Iran: ଏବେବି କୋଚିରେ ରହିଛି ଇରାନୀ ଜାହାଜ ଆଇଆର୍‌ଆଇଏସ୍‌ ଲାଭାନ

ଫେବ୍ରୁଆରି ୨୮ରେ ଇରାନ ପକ୍ଷରୁ ଅଞ୍ଚଳରେ ଥିବା ୩ଟି ଜାହାଜକୁ ଭାରତୀୟ ବନ୍ଦରରେ ରଖିବା ପାଇଁ ଅନୁମତି ମଗାଯାଇଥିଲା। ସେହିଦିନ ଆମେରିକା ଓ ଇସ୍ରାଏଲ ଇରାନ ଉପରେ ମିଳିତ ଆକ୍ରମଣ ଆରମ୍ଭ କରିଥିଲେ। ଲାଭାନରେ ଯାନ୍ତ୍ରିକ ସମସ୍ୟା ଥିବାରୁ ତୁରନ୍ତ ବନ୍ଦରରେ ପ୍ରବେଶ ଆବଶ୍ୟକ ବୋଲି ଇରାନ ଜଣାଇଥିଲା।

ଭାରତ ମାର୍ଚ୍ଚ ୧ରେ ଅନୁମତି ଦେବା ପରେ ମାର୍ଚ୍ଚ ୪ରେ ଜାହାଜଟି କୋଚିରେ ପହଞ୍ଚିଥିଲା। ବିଦେଶ ମନ୍ତ୍ରୀ ଏସ୍‌ ଜୟଶଙ୍କର ସଂସଦରେ କହିଥିଲେ ଯେ ମାନବୀୟ ଦୃଷ୍ଟିକୋଣରୁ ଜାହାଜକୁ ଭାରତରେ ରହିବାକୁ ଅନୁମତି ଦିଆଯାଇଥିଲା। କୋଚିରେ ପହଞ୍ଚିବା ସମୟରେ ଜାହାଜରେ ୧୮୩ ଜଣ କ୍ରୁ ସଦସ୍ୟ ଥିଲେ ଏବଂ ସେମାନଙ୍କୁ ଭାରତୀୟ ନୌସେନାର ସୁବିଧାରେ ରଖାଯାଇଥିଲା। ପରେ ଅନାବଶ୍ୟକ କ୍ରୁ ସଦସ୍ୟଙ୍କୁ ଭାରତରୁ ପଠାଇ ଦିଆଯାଇଥିଲା। ଏବେ ଜାହାଜ ସହ ୨୦ରୁ ଅଧିକ କ୍ରୁ ସଦସ୍ୟ କୋଚିରେ ରହିଛନ୍ତି। ଜାହାଜର ଦେଖାଶୁଣା ଏବେ କୋଚିନ୍ ପୋର୍ଟ ଅଥରିଟିକୁ ହସ୍ତାନ୍ତର ହୋଇଥିବା ସୂଚନା ମିଳିଛି।