Accident: ବାଇକ୍‌ ଦୁର୍ଘଟଣାରେ କଲେଜ୍‌ ଛାତ୍ରଙ୍କ ଶୋଚନୀୟ ମୃତ୍ୟୁ

ଥାନା ଅଧିକାରୀ ରମାକାନ୍ତ ମୁଦୁଲିଙ୍କ ନିର୍ଦ୍ଦେଶରେ ତଦନ୍ତକାରୀ ଅଧିକାରୀ ଏଏସ୍‌ଆଇ ପବିତ୍ର କୁମାର ବେହେରା ସଦଳବଳ ପହଞ୍ଚି ମୃତଦେହ ଜବତ ପରେ ପଞ୍ଚନାମା କରାଇ ବ୍ୟବଛେଦ ପାଇଁ ପଠାଇଥିଲେ। ଏ ସଂକ୍ରାନ୍ତରେ ଥାନାରେ ଏକ କେସ୍ ନମ୍ବର ୨୪୨/୨୬ ରୁଜୁ କରାଯାଇଛି। ମୃତକ ଜଣକ ସ୍ଥାନୀୟ ଝୁମ୍ପାଣ ପାଖ ରଙ୍ଗାହୁଡ଼ି ଗାଁର ମଙ୍ଗଳ ମହାନ୍ତଙ୍କ ପୁଅ ବିଶ୍ବଜିତ(୨୦)। ସେ ଯୁକ୍ତ ୩ ତୃତୀୟ ବର୍ଷ ଛାତ୍ର ଥିଲେ।

ଗତକାଲି ସୁକିନ୍ଦା ଥାନା ଅ‌ଶୋକଝର ପାଖ ଦୁଲାବାହଳିସ୍ଥିତ ମାଉସୀ ଘର ଯାଇଥିଲେ। ଫେରିବା ବାଟରେ ବିଳମ୍ବିତ ରାତି ନିଛାଟିଆ ସ୍ଥାନ ରାସ୍ତାକଡ଼ ଗଛରେ ପିଟିହୋଇ ଦୁର୍ଘଟଣାର ଶିକାର ହୋଇଥିଲେ ବୋଲି ପୁଲିସର ପ୍ରାଥମିକ ତଦନ୍ତରୁ ଜଣାପଡ଼ିଛି। ପୂର୍ବରୁ ମୃତକଙ୍କ ମାଆଙ୍କ ଦେହାନ୍ତ ହୋଇଥିଲା। କଳିଙ୍ଗନଗର ଶିଳ୍ପାଞ୍ଚଳର ଏକ ହୋଟେଲରେ କର୍ମଚାରୀ ଭାବେ କାମ କରୁଥିବା ଗରିବ ବାପା ପୁଅ ଅଳିକୁ ଏଡ଼ାଇ ନପାରି କିଛିମାସ ପୂର୍ବରୁ ପୁଅ ପାଇଁ ଏହି ବାଇକ୍‌ କିଣି ଦେଇଥିଲେ।