CM Vijay: ନାଁ ନେବାକୁ ନେଇ ବିବାଦ, କ୍ଷମା ମାଗିଲେ ମୁଖ୍ୟମନ୍ତ୍ରୀ; ବିଧାନସଭାରେ କରୁଣାନିଧିଙ୍କ ନାଁ ନେବାରୁ DMKର ତୀବ୍ର ବିରୋଧ
ଚେନ୍ନାଇ, ୮।୮: ତାମିଲନାଡ଼ୁ ବିଧାନସଭାରେ ସୋମବାର ଦିନ ପୂର୍ବତନ ମୁଖ୍ୟମନ୍ତ୍ରୀ ତଥା ଡିଏମକେର ଜଣଶୁଣା ନେତା ଏମ. କରୁଣାନିଧିଙ୍କ ନାଁକୁ ନେଇ ଏକ ବଡ଼ଧରଣର ହଙ୍ଗାମା ସୃଷ୍ଟି ହୋଇଥିଲା । ରାଜ୍ୟର ବନମନ୍ତ୍ରୀ ଆର.ଭି. ରଞ୍ଜିତ କୁମାର ବିତର୍କ ସମୟରେ କରୁଣାନିଧିଙ୍କ ନାମ ସମ୍ମାନଜନକ ସମ୍ବୋଧନ ବିନା କେବଳ ନାମ ନେଇ ସମ୍ବୋଧନ କରିଥିଲେ । ଯାହାକୁ ନେଇ ବିରୋଧୀ ଡିଏମକେ ବିଧାୟକମାନେ ତୀବ୍ର ବିରୋଧ ପ୍ରଦର୍ଶନ କରିଥିଲେ । ପରିସ୍ଥିତି ଅଧିକ ଜଟିଳ ହେବାରୁ ମୁଖ୍ୟମନ୍ତ୍ରୀ ସି. ଜୋସେଫ ବିଜୟ ନିଜେ ହସ୍ତକ୍ଷେପ କରି ମନ୍ତ୍ରୀଙ୍କ ପକ୍ଷରୁ କ୍ଷମା ପ୍ରାର୍ଥନା କରିଥିଲେ ।
ବିବାଦର ସୂତ୍ରପାତ କିପରି ହେଲା ?
ବିଧାନସଭାରେ ସେହିଦିନ ସ୍ୱାସ୍ଥ୍ୟ ଏବଂ ରାଜସ୍ୱ ବିଭାଗର ଅନୁଦାନ ଦାବି ଉପରେ ଆଲେଚନା ଚାଲିଥିଲା । ଏହି ସମୟରେ ବନମନ୍ତ୍ରୀ ରଞ୍ଜିତ କୁମାର ପୁରୁଣା ନିର୍ବାଚନରେ ଭୋଟ୍ ବଦଳରେ ଟଙ୍କା ବାଣ୍ଟିବାର ପରମ୍ପରା ଉପରେ ନିଜର ମତ ରଖୁଥିଲେ । ସେ ସେହି ସମୟରେ ବିବାଦୀୟ ‘ଥିରୁମଙ୍ଗଲମ ଫର୍ମୁଲା’ର ମଧ୍ୟ ଉଲ୍ଲେଖ କରିଥିଲେ ଏବଂ ଦାବି କରିଥିଲେ ଯେ ତାଙ୍କ କାଞ୍ଚିପୁରମ ଅଞ୍ଚଳରେ ପୂର୍ବ ନିର୍ବାଚନ ସମୟରେ ଗୋଟିଏ ଭୋଟ୍ ପାଇଁ ୧,୫୦୦ ଟଙ୍କା ପର୍ଯ୍ୟନ୍ତ ବଣ୍ଟା ଯାଇଥିଲା । ଏହି ସମୟରେ ମନ୍ତ୍ରୀ ବର୍ତ୍ତମାନର ସରକାର ଏବଂ ପୂର୍ବତନ ନିର୍ବାଚନୀ ପଦ୍ଧତି ମଧ୍ୟରେ ପାର୍ଥକ୍ୟ ବୁଝାଉଥିଲେ । ସେତେବେଳେ ସେ ପୂର୍ବତନ ମୁଖ୍ୟମନ୍ତ୍ରୀ ତଥା ଡିଏମକେର ବରିଷ୍ଠ ନେତା ଏମ. କରୁଣାନିଧିଙ୍କ ପ୍ରସଙ୍ଗ ଟାଣିଥିଲେ, କିନ୍ତୁ ତାଙ୍କ ନାମ ଆଗରେ କୌଣସି ପାରମ୍ପରିକ ସମ୍ମାନସୂଚକ ଶବ୍ଦ ବ୍ୟବହାର କରିନଥିଲେ ।
କାହିଁକି ଆପତ୍ତି ଜଣାଇଲେ ଡିଏମକେ ବିଧାୟକ ?
ତାମିଲନାଡ଼ୁ ବିଧାନସଭାରେ ପୂର୍ବତନ ମୁଖ୍ୟମନ୍ତ୍ରୀମାନେ ଏବଂ ସମ୍ମାନନୀୟ ନେତାମାନଙ୍କୁ ଏକ ଆନୁଷ୍ଠାନିକ ଓ ସମ୍ମାନଜନକ ଢଙ୍ଗରେ ମନେ ପକାଇବାର ଏକ ଦୀର୍ଘ ଦିନର ପରମ୍ପରା ରହିଛି । ବିଶେଷକରି କରୁଣାନିଧିଙ୍କ ପାଇଁ ସାଧାରଣତଃ ‘କଳୈଗ୍ନର’ ବା ‘ପୂର୍ବତନ ମୁଖ୍ୟମନ୍ତ୍ରୀ’ ପରି ଆଦରସୂଚକ ସମ୍ବୋଧନ ବ୍ୟବହାର କରାଯାଏ । ମାତ୍ର ମନ୍ତ୍ରୀ ତାଙ୍କୁ କେବଳ ସାଧାରଣ ଭାବରେ ନାମ ନେଇ ସମ୍ବୋଧନ କରିବାରୁ ଡିଏମକେ ବିଧାୟକମାନେ ଏହାକୁ ପ୍ରତିଷ୍ଠା ଏବଂ ସମ୍ମାନ ପ୍ରତି ଅସମ୍ମାନ ଭାବେ ଗ୍ରହଣ କରି ଗୃହରେ ହଙ୍ଗାମା ଆରମ୍ଭ କରିଦେଇଥିଲେ ।
ମୁଖ୍ୟମନ୍ତ୍ରୀ ବିଜୟଙ୍କ ହସ୍ତକ୍ଷେପ ଓ କ୍ଷମା ପ୍ରାର୍ଥନା:
ଗୃହରେ ଡିଏମକେ ବିଧାୟକମାନଙ୍କର ଉଗ୍ର ବିରୋଧ ଏବଂ ବଢୁଥିବା ଉତ୍ତେଜନାକୁ ଦେଖି ମୁଖ୍ୟମନ୍ତ୍ରୀ ସି. ଜୋସେଫ ବିଜୟ ତୁରନ୍ତ ପରିସ୍ଥିତିକୁ ନିୟନ୍ତ୍ରଣକୁ ଆଣିବାକୁ ଚେଷ୍ଟା କରିଥିଲେ । ସେ ଗୃହରେ ସ୍ୱୀକାର କରିଥିଲେ ଯେ, କରୁଣାନିଧିଙ୍କ ପରି ଜଣେ ବରିଷ୍ଠ ନେତାଙ୍କୁ ଏପରି ଭାବରେ ଉଲ୍ଲେଖ କରିବା ସଠିକ୍ ନଥିଲା । ମୁଖ୍ୟମନ୍ତ୍ରୀ ବିଜୟ କହିଥିଲେ, “ମୁଁ ମନ୍ତ୍ରୀଙ୍କ ପକ୍ଷରୁ କ୍ଷମା ପ୍ରାର୍ଥନା କରୁଛି ।” ମୁଖ୍ୟମନ୍ତ୍ରୀଙ୍କ ଏହି ପ୍ରଭାବଶାଳୀ ପଦକ୍ଷେପ ପରେ ଗୃହରେ ଲାଗିରହିଥିବା ଉତ୍ତେଜନା ଥମିଯାଇଥିଲା ଏବଂ ଶାନ୍ତ ପରିବେଶରେ ପୁଣିଥରେ ବିଧାନସଭା କାର୍ଯ୍ୟସୂଚୀ ତଥା ଆଲୋଚନା ଆରମ୍ଭ ହୋଇଥିଲା ।
ସୌଜନ୍ୟ ପ୍ରମେୟ
