଦେବା ଢଙ୍ଗରେ ତାଙ୍କ ଘର ଚାରିପାଖରେ ବାଇକ୍ରେ ବୁଲିଥିଲେ । ବାହରିଆ ମଲିକ, ସୁଶାନ୍ତ ମଲିକ, ବିଜୟ ବେହେରା ଓ ଗ୍ୟାଙ୍ଗଷ୍ଟର ସାଜନ ବେହେରା ତାଙ୍କ ଘର ଚାରିପାଖରେ ପଇଁତରା ମାରିଥିଲେ ।
ସୌଜନ୍ୟ ପ୍ରମେୟ
