ଡିସେମ୍ବରରେ ବାଂଲାଦେଶରେ ବଡ଼ ଝଡ଼ ସୃଷ୍ଟି ହେବାକୁ ଯାଉଛି; ପାସପୋର୍ଟ ପାଇଁ ଆବେଦନ କରିଛନ୍ତି ଶେଖ ହସିନା

ନୂଆଦିଲ୍ଲୀ/ଢାକା,୯।୧୧: ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନା ଡିସେମ୍ବରରେ ନିଜ ଦେଶକୁ ଫେରିବା ପାଇଁ ପ୍ରସ୍ତୁତି ଚଳାଇଛନ୍ତି। ହିଂସାତ୍ମକ ବିକ୍ଷୋଭ ପରେ ତାଙ୍କ ସରକାର କ୍ଷମତାଚ୍ୟୁତ ହୋଇଥିଲା ଏବଂ ଏହି ଘଟଣାକ୍ରମ ପରେ ତାଙ୍କୁ ଭାରତରେ ଆଶ୍ରୟ ନେବାକୁ ପଡ଼ିଥିଲା। ଯଦିଓ ଢାକା ପକ୍ଷରୁ ତାଙ୍କୁ ଫେରିବା ପାଇଁ ବାରମ୍ବାର ଅନୁରୋଧ କରାଯାଇଛି, ତଥାପି ପୂର୍ବତନ ପ୍ରଧାନମନ୍ତ୍ରୀ ବର୍ତ୍ତମାନ ନିଜ ଇଚ୍ଛାରେ ଢାକା ଫେରିବାକୁ ପ୍ରସ୍ତୁତ ହେଉଛନ୍ତି। ଶେଖ ହସିନାଙ୍କ ପାଇଁ ଏକ ନୂଆ ବାଂଲାଦେଶୀ ପାସପୋର୍ଟ ଜାରି କରିବା ନିମନ୍ତେ ନୂଆଦିଲ୍ଲୀସ୍ଥିତ ବାଂଲାଦେଶ ହାଇକମିଶନଙ୍କ ନିକଟରେ ଏକ ଅନୁରୋଧ ପତ୍ର ଦାଖଲ କରାଯାଇଛି; ଏହି ଆବେଦନ ଲଣ୍ଡନସ୍ଥିତ ‘ମ୍ୟାଟ୍ରିକ୍ସ ଚାମ୍ବର୍ସ’ (Matrix Chambers) ପକ୍ଷରୁ କରାଯାଇଛି।
ରିପୋର୍ଟ ଅନୁଯାୟୀ, ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନା ଡିସେମ୍ବରରେ ନିଜ ଦେଶକୁ ଫେରିବା ପାଇଁ ପ୍ରସ୍ତୁତି କରୁଛନ୍ତି। ଏହି ପରିପ୍ରେକ୍ଷୀରେ, ତାଙ୍କ ପାଇଁ ଏକ ନୂତନ ପାସପୋର୍ଟ ଏବଂ ଜାତୀୟ ପରିଚୟ ପତ୍ର (NID) ଜାରି କରିବାକୁ ଅନୁରୋଧ କରାଯାଇଛି। ନଭେମ୍ବର ୯ରେ, ଲଣ୍ଡନସ୍ଥିତ ‘ମ୍ୟାଟ୍ରିକ୍ସ ଚାମ୍ବର୍ସ’ ନୂଆଦିଲ୍ଲୀସ୍ଥିତ ବାଂଲାଦେଶର କାର୍ଯ୍ୟକାରୀ ହାଇକମିଶନର ପ୍ରୀତି ରହମାନଙ୍କୁ ଏକ ଚିଠି ଲେଖି ଏହି ନୂତନ ଦସ୍ତାବିଜଗୁଡ଼ିକ ଜାରି କରିବା ପ୍ରକ୍ରିୟା ଆରମ୍ଭ କରିବାକୁ ଅନୁରୋଧ କରିଛନ୍ତି।

ସୌଜନ୍ୟ ଧରିତ୍ରୀ