Delhi High Alert: ଆଜି ସିଜେପିର ଜନ୍ତରମନ୍ତର ଆନ୍ଦୋଳନ, ଇଣ୍ଟରନେଟ ସେବା ଓ ମେଟ୍ରୋ ଷ୍ଟେସନ ବନ୍ଦ; ୩୮ ହଜାର ଯବାନ ମୁତୟନ
ନୂଆଦିଲ୍ଲୀ ୧୦/୧୦: ଆଜି ଭୋଟର ତାଲିକାର ସ୍ୱତନ୍ତ୍ର ସଘନ ସଂଶୋଧନ (ଏସ୍ଆଇଆର) ରଦ୍ଦ ସହ ମୁଖ୍ୟ ନିର୍ବାଚନ କମିଶନର (ସିଇସି) ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ନୂଆଦିଲ୍ଲୀରେ କକ୍ରୋଚ ଜନତା ପାଟି ର୍ (ସିଜେପି) ଆନ୍ଦୋଳନ କରିବ । ଏଥିରେ କିଛି ରାଜନୈତିକ ଦଳ, ଛାତ୍ର ସଙ୍ଗଠନ ଓ ନାଗରିକ ସମାଜ ସାମିଲ ହେବାର ସମ୍ଭାବନା ରହିଛି । କିନ୍ତୁ ଆନ୍ଦୋଳନ ପାଇଁ ପୁଲିସ ଅନୁମତି ଦେଇନାହିଁ । ଏଥିସହ ଜନ୍ତରମନ୍ତର ଓ ଆଖପାଖ ଅଞ୍ଚଳରେ କଟକଣା ଲଗାଯାଇଛି । ହେଲେ ସିଜେପି ଏହି ଆନ୍ଦୋଳନ ନିଶ୍ଚିତ ହେବ ବୋଲି କହିବା ସହ ଏଥିରେ ବହୁସଂଖ୍ୟାରେ କକ୍ରୋଚ ସାମିଲ ହେବାକୁ ଅନୁରୋଧ କରିଛି ।
ସୋସିଆଲ ମିଡିଆ ଏକ୍ସରେ ସିଜେପି ମୁଖ୍ୟ ଅଭିଜିତ ଦିପ୍କେ କହିଛନ୍ତି, ଜନ୍ତରମନ୍ତର ଠାରେ ଆନ୍ଦୋଳନ ଲାଗି ଗତ ୭ ତାରିଖରେ ପୁଲିସକୁ ଲିଖିତ ଅନୁରୋଧ କରାଯାଇଥିଲା। କିନ୍ତୁ ପୁଲିସ ଅନୁମତି ଦେବାକୁ ମନା କରିଦେଇଛି । ଆନ୍ଦୋଳନ ନିଶ୍ଚିତ ହେବ ଏବଂ ଜନ୍ତରମନ୍ତର ଠାରେ ହିଁ ହେବ । ସମ୍ବିଧାନର ଧାରା ୧୯ ଆମକୁ ଆନ୍ଦୋଳନ କରିବା ଲାଗି ମୌଳିକ ଅଧିକାର ଦେଇଛି । ତେଣୁ ଆଉ ଅନୁମତି ନେବାର ଆବଶ୍ୟକତା ନାହିଁ । ନିର୍ବାଚନ କମିଶନଙ୍କୁ ଟାର୍ଗେଟ କରି ସେ କହିଛନ୍ତି ଯେ ଭୋଟର ତାଲିକାରୁ ୧୩ କୋଟି ଲୋକଙ୍କ ନାଁ କାଟିବା ଲାଗି କ’ଣ ପୂର୍ବରୁ ଅନୁମତି ନିଆଯାଇଥିଲା । ନିର୍ବାଚନରେ ଅନିୟମିତତା କରୁଥିବା ବ୍ୟକ୍ତିଙ୍କ ବିରୋଧରେ ଆମେ ଆନ୍ଦୋଳନ ନକରିବା କଣ ଆପଣମାନେ ଚାହାନ୍ତି । ଏଭଳି ଆଦୌ ହୋଇପାରିବ ନାହିଁ । ଦେଶ ଏଭଳି ଚାଲିପାରିବ ନାହିଁ । ଦେଶକୁ ବଞ୍ଚାଇବା ଲାଗି ଆମେ ପ୍ରଦର୍ଶନ କରିବୁ ।
ସିଜେପିର ଆନ୍ଦୋଳନକୁ ଦୃଷ୍ଟିରେ ରଖି କେନ୍ଦ୍ର ସରକାର ସମଗ୍ର ଦିଲ୍ଲୀକୁ ସୁରକ୍ଷାର ଅଭେଦ୍ୟ ଦୁର୍ଗରେ ପରିଣତ କରିଛନ୍ତି । ଜନ୍ତରମନ୍ତର ଓ ତାର ଆଖପାଖ ଅଞ୍ଚଳରେ ବିଏନ୍ଏସ୍ର ଧାରା ୧୬୩ ଲାଗୁ କରାଯାଇଛି । ସୁରକ୍ଷା ଲାଗି ପ୍ରାୟ ୩୮ ହଜାର ଯବାନଙ୍କୁ ନିୟୋଜିତ କରାଯାଇଛି । ସେଥିରେ ୨୩ ହଜାର କେନ୍ଦ୍ରୀୟ ଅର୍ଦ୍ଧସାମରିକ ବାହିନୀର ଯବାନ ଏବଂ ଦିଲ୍ଲୀ ପୁଲିସର ୧୫ ହଜାର ଯବାନ ସାମିଲ ଅଛନ୍ତି । ଫ୍ରଣ୍ଟଲାଇନରେ ଥିବା ୧୫୦ ଯବାନଙ୍କ ଦେହରେ ଲାଗିଛି ବଡି କ୍ୟାମେରା । ଯାହାଫଳରେ ପ୍ରଦର୍ଶନ ବେଳେ କୌଣସି ପ୍ରକାର ଅପ୍ରୀତିକର ଘଟଣାର ରେକର୍ଡିଂ କରାଯାଇପାରିବ । ଏଥିସହ ବିଭିନ୍ନ ସ୍ଥାନରେ ୩୦୦ ସିସିଟିଭି କ୍ୟାମେରା ମଧ୍ୟ ଲଗାଯାଇଛି । ନୂଆଦିଲ୍ଲୀ ଓ ହଜରତ ନିଜାମୁଦ୍ଦିନ ଷ୍ଟେସନକୁ ଆସିବାକୁ ଥିବା ୩୮ଟି ଟ୍ରେନ ବାତିଲ କରିଦିଆଯାଇଛି । ୫୭ଟି ମେଟ୍ରୋ ଷ୍ଟେସନ ବନ୍ଦ କରିଦିଆଯାଇଛି ।
କର୍ତ୍ତବ୍ୟପଥରୁ ଜନପଥ ପର୍ଯ୍ୟନ୍ତ ୪ କି.ମି. ପରିବ୍ୟାପ୍ତ ଅଞ୍ଚଳରେ ଶୁକ୍ରବାର ରାତି ୧୦ଟାରୁ ଶନିବାର ରାତି ୧୦ଟା ପର୍ଯ୍ୟନ୍ତ ମୋବାଇଲ ଇଣ୍ଟରନେଟ ସେବାକୁ ବନ୍ଦ କରିଦିଆଯାଇଛି । ଦିଲ୍ଲୀ ପୁଲିସ ବିଭିନ୍ନ ଟେଲିକମ ଅପରେଟରଙ୍କୁ ଚିଠି ଲେଖି ଇଣ୍ଟରନେଟ ବନ୍ଦ କରିବାକୁ କହିଛି । ଶନିବାର ଦିଲ୍ଲୀର ସମସ୍ତ ସ୍କୁଲ ଓ କଲେଜକୁ ବନ୍ଦ କରିଦିଆଯାଇଥିଲା ବେଳେ ଅନ୍ଲାଇନରେ ପଢ଼ାଇବାକୁ କୁହାଯାଇଛି । ଶନିବାର ହେବାକୁ ଥିବା ସବୁ ପରୀକ୍ଷାକୁ ସ୍ଥଗିତ ଯାଇଛି । ଦିଲ୍ଲୀ-ନୋଏଡା ଓ ଦିଲ୍ଲୀ-ହରିୟାଣା ସୀମାରେ ବ୍ୟାରିକେଡ କରାଯାଇ ଯାନବାହନ ଯାଞ୍ଚ କରାଯାଉଛି । ଯେଉଁ ଗାଡି଼ଗୁଡ଼ିକ ଦିଲ୍ଲୀକୁ ସିଜେପି କାର୍ଯ୍ୟକର୍ତ୍ତା ଓ ସମର୍ଥକଙ୍କୁ ଧରି ଆସୁଛି ସେଗୁଡ଼ିକୁ ପ୍ରବେଶ ଅନୁମତି ଦିଆଯାଉ ନାହିଁ ।
ସିଜେପିର ଆନ୍ଦୋଳନକୁ ଦୃଷ୍ଟିରେ ରଖି ଦିଲ୍ଲୀ ବ୍ୟବସାୟିକ ସଂଘ ପକ୍ଷରୁ କନ୍ନଟ ପ୍ଲେସ୍ ଅଞ୍ଚଳରେ ଥିବା ସମସ୍ତ ଦୋକାନବଜାର ଓ ବ୍ୟବସାୟିକ ପ୍ରତିଷ୍ଠାନ ବନ୍ଦ ରଖିବାକୁ ଘୋଷଣା କରିଛି । ଭାଗିରଥୀ ପ୍ୟାଲେସରେ ଥିବା ବିଦ୍ୟୁତ ମାର୍କେଟ ମଧ୍ୟ ବନ୍ଦ ରହିବ । ସେହିଭଳି ଦିଲ୍ଲୀ ହାଇକୋର୍ଟ କହିଛନ୍ତି ପଟିଆଲା ହାଉସ୍ କୋର୍ଟ ଓ ରାଉଜ ଆଭେନ୍ୟୁ କୋର୍ଟରେ ଶନିବାର ଭର୍ଚୁଆଲରେ ଶୁଣାଣି କରାଯିବ । ହାଇକୋର୍ଟ କହିଛନ୍ତି ଯେ ୭ ଜିଲ୍ଲା ଅଦାଲତରେ ଅଭିଯୁକ୍ତଙ୍କୁ ଯଦି ହାଜର କରାନଯାଇ ପାରିବ ତେବେ କୌଣସି ପ୍ରତିକୂଳ ଆଦେଶ ଜାରି କରାଯିବ ନାହିଁ । ସିଜେପିର ପ୍ରସ୍ତାବିତ ଆନ୍ଦୋଳନକୁ ନେଇ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ସବୁ ରାଜ୍ୟ ଓ କେନ୍ଦ୍ର ଶାସିତ ପ୍ରଦେଶକୁ ଚିଠି ଲେଖାଯାଇଛି । ସେଥିରେ ନିଜ ନିଜ ରାଜ୍ୟରୁ ଦିଲ୍ଲୀକୁ ଆନ୍ଦୋଳନରେ ସାମିଲ ହେବାକୁ ଆସିବାକୁ ଥିବା ସିଜେପି କାର୍ଯ୍ୟକର୍ତ୍ତା ଓ ବିଭିନ୍ନ ରାଜନୈତିକ ଦଳର କର୍ମୀମାନଙ୍କୁ ରୋକିବାକୁ ପଦକ୍ଷେପ ନେବା ଲାଗି କୁହାଯାଇଛି ।
ସୌଜନ୍ୟ ପ୍ରମେୟ
