ସେହିପରି ଜଣେ ସନ୍ଥ ଯୁଗପୁରୁଷ ହେଉଛନ୍ତି ସଦଗୁରୁ ପରମହଂସ ଶ୍ରୀ ନିଗମାନନ୍ଦ ସରସ୍ୱତୀ ଦେବ।  ଆଜି ଦେଶର ପ୍ରାୟ ୪୦୦ଟି ସ୍ଥାନରେ ଥିବା ଆସନ ମନ୍ଦିର ମଧ୍ୟରେ ଦିଲ୍ଲୀ ଆସନ ମନ୍ଦିର ପ୍ରମୁଖ ସ୍ଥାନ ଗ୍ରହଣ କରି ସ୍ୱାମୀ ନିଗମାନନ୍ଦଙ୍କ ବାଣୀ ପ୍ରଚାର ପ୍ରସାରରେ ସହାୟକ ହେଉଛି। ଭାରତର ରାଜଧାନୀ ଦିଲ୍ଲୀରେ ପୁରୀ ସାରସ୍ୱତ ସଂଘର ଏକ ଶାଖା ଦିଲ୍ଲୀ ସାରସ୍ୱତ ସଂଘ ୧୯୯୯ ମସିହାରେ ପ୍ରତିଷ୍ଠା କରାଯାଇ ଛତରପୁର ଠାରେ ଏକ ଆସନ ମନ୍ଦିର ନିର୍ମାଣ କରାଯାଇଥିଲା। ଛତରପୁର ଠାରେ ଥିବା ଏହି ଆସନ ମନ୍ଦିର ଆଜି ଏହାର ଅନତିଦୂରରେ ଡେରା ରୋଡରେ ଦେଢ ଏକର ପରିମିତ ଜାଗାରେ ଏକ ଭବ୍ୟ ଏବଂ ଦିବ୍ୟ ମନ୍ଦିର ଭାବରେ ସ୍ଥାପନ କରାଯାଇଛି।

ଏହି ନୂତନ ମନ୍ଦିରର ପ୍ରାଣ ପ୍ରତିଷ୍ଠା ଏବଂ ଧ୍ୱଜାରୋହଣ ଉତ୍ସବ ଏପ୍ରିଲ ୧୯ ତାରିଖରେ ଆଧ୍ୟାତ୍ମୀକ ରୀତିନୀତି ଏବଂ ବାତାବରଣ ସଂପନ୍ନ ହୋଇଛି। ଆଜିର ଏହି ଭବ୍ୟ ଆସନମନ୍ଦିରର ପ୍ରାଣ ପ୍ରତିଷ୍ଠାରେ ସଦଗୁରୁ ନିଗମାନନ୍ଦ ଦେବଙ୍କ ଦ୍ୱାରା ରଚିତ ଚାରୋଟି ପୁସ୍ତକ ଯୋଗୀ ଗୁରୁ, ଜ୍ଞାନୀ ଗୁରୁ, ପ୍ରେମିକ ଗୁରୁ ଏବଂ ତାନ୍ତ୍ରୀକ ଗୁରୁର ହିନ୍ଦି ସଂସ୍କରଣକୁ ପାଠକାର୍ପିତ କରିଛନ୍ତି। ଦିଲ୍ଲୀ ସାରସ୍ୱତ ସଂଘର ସଭାପତି ସଂଗ୍ରାମ ଧର, ସଂପାଦକ ତପନ କୁମାର ମହାପାତ୍ର ଏବଂ କୋଷାଧ୍ୟକ୍ଷ ଜୀତେନ୍ଦ୍ର ନାଥ ତ୍ରିପାଠୀଙ୍କ ତତ୍ତ୍ୱାବଧାନରେ ଆୟୋଜିତ ଏହି ଭବ୍ୟ ମଙ୍ଗଳ କାର୍ଯ୍ୟକ୍ରମରେ ନିଳାଚଳ ସାରସ୍ୱତ ସଂଘ, ପୁରୀର ସଭାପତି ଏବଂ ମାର୍ଗ ଦର୍ଶକ ସନ୍ତୋଷ କୁମାର ମହାନ୍ତି, ପରିଚାଳକ ସରତ ଚନ୍ଦ୍ର ସିଂହଦେଓ ଆଦି ବିଶିଷ୍ଟ ନିଗମ ଅନୁଗାମୀଙ୍କ ଉପସ୍ଥିତ ଥିଲେ।

ସନାତନ ଧର୍ମର ପ୍ରସାର, ସତ୍ ଶିକ୍ଷାର ବିସ୍ତାର, ଶିବ ଜ୍ଞାନରେ ଜୀବ ସେବା ରୂପକ ବ୍ରତ ଗ୍ରହଣ କରି ଯୋଜନାବଦ୍ଧ ଭାବରେ ପାଞ୍ଚଟି ବିଭାଗୀୟ ଆଶ୍ରମ ସ୍ଥାପନ କରି ବିଶ୍ୱ କିପରି ବ୍ରହ୍ମଜ୍ଞାନର ଆଲୋକରେ ଉଦଭାସିତ ହେବ, ନିଜର ଇଷ୍ଟଙ୍କ ସହ ଯୋଗଯୁକ୍ତ ହୋଇପାରିବ, ପ୍ରେମର ପ୍ଲାବନରେ ପ୍ଲାବିତ ହେବ ଏବଂ ତନ୍ତ୍ର ମନ୍ତ୍ର ପ୍ରଭାବରେ ଆସୁରୀ ଶକ୍ତିର ବିନାଶ କରିପାରିବ ସେହି କାର୍ଯ୍ୟର ସୂତ୍ରପାତ କରିଥିବା ସ୍ୱାମୀ ନିଗମାନନ୍ଦ ନିଜର ଶେଷ ଜୀବନ ପୁରୀରେ ଅତିବାହିତ କରିଥିଲେ ଏବଂ ପୁରୀ ସାରସ୍ୱତ ସଂଘ ପ୍ରତିଷ୍ଠା କରି ଅନୁଗାମୀମାନଙ୍କୁ ଦିଗଦର୍ଶନ ଦେଉଥିଲେ। ପୁରୀ ସାରସ୍ୱତ ସଂଘର ସ୍ୱୀକୃତିପ୍ରାପ୍ତ ଶାଖା ଦିଲ୍ଲୀ ସାରସ୍ୱତର ମୂଳଦୁଆ ରଖିଥିଲେ ସ୍ୱର୍ଗତ ଦୁର୍ଗା ଚରଣ ମହାନ୍ତି, ସ୍ୱର୍ଗତ ଦୁର୍ଯ୍ୟୋଧନ ପ୍ରଧାନ, ରଘୁନାଥ ତ୍ରିପାଠୀ ଏବଂ ସ୍ୱର୍ଗତ ପ୍ରଭାକର ମହାନ୍ତି। ଆଜିର ଏହି ଭବ୍ୟ ଏବଂ ଦିବ୍ୟ ପ୍ରାଣ ପ୍ରତିଷ୍ଠା ଉତ୍ସବରେ ଦେଶର ବିଭିନ୍ନ ଭାଗରୁ ନିଗମାନନ୍ଦ ଦେବଙ୍କ ଅନୁଗାମୀମାନେ ଶହ ଶହ ସଂଖ୍ୟାରେ ଯୋଗ ଦେଇଥିଲେ।

ସୌଜନ୍ୟ ସମ୍ବାଦ