ରାଜ୍ୟ

Cyclone Breaking: ଆଜି ଭୀଷଣ ବାତ୍ୟାର ରୂପ ନେବା ‘ଅକଭାନ୍‌’, ନେଲୋର ଓ ଟୁନି ଭିତରେ ଲ୍ୟାଣ୍ଡଫଲ ଆକଳନ

ଭୁବନେଶ୍ୱର ୧୭/୧୧: ସୋମବାର ସନ୍ଧ୍ୟାରେ ସୃଷ୍ଟି ହୋଇଛି  ବାତ୍ୟା ‘ଅକଭାନ୍‌’ । ମଙ୍ଗଳବାର ଭୀଷଣ  ବାତ୍ୟା(ସିଭିୟର ସାଇକ୍ଲୋନିକ ଷ୍ଟର୍ମ)  ରୂପ ନେବ । ୨୦ ତାରିଖ(ଶୁକ୍ରବାର)  ଦିନ ବେଳା ଆନ୍ଧ୍ରପ୍ରଦେଶ ଓ ୟନମ ଉପକୂଳ ନେଲୋର ଓ ଟୁନି ଭିତରେ  ଲ୍ୟାଣ୍ଡ୍‌ଫଲ କରିବ । ଅତି ଭୀଷଣ ବାତ୍ୟା  ରୂପରେ  ସ୍ଥଳଭାଗ ଛୁଇଁବ । ୧୨୦ରୁ  ୧୩୦ କିମି ବେଗରେ ପବନ ବହିବ ।  ଯଦିଓ ଓଡ଼ିଶାରେ ବାତ୍ୟାର ବିଶେଷ  ପ୍ରଭାବ ପଡ଼ିବନି, ତଥାପି ପ୍ରବଳ ବର୍ଷା  ହେବ । ୧୮ରୁ ବର୍ଷା ଆରମ୍ଭ ହେବ ।  ୫୦ କିମି ବେଗରେ ପବନ ବହିବ । ୧୯ରୁ ପବନର ବେଗ ବଢ଼ିପାରେ ବୋଲି  ଆଇଏମ୍‌ଡି ଆକଳନ କରିଛି ।

ଭାରତୀୟ ପାଣିପାଗ  ବିଭାଗ(ଆଇଏମ୍‌ଡି) ଡିଜି ମୃତ୍ୟୁଞ୍ଜୟ  ମହାପାତ୍ର  କହିଛନ୍ତି, ବାତ୍ୟା ଲ୍ୟାଣ୍ଡଫଲ  କରିବା ସମୟରେ ପବନର ଝଟ୍‌କା  ୧୪୫କିମି ଛୁଇଁପାରେ । ବାତ୍ୟା  ପ୍ରଭାବରେ ୧୮ରୁ ଓଡ଼ିଶାରେ ପ୍ରବଳ  ବର୍ଷା ହେବ । ଦକ୍ଷିଣ ଓ ଉପକୂଳ  ଓଡ଼ିଶାର ଅଳ୍ପ କିଛି ସ୍ଥାନରେ ପ୍ରବଳ  ବର୍ଷା ହୋଇପାରେ । ଉତ୍ତର ଓଡ଼ିଶାରେ  ବି ବର୍ଷା ସମ୍ଭାବନା ଅଛି । ବାତ୍ୟାର  ବାହ୍ୟବଳୟରେ ଆସୁଥିବା ଅଞ୍ଚଳରେ  ବର୍ଷା ହେବ ବୋଲି ସେ କହିଛନ୍ତି ।

ଶିକ୍ଷା ଓ ଅନୁସନ୍ଧାନ  ବିଶ୍ୱବିଦ୍ୟାଳୟ(ସୋଆ) ଜଳବାୟୁ  ଓ  ପାଣିପାଗ କେନ୍ଦ୍ର ନିର୍ଦ୍ଦେଶକ ଡ. ଶରତ  ସାହୁ ବାତ୍ୟାର ପ୍ରଭାବକୁ ନେଇ ସାମାନ୍ୟ ଭିନ୍ନ ଆକଳନ କରିଛନ୍ତି । ତାଙ୍କ ଆକଳନ  କହୁଛି, ତାମିଲନାଡୁ ଉପକୂଳ ଅଞ୍ଚଳରେ ଦୀର୍ଘ ସମୟ ଧରି ପ୍ରବଳ ପବନର ଚାପ(ୱିଣ୍ଡ ସିଅର) ରହିଛି । ଫଳରେ ସମ୍ଭାବ୍ୟ ବାତ୍ୟା ବଳୁଆ ହେବା  ବଦଳରେ ଏହାର ଶକ୍ତି କମୁଛି । ଏହା  ମେଘମାଳାକୁ ଠିକ୍‌ରେ ସଂଗଠିତ କରିପାରୁନି ।  ବାଦଲ ଖଣ୍ଡମାନ ଅସଂଗଠିତ ଅବସ୍ଥାରେ ଅଛନ୍ତି ।  ୨୦ ତାରିଖ ପୂର୍ବାହ୍ନରେ ଟୁନି ନିକଟରେ ଦକ୍ଷିଣ  ଆନ୍ଧ୍ରପ୍ରଦେଶ ଓ ଉତ୍ତର ତାମିଲନାଡୁ ଉପକୂଳ  ଦେଇ ଏହା ସ୍ଥଳଭାଗ ଅତିକ୍ରମ କରିପାରେ ।  ଓଡ଼ିଶାରେ ଏହାର ବଡ଼ ପ୍ରଭାବ ପଡ଼ିବନି ।  ୧୮ରୁ ୨୧ ତାରିଖ ଯାଏ ରାଜ୍ୟର ବିଭିନ୍ନ ସ୍ଥାନରେ  ହାଲୁକାରୁ ମଧ୍ୟମ ଧରଣର ବର୍ଷା ହୋଇପାରେ ।

ଆଇଏମ୍‌ଡି କହିଛି, ୧୮ରୁ ଓଡ଼ିଶାରେ  ବର୍ଷା ଆରମ୍ଭ ହେବ । ଗଜପତି, ଗଞ୍ଜାମ ଓ  ପୁରୀରେ ପ୍ରବଳ ବର୍ଷା ହୋଇପାରେ । ୧୯ରୁ  ଏହି ୩ ଜିଲ୍ଲାରେ ପ୍ରବଳରୁ ଅତିପ୍ରବଳ ବର୍ଷା  ହୋଇପାରେ । ପୁଣି ଉତ୍ତର ଓଡ଼ିଶା, ଉପକୂଳ  ଓଡ଼ିଶା ଓ ଦକ୍ଷିଣ ଓଡ଼ିଶାର ବିଭିନ୍ନ ସ୍ଥାନରେ ପ୍ରବଳ  ବର୍ଷା ହୋଇପାରେ । ୨୦ ତାରିଖରେ ରାୟଗଡ଼ା,  କୋରାପୁଟ, ମାଲକାନଗିରି, ଗଜପତି ଓ ଗଞ୍ଜାମରେ  ପ୍ରବଳରୁ ଅତିପ୍ରବଳ ବର୍ଷା ହୋଇପାରେ ।  ମୟୂରଭଞ୍ଜ, କଳାହାଣ୍ଡି, କନ୍ଧମାଳ, ନବରଙ୍ଗପୁର,  ପୁରୀ, ଖୋର୍ଦ୍ଧା ଓ ନୟାଗଡ଼ରେ ପ୍ରବଳ ବର୍ଷା  ଆଶଙ୍କା ଅଛି । ୧୯ ଓ ୨୦ ତାରିଖରେ ୫୦ରୁ  ୬୦ କିମି ବେଗରେ ପବନ ବହିପାରେ । ୨୧ରେ  ସୁନ୍ଦରଗଡ଼, ଝାରସୁଗୁଡ଼ା, ବରଗଡ଼, ନବରଙ୍ଗପୁର  ଓ କୋରାପୁଟରେ ପ୍ରବଳରୁ ଅତିପ୍ରବଳ ବର୍ଷା  ହେବ ବୋଲି ସତର୍କ କରାଇଛି ପାଣିପାଗ ବିଭାଗ ।

ବାତ୍ୟା ପାଇଁ ସରକାର ଯୁଦ୍ଧକାଳୀନ ଭିତ୍ତିରେ  ଆଗୁଆ ପ୍ରସ୍ତୁତି କରିଛନ୍ତି । ସବୁ ଜିଲ୍ଲା ସତର୍କ  ରହିବାକୁ କୁହାଯାଇଛି । ବିଶେଷକରି ଗଞ୍ଜାମ,  ଗଜପତି, ପୁରୀ, ରାୟଗଡ଼ା, କୋରାପୁଟ ଓ  ମାଲକାନଗିରି ଜିଲ୍ଲାରେ ୨୪ ଘଣ୍ଟିଆ ଆଲର୍ଟ  ରହିବାକୁ ସଂପୃକ୍ତ ଜିଲ୍ଲାପାଳଙ୍କୁ ରାଜସ୍ୱ ମନ୍ତ୍ରୀ  ସୁରେଶ ପୂଜାରୀ ନିର୍ଦ୍ଦେଶ ଦେଇଛନ୍ତି । ସମ୍ଭାବ୍ୟ  ବିପଦପୂର୍ଣ୍ଣ ଅଞ୍ଚଳର ତାଲିକା କରି ସେଠାରୁ  ଲୋକଙ୍କୁ ସ୍ଥାନାନ୍ତର କରିବାକୁ କୁହାଯାଇଛି ।

ସେହି ଅଞ୍ଚଳର ଶିଶୁ, ବରିଷ୍ଠ ନାଗରିକ, ଦିବ୍ୟାଙ୍ଗ  ଓ ଗର୍ଭବତୀ ମହିଳାଙ୍କ ସ୍ୱତନ୍ତ୍ର ଯତ୍ନ ନିଆଯିବ । ଆଶ୍ରୟସ୍ଥଳୀରେ ପିଇବା ପାଣି, ପରିମଳ, ବିଦ୍ୟୁତ୍‌  ଓ ଜେନେରେଟର ସୁବିଧା କରିବାକୁ ନିର୍ଦ୍ଦେଶ  ଦିଆଯାଇଛି । ଭୂସ୍ଖଳନ ଦୃଷ୍ଟିରୁ ସମ୍ବେଦନଶୀଳ  ସ୍ଥାନରୁ ଲୋକଙ୍କୁ ଶୀଘ୍ର ସ୍ଥାନାନ୍ତର କରାଯିବ ।  ବାତ୍ୟା ମୁକାବିଲା ପାଇଁ ୬୦ଟି ଓଡ୍ରାଫ୍‌ ଟିମ୍‌  ଓ ୧୪ଟି ଏନଡିଆରଏଫ ଟିମ୍‌ ପଠାଯିବ ।  ଗଞ୍ଜାମ, ଗଜପତି, କନ୍ଧମାଳ, ରାୟଗଡ଼ା,  କୋରାପୁଟ, ମାଲକାନଗିରି, ପୁରୀ ଜିଲ୍ଲାରେ  ଆବଶ୍ୟକତା ଅନୁସାରେ ସେମାନଙ୍କୁ ନିୟୋଜିତ  କରାଯିବ ବୋଲି ରାଜସ୍ୱ ମନ୍ତ୍ରୀଙ୍କ ଅଧ୍ୟକ୍ଷତାରେ  ବସିଥିବା ଜରୁରୀ ବୈଠକରେ ନିଷ୍ପତ୍ତି ହୋଇଛି ।

ଜଳସମ୍ପଦ ବିଭାଗ ପକ୍ଷରୁ ଆସନ୍ତା ଶନିବାର ଓ  ରବିବାର ଦୁଇ ଦିନ ନିଜ କର୍ମଚାରୀଙ୍କ ଛୁଟି ବାତିଲ  କରାଯାଇଛି । ଗଞ୍ଜାମ, ଗଜପତି ଓ ତେଲେଙ୍ଗିରି  ଅଞ୍ଚଳର କିଛି ଡ୍ୟାମ୍‌ରୁ ଆଗୁଆ ପାଣି ଛଡ଼ାଯାଇଛି ।  କିଛି ଡ୍ୟାମ୍‌ ପାଣି ୫୦ ପ୍ରତିଶତକୁ କମାଇବାକୁ  ଯୋଜନା ହୋଇଛି । ଯନ୍ତ୍ରୀମାନେ ଡ୍ୟାମ୍‌, ନଦୀବନ୍ଧ  ଓ ଜଳସ୍ତରର ସ୍ଥିତି ଯାଞ୍ଚ କରିଛନ୍ତି ।  ବଡ଼ ବର୍ଷା  ଓ ବାତ୍ୟାରେ ଗଞ୍ଜାମ ସମେତ ଦକ୍ଷିଣ ଓଡ଼ିଶାର  ବିଭିନ୍ନ ନଦୀବନ୍ଧ ଓ କେନାଲ ବନ୍ଧ କ୍ଷତିଗ୍ରସ୍ତ  ହୋଇଛି । ଅନେକ ସ୍ଥାନରେ ବଡ଼ ଘାଇର ମରାମତି  ସରିନି । ଏହା ଉପରେ ବିଭାଗ ପକ୍ଷରୁ ନଜର  ରଖାଯାଇଛି । ଜଳଭଣ୍ଡାରର ଜଳସ୍ତର, ଜଳପ୍ରବାହ,  ନଦୀ ଜଳସ୍ତର ଓ ତଳିଆ ଅଞ୍ଚଳର ସ୍ଥିତି ଉପରେ  ନିରନ୍ତର ନଜର ରଖିବାକୁ  ରାଜସ୍ୱ ମନ୍ତ୍ରୀ ନିର୍ଦ୍ଦେଶ  ଦେଇଛନ୍ତି । ରାସ୍ତା, ପୋଲ, କଲଭର୍ଟ ଓ ପାହାଡ଼ିଆ  ରାସ୍ତାର ବିପଦପୂର୍ଣ୍ଣ ସ୍ଥାନକୁ ଚିହ୍ନଟ କରି ଗଛ  କାଟିବା ଯନ୍ତ୍ର, ଆର୍ଥମୁଭର୍‌ ଓ ଜରୁରୀକାଳୀନ  ମରାମତି ଦଳ ପ୍ରସ୍ତୁତ କରି ରଖାଯିବ ।

ଖାଦ୍ୟଶସ୍ୟ, ଶୁଖିଲା ଖାଦ୍ୟ, ପିଇବା  ପାଣି, ଇନ୍ଧନ ଓ ଅନ୍ୟ ଅତ୍ୟାବଶ୍ୟକ ସାମଗ୍ରୀକୁ  ମହଜୁଦ କରି ରଖିବାକୁ ଖାଦ୍ୟ ଓ ଯୋଗାଣ  ବିଭାଗ, ପଞ୍ଚାୟତିରାଜ ବିଭାଗକୁ କୁହାଯାଇଛି ।  ବିପଦପ୍ରବଣ ବିଦ୍ୟୁତ୍‌ ସବ୍‌ଷ୍ଟେସନ୍‌, ଟେଲିକମ୍‌  ଟାୱାର ଚିହ୍ନଟ କରି ଆଗୁଆ ମରାମତି କରାଯିବ ।  ଜିଲ୍ଲା ଓ ଉପଖଣ୍ଡ ହସ୍ପିଟାଲରେ ବିକଳ୍ପ ବିଦ୍ୟୁତ୍‌  ସୁବିଧା, ଅକ୍ସିଜେନ, ଡାକ୍ତରୀ ଦଳ, ଆମ୍ବୁଲାନ୍ସ,  ଔଷଧ ଓ ଅତ୍ୟାବଶ୍ୟକ ସାମଗ୍ରୀ ପ୍ରସ୍ତୁତ ରଖିବାକୁ  ନିର୍ଦ୍ଦେଶ ଦିଆଯାଇଛି । ବର୍ଷା ଓ ପବନରେ  କ୍ଷତିଗ୍ରସ୍ତ ଫସଲ ଚିହ୍ନଟ କରି ଚାଷୀଙ୍କୁ ଆଗୁଆ  ପରାମର୍ଶ ଦେବାକୁ କୃଷି ବିଭାଗକୁ କୁହାଯାଇଛି ।

ପଶୁସମ୍ପଦର ସୁରକ୍ଷା ପାଇଁ ନିରାପଦ ସ୍ଥାନ,  ଗୋଖାଦ୍ୟ, ପିଇବା ପାଣି ଓ ପ୍ରାଣୀ ଚିକିତ୍ସା  ଦଳ ପ୍ରସ୍ତୁତ ରଖାଯିବ । ୨୦ ତାରିଖ ଯାଏ  ମତ୍ସ୍ୟଜୀବୀମାନେ ସମୁଦ୍ରକୁ ନ ଯିବାକୁ ପରାମର୍ଶ  ଦିଆଯାଇଛି । ଜରୁରୀ ପରିସ୍ଥିତିରେ ଆଇନଶୃଙ୍ଖଳା  ରକ୍ଷା, ଯାତାୟାତ ନିୟନ୍ତ୍ରଣ, ଉଦ୍ଧାର କାମରେ  ସହଯୋଗ ଓ ସ୍ଥାନାନ୍ତରିତ ଅଞ୍ଚଳରେ ସୁରକ୍ଷା  ବ୍ୟବସ୍ଥା ପାଇଁ ପୁଲିସ୍‌କୁ କୁହାଯାଇଛି । ସବୁ ବିଭାଗ  ଓ ଜିଲ୍ଲା ପ୍ରଶାସନ ଶୀଘ୍ର ପ୍ରସ୍ତୁତି ସାରିବା ସହ  ନିଜ ବିଭାଗ ଅଧୀନରେ ନୋଡାଲ ଅଧିକାରୀ  ନିଯୁକ୍ତି ଦେବାକୁ ନିର୍ଦ୍ଦେଶ ଦିଆଯାଇଛି । ସ୍ୱତନ୍ତ୍ର  ରିଲିଫ କମିଶନରଙ୍କ ଅଫିସରେ ରାଜସ୍ୱ ମନ୍ତ୍ରୀଙ୍କ  ଅଧ୍ୟକ୍ଷତାରେ ହୋଇଥିବା ପ୍ରସ୍ତୁତି ବୈଠକରେ ମୁଖ୍ୟ  ଶାସନ ସଚିବ ଅନୁ ଗର୍ଗ, ବିଭିନ୍ନ ବିଭାଗର ସଚିବ,  ବରିଷ୍ଠ ଅଧିକାରୀ ଉପସ୍ଥିତ ଥିଲେ । ଜିଲ୍ଲାପାଳମାନେ  ଆଭାସୀ ଯୋଗେ ଯୋଡ଼ି ହୋଇଥିଲେ ।

 

 

 

 

 

 

ସୌଜନ୍ୟ ପ୍ରମେୟ

Show More

Leave a Reply

Your email address will not be published. Required fields are marked *

Back to top button