Indian Navy: ଦକ୍ଷିଣ ଚୀନ୍ ସାଗରରେ ଭାରତୀୟ ନୌସେନାର ଉପସ୍ଥିତି ଗୁରୁତ୍ୱପୂର୍ଣ୍ଣ ସଙ୍କେତ: ଫିଲିପାଇନ୍ସ ରାଷ୍ଟ୍ରଦୂତ
ଦକ୍ଷିଣ ଚୀନ୍ ସାଗରରେ ଭାରତୀୟ ନୌସେନାର ବଢ଼ୁଥିବା ଉପସ୍ଥିତି ଆଞ୍ଚଳିକ ସୁରକ୍ଷା ଓ ନିୟମଭିତ୍ତିକ ସାମୁଦ୍ରିକ ବ୍ୟବସ୍ଥା ପାଇଁ ଏକ ଗୁରୁତ୍ୱପୂର୍ଣ୍ଣ ସଙ୍କେତ ବୋଲି ଭାରତରେ ନିଯୁକ୍ତ ଫିଲିପିନ୍ସର ରାଷ୍ଟ୍ରଦୂତ ଜୋସେଲ୍ ଫ୍ରାନ୍ସିସ୍କୋ ଇଗ୍ନାସିଓ କହିଛନ୍ତି।
ନୂଆଦିଲ୍ଲୀ: ଦକ୍ଷିଣ ଚୀନ୍ ସାଗରରେ ଭାରତୀୟ ନୌସେନାର ବଢ଼ୁଥିବା ଉପସ୍ଥିତି ଆଞ୍ଚଳିକ ସୁରକ୍ଷା ଓ ନିୟମଭିତ୍ତିକ ସାମୁଦ୍ରିକ ବ୍ୟବସ୍ଥା ପାଇଁ ଏକ ଗୁରୁତ୍ୱପୂର୍ଣ୍ଣ ସଙ୍କେତ ବୋଲି ଭାରତରେ ନିଯୁକ୍ତ ଫିଲିପିନ୍ସର ରାଷ୍ଟ୍ରଦୂତ ଜୋସେଲ୍ ଫ୍ରାନ୍ସିସ୍କୋ ଇଗ୍ନାସିଓ କହିଛନ୍ତି। ମଙ୍ଗଳବାର ଗଣମାଧ୍ୟମକୁ ଦେଇଥିବା ଏକ ସାକ୍ଷାତ୍କାରରେ ସେ ଭାରତ-ଫିଲିପାଇନ୍ସ ମଧ୍ୟରେ ବଢ଼ୁଥିବା ସାମୁଦ୍ରିକ ସହଯୋଗକୁ ସ୍ୱାଗତ କରିଛନ୍ତି।
ଇଗ୍ନାସିଓ କହିଛନ୍ତି, ଭାରତୀୟ ନୌସେନାର ଉପସ୍ଥିତି କେବଳ ଦୁଇ ଦେଶ ମଧ୍ୟରେ ସହଯୋଗକୁ ସୁଦୃଢ଼ କରୁନାହିଁ, ବରଂ ମୁକ୍ତ, ଅବାଧ ଓ ନିୟମଭିତ୍ତିକ ଭାରତ-ପ୍ରଶାନ୍ତ ଅଞ୍ଚଳ ପ୍ରତି ଉଭୟ ଦେଶର ପ୍ରତିବଦ୍ଧତାକୁ ମଧ୍ୟ ସ୍ପଷ୍ଟ କରୁଛି। ଦକ୍ଷିଣ ଚୀନ୍ ସାଗରରେ ନୌଚଳାଚଳର ସ୍ୱାଧୀନତା ଓ ଅନ୍ତର୍ଜାତୀୟ ଆଇନର ସମ୍ମାନ ବଜାୟ ରହିବା ଅତ୍ୟନ୍ତ ଜରୁରି ବୋଲି ସେ କହିଛନ୍ତି। ସେ କହିଛନ୍ତି, ଭାରତ ଓ ଫିଲିପାଇନ୍ସ ମଧ୍ୟରେ ସାମୁଦ୍ରିକ ସୁରକ୍ଷା, ନୌସେନା ସହଯୋଗ, ପ୍ରଶିକ୍ଷଣ ଓ ପ୍ରତିରକ୍ଷା କ୍ଷେତ୍ରରେ ସମ୍ପର୍କ କ୍ରମାଗତ ଭାବେ ବୃଦ୍ଧି ପାଉଛି। ଭବିଷ୍ୟତରେ ମଧ୍ୟ ଉଭୟ ଦେଶ ଏହି କ୍ଷେତ୍ରରେ ସହଯୋଗକୁ ଆହୁରି ବିସ୍ତାର କରିବେ ବୋଲି ସେ ଆଶା ପ୍ରକାଶ କରିଛନ୍ତି।
ଇଗ୍ନାସିଓ ଭାରତ ନିର୍ମିତ ବ୍ରହ୍ମୋସ୍ ସୁପରସୋନିକ୍ କ୍ଷେପଣାସ୍ତ୍ର ବ୍ୟବସ୍ଥା କ୍ରୟକୁ ନେଇ ମଧ୍ୟ ସନ୍ତୋଷ ପ୍ରକାଶ କରିଛନ୍ତି। ସେ କହିଛନ୍ତି, ଏହି ଚୁକ୍ତି ଦୁଇ ଦେଶ ମଧ୍ୟରେ ରଣନୈତିକ ସହଭାଗିତାକୁ ନୂଆ ଉଚ୍ଚତାକୁ ନେଇଛି। ପ୍ରତିରକ୍ଷା କ୍ଷେତ୍ରରେ ପରସ୍ପର ସହଯୋଗ ଆଞ୍ଚଳିକ ସ୍ଥିରତା ଓ ସୁରକ୍ଷାକୁ ସୁଦୃଢ଼ କରିବ ବୋଲି ସେ ମତ ଦେଇଛନ୍ତି।
ସୌଜନ୍ୟ ସମ୍ବାଦ
