Commission: ତଦନ୍ତ କମିସନ ଫାଇଲ୍‌ ହଜିବା ଘଟଣା: ପାଣ୍ଡିଆନଙ୍କୁ ଥାନାକୁ ଡକାଗଲା, ୨୫ରେ ହାଜର ହେବାକୁ ନୋଟିସ୍‌

ଏହାସହ ତାଙ୍କ ପାଖରେ ଯଦି ଏହି ଦୁଇଟି ତଦନ୍ତ କମିସନ ଫାଇଲ୍‌ ସମ୍ପର୍କିତ କୌଣସି ଦଲିଲ୍‌, ରେକର୍ଡ, ଇଲେକ୍ଟ୍ରୋନିକ ଡିଭାଇସ୍ କିମ୍ବା ଅନ୍ୟାନ୍ୟ ସାମଗ୍ରୀ ଅଛି, ତାକୁ ଆଣିବା ପାଇଁ କୁହାଯାଇଛି। ତଦନ୍ତରେ ସହଯୋଗ କରିବା ପାଇଁ ମଧ୍ୟ ନୋଟିସ୍‌ରେ କୁହାଯାଇଛି। ପାଣ୍ଡିଆନଙ୍କୁ ଥାନାରେ ହାଜର ହେବାକୁ ନୋଟିସ୍‌ ହେବା ପରେ ରାଜ୍ୟ ରାଜନୀତି ସରଗରମ ହୋଇଛି। ବିଭିନ୍ନ ପ୍ରସଙ୍ଗରେ ପାଣ୍ଡିଆନଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ବୋଲି ବିଜେପି ସରକାରର ମନ୍ତ୍ରୀ, ବିଧାୟକମାନେ ପୂର୍ବରୁ ବହୁବାର ବୟାନବାଜି କରୁଥିବାବେଳେ ଆଜି ପ୍ରଥମ ଥର ପାଇଁ ପାଣ୍ଡିଆନଙ୍କୁ ଆଇନ ଫାଶକୁ ଟଣାଯାଇଛି।

ଅପରପକ୍ଷେ ପାଣ୍ଡିଆନଙ୍କୁ କ୍ୟାପିଟାଲ୍‌ ଥାନା ପୁଲିସ ନୋଟିସ୍ କରିବା ପୂର୍ବରୁ ଆଜି ପୁଲିସ କମିସନର ଏସ୍‌. ଦେବଦତ୍ତ ସିଂହ, ଡିସିପି ଜଗମୋହନ ମୀନା ମଧ୍ୟାହ୍ଣ ଗୋଟାଏରେ ଲୋକସେବା ଭବନରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ଭେଟି ଦୀର୍ଘ ସମୟ ଆଲୋଚନା କରିଥିଲେ। ଏହା ପରେ ତଦନ୍ତକାରୀ ଅଧିକାରୀ ଏହି ନୋଟିସ୍ ଜାରି କରିଥିବା ଜାଣିବାକୁ ମିଳିଛି। ତଦନ୍ତ କମିସନ ଫାଇଲ୍‌ ହଜିବା ଘଟଣାରେ ତଦନ୍ତ କରୁଥିବା ଏସ୍ଆଇଟିର ଜଣେ ଅଧିକାରୀଙ୍କ କହିବାନୁଯାୟୀ, ରାଜେଶ ବର୍ମା ତତ୍କାଳୀନ ମୁଖ୍ୟମନ୍ତ୍ରୀଙ୍କ ପ୍ରମୁଖ ସଚିବ ଥିବାବେଳେ ଏହି ଦୁଇଟି ଫାଇଲ୍‌ ସିଏମ୍‌ଓକୁ ଯାଇଥିଲା। ସେହିପରି ମନୋଜ ମିଶ୍ର ତତ୍କାଳୀନ ମୁଖ୍ୟମନ୍ତ୍ରୀଙ୍କ ଓଏସ୍‌ଡି ଥିବାବେଳେ ବିଭିନ୍ନ ଫାଇଲ୍‌ ଗୃହ ବିଭାଗକୁ ହସ୍ତାନ୍ତର ହୋଇଥିଲେ ହେଁ ଏହି ଦୁଇଟି ତଦନ୍ତ କମିସନଙ୍କ ଫାଇଲ୍ ହସ୍ତାନ୍ତର ହୋଇନଥିଲା। ଏହି ଆଧାରରେ ଦୁଇ ଅଧିକାରୀଙ୍କୁ ନୋଟିସ୍ କରାଯାଇଥିଲା। ହେଲେ ରାଜେଶ ବର୍ମା ଥାନାରେ ହାଜର ହୋଇ ନଥିବା ବେଳେ ମନୋଜ ମିଶ୍ର ଏହି ଫାଇଲ୍ ସମ୍ପର୍କରେ ଜାଣିନଥିବା କହିଥିଲେ। ଏପରିକି ସେ ଫାଇଲ୍‌ର ହାର୍ଡ କିମ୍ବା ସଫ୍‌ଟ କପି ରଖିନଥିବା କହିଥିଲେ। ତେଣୁ ତାଙ୍କ ପୂର୍ବରୁ ତତ୍କାଳୀନ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଥିବା ଭି.କେ ପାଣ୍ଡିଆନଙ୍କୁ ନୋଟିସ୍ କରାଯାଇଛି। ଯଦି ତତ୍କାଳୀନ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟକୁ କିମ୍ବା ତତ୍କାଳୀନ ମୁଖ୍ୟମନ୍ତ୍ରୀଙ୍କ ପାଖକୁ ଫାଇଲ୍ ଯାଇଥିବ ତେବେ କୌଣସି ନା କୌଣସି ସମୟ‌ରେ ଏହି ତିନି ଅଧିକାରୀଙ୍କ ମଧ୍ୟରୁ କେହି ଜଣଙ୍କ ମାଧ୍ୟମରେ ଫାଇଲ୍ ଫେରିଥିବ। ତେଣୁ ସମସ୍ତେ ଯଦି କହିବେ ଫାଇଲ୍ କେଉଁଠି ଅଛି ଆମେ ଜାଣିନୁ ତେବେ ଆମେ ଆଇନ ଅନୁଯାୟୀ ପରବର୍ତ୍ତୀ ପଦକ୍ଷେପ ନେବୁ।

ସୌଜନ୍ୟ ସମ୍ବାଦ