ଭୁବନେଶ୍ଵର: ଦୀର୍ଘ ଦିନ ହେଲା FCI ଗୋଦାମରେ ପଡ଼ିଥିବା ୧ ଲକ୍ଷ ଟନ୍ ଚାଉଳ ନିଲାମ ପାଇଁ ରାଜ୍ୟ ସରକାର ନିଷ୍ପତ୍ତି ନେଲେ । ରାଜ୍ୟ ସରକାରଙ୍କ ଏହି ନିଷ୍ପତ୍ତି ଦ୍ବାରା ସରକାରଙ୍କ ରାଜସ୍ବହାନୀ ହେବା ଆଶଙ୍କା ରହିଥିବା ବେଳେ ଚାଷୀଙ୍କ ସମସ୍ୟା ସମାଧାନ କିପରି କରିବେ ତାହା ମଧ୍ୟ ବଡ଼ ଚ୍ୟାଲେଞ୍ଜ ସୃଷ୍ଟି କରିଛି। କାରଣ ସରକାର ମେ ୧ ତାରିଖରୁ ରବି ଋତୁ ଧାନ ଉଠାଇବାକୁ ଚିଠି ଜାରି କରିଛନ୍ତି । ହେଲେ ଏହି ଧାନ ଉଠିଲେ ରହିବ କେଉଁଠି । କାରଣ ଏପଟେ ନା ଖରିପ ଋତୁର ଧାନ ମିଲରୁ ନଉଠି ଗୋଦାମ ଘରେ ପଡ଼ି ରହିଥିବା ବେଳେ ଏଫସିଆଇ ଗୋଦାମ ଘରୁ ମଧ୍ୟ ଚାଉଳ ଉଠି ନପାରି ଗୋଦାମ ଘର ଭର୍ତ୍ତି ହୋଇ ରହିଛି।

FCIରେ ଗଚ୍ଛିତ ଚାଉଳ ହେବ ନିଲାମ । ଗଚ୍ଛିତ ୧ ଲକ୍ଷ ମେଟ୍ରିକ୍ ଟନ୍ ଚାଉଳ ନିଲାମ କରିବାକୁ ରାଜ୍ୟ ସରକାର କ୍ୟାବିନେଟ୍ ନିଷ୍ପତ୍ତି ନେଇଛନ୍ତି । ତେବେ କାହିଁକି ଚାଉଳ ନିଲାମ ପାଇଁ ନିଆଗଲା ନିଷ୍ପତ୍ତି ? ଏହା ଦ୍ବାରା ସରକାର କେତେ ଲାଭବାନ ହେବେ ? ଗୋଟିଏ ପଟେ FCI ଗୋଦାମ ଭିତରେ ଚାଉଳ ଭର୍ତ୍ତି ଯୋଗୁଁ ଗୋଦାମ ଖାଲି ନାହିଁ। ଅନ୍ୟପଟେ କିଛି ଜିଲ୍ଲାରୁ ମିଲର ମାନଙ୍କ ଠାରୁ ଚାଉଳ ଉଠାଯାଇ ପାରୁନି। ଫଳରେ ମିଲରେ ବି ଭର୍ତ୍ତି ହୋଇ ରହିଛି ଚାଉଳ । ପରିସ୍ଥିତି ଏପରି ହୋଇଛି ଯେ ଖରିଫ ଋତୁରେ ଚାଷୀଙ୍କ ଧାନ ଉଠାଇବାକୁ ନେଇ ସରକାରଙ୍କୁ କାଠ ଗଡ଼ାରେ ଠିଆ ହେବାକୁ ପଡିଛି । କାରଣ ମେ ୧ ତାରିଖରୁ ରବି ଧାନ ସଂଗ୍ରହ ପାଇଁ ସରକାର ଚିଠି କରିଛନ୍ତି ।

ଗୋଦାମ ଖାଲି ନାହିଁ ଧାନ ଉଠାଇଲେ ରଖିବେ କେଉଁଠି ?

ହେଲେ ପ୍ରଶ୍ନ ଉଠୁଛି ମିଲ୍ ଖାଲି ନଥିବା ବେଳେ FCI ଗୋଦାମ ବି ଖାଲି ନାହିଁ । ସରକାର ଧାନ ଉଠାଇଲେ ରଖିବେ କେଉଁଠି ? ତେବେ ସରକାରଙ୍କ ଚାଉଳ ନିଲାମ ପ୍ରକ୍ରିୟା ସାମ୍ନାକୁ ଆସିବା ପରେ ବରଗଡ଼ ଓ ସୋନପୁରରେ ଗ୍ରାଉଣ୍ଡ ଜିରୋରେ ପହଞ୍ଚି ସ୍ଥିତି ପରଖିଥିଲା ନ୍ୟୁଜ 7 । ବରଗଡ଼ ଜିଲ୍ଲାରେ ଏପର୍ଯ୍ୟନ୍ତ ଯୋଗାଣ ବିଭାଗ ମିଲର୍ସ ମାନଙ୍କ ଠାରୁ ଧାନ ଉଠାଇ ନଥିବାରୁ ମିଲ ଓ ଗୋଦାମ ଗୁଡିକରେ ଧାନ ଭର୍ତ୍ତି ହୋଇ ରହିଛି । ଫଳରେ ଏବେ ଧାନ ସଂଗ୍ରହକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।

ସୌଜନ୍ୟ Prameya News7