Cyclone Assistance: ଗଞ୍ଜାମ, ଗଜପତି, କନ୍ଧମାଳ ଜିଲ୍ଲାର ସବୁ ପ୍ରଭାବିତଙ୍କୁ ମିଳିବ ବାତ୍ୟା ସହାୟତା‌

ସମସ୍ତ ବ୍ଲକରେ ପ୍ରଭାବିତ ପରିବାରକୁ ମିଳିବ ୨୫୦୦ଟଙ୍କା, ୫୦କେଜି ଚାଉଳ

ଏସ୍‌ଆର୍‌ସି ତାଙ୍କ ଚିଠିରେ ଜିଲ୍ଲାପାଳମାନଙ୍କୁ କହିଛନ୍ତି ଯେ ୨,୫୦୦ ଟଙ୍କାର ଆର୍ଥିକ ରାଶି ସିଧାସଳଖ ହିତାଧିକାରୀଙ୍କ ବ୍ୟାଙ୍କ ଖାତାକୁ ଡିବିଟି ମାଧ୍ୟମରେ ପଠାଯିବ ଏବଂ ବ୍ୟାଙ୍କ ସେବା ବାଧାପ୍ରାପ୍ତ ଥିବା ସ୍ଥାନରେ ସ୍ୱତନ୍ତ୍ର ବିକଳ୍ପ ବ୍ୟବସ୍ଥାରେ ଆର୍ଥିକ ରାଶି ବଣ୍ଟାଯିବ। ସେହିପରି ପ୍ରତି ପରିବାର ନିକଟରେ ଯେପରି ୫୦କେଜି ଚାଉଳ ସୁବିଧାରେ ପହଞ୍ଚିବ ସେଥିପାଇଁ ଜିଲ୍ଲା ଯୋଗାଣ ଅଧିକାରୀ, ଓଡ଼ିଶା ଯୋଗାଣ ନିଗମ ସହ ଯୋଗାଯୋଗ କରି ଚାଉଳ ଉଠାଇବାକୁ କୁହାଯାଇଛି।

ଏହାସହ ପ୍ରତିଦିନ କେଉଁ ବ୍ଲକର କେତେଜଣ ହିତାଧିକାରୀଙ୍କୁ ୨୫୦୦ଟଙ୍କା ଓ ୫୦କେଜି ଚାଉଳ ପ୍ରଦାନ କରାଗଲା ତାହାର ତାଲିକା ପ୍ରତିଦିନ ଅପରାହ୍ଣ ୫ଟା ସୁଦ୍ଧା ରାଜ୍ୟ ଜରୁରିକାଳୀନ ପରିଚାଳନା କେନ୍ଦ୍ରକୁ ପଠାଇବାକୁ କୁହାଯାଇଛି। ଅପରପକ୍ଷେ ଗତ ସପ୍ତାହରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ବାତ୍ୟା ପ୍ରଭାବିତ ପରିବାର ପାଇଁ ସ୍ବତନ୍ତ୍ର ପ୍ୟାକେଜ୍ ଘୋଷଣା କରିଥିବାବେଳେ ଏଥିରେ ଗଞ୍ଜାମ ଜିଲ୍ଲାର ୪,୨୯,୭୮୨ଟି ପରିବାର ଏବଂ କୋରାପୁଟ ଜିଲ୍ଲାର ୧୦୫୧ଟି ପରିବାରକୁ ଚିହ୍ନଟ କରାଯାଇଥିଲା। ଏବେ ଏହା ଆଉ ଦୁଇଟି ଜିଲ୍ଲା ସମେତ ତିନିଟି ଜିଲ୍ଲାର ସମସ୍ତ ବ୍ଲକ୍‌କୁ ସଂପ୍ରସାରିତ ହୋଇଛି।