Lal Mandir: ଏନଆଇଏ ଚାର୍ଜସିଟ୍‌ରେ ଖୁଲାସା: ଚାନ୍ଦନୀ ଚୌକରେ ଟ୍ରାଫିକ ଭିଡ଼ ଯୋଗୁଁ ୧୩ ମିନିଟ୍ ପୂର୍ବରୁ ଯୋଜନାରେ କରାଯାଇଥିଲା ପରିବର୍ତ୍ତନ

ନୂଆଦିଲ୍ଲୀ: ଗତବର୍ଷ ରାଜଧାନୀ ଦିଲ୍ଲୀର ଲାଲକିଲ୍ଲା ନିକଟରେ ହୋଇଥିବା ବିସ୍ଫୋରଣ ମାମଲାରେ ଏକ ବଡ଼ ଖୁଲାସା ହୋଇଛି। ଜାତୀୟ ତଦନ୍ତ ସଂସ୍ଥା (ଏନଆଇଏ) ଦ୍ୱାରା କୋର୍ଟରେ ଦାଖଲ ହୋଇଥିବା ଚାର୍ଜସିଟ୍ ଅନୁଯାୟୀ, ଗତବର୍ଷ ନଭେମ୍ବର ୧୦ ତାରିଖରେ ଯାନବାହନ ଦ୍ୱାରା ହୋଇଥିବା ଆଇଇଡି (ଭିବିଆଇଇଡି)ଆକ୍ରମଣର ପ୍ରାଥମିକ ଟାର୍ଗେଟ ଥିଲା ଚାନ୍ଦନୀ ଚୌକରେ ଥିବା ଐତିହାସିକ ଲାଲ୍ ମନ୍ଦିର। ତଦନ୍ତରୁ ଜଣାପଡିଛି, ବିସ୍ଫୋରଣର ମାତ୍ର ୧୩ ମିନିଟ୍ ପୂର୍ବରୁ ଆକ୍ରମଣକାରୀ ଉମର-ଉନ୍-ନବି ଲାଲ୍ ମନ୍ଦିର ନିକଟରେ ତାଙ୍କର ଆଇ-୨୦ କାର ରଖିବାକୁ ଚେଷ୍ଟା କରିଥିଲେ। କିନ୍ତୁ ଅତ୍ୟଧିକ ଟ୍ରାଫିକ ଏବଂ ଅଞ୍ଚଳରେ ବହୁ ସଂଖ୍ୟକ ପୁଲିସ ମୁତୟନ କରାଯାଇଥିବାରୁ ସେ ସଫଳ ହୋଇ ପାରିନଥିଲେ। ଫଳରେ ବାଧ୍ୟ ହୋଇ ସେ ତାଙ୍କର ଯୋଜନାକୁ ପରିବର୍ତ୍ତନ କରିଥିଲେ।

ଆତଙ୍କବାଦୀଙ୍କ ଟାର୍ଗେଟରେ ଥିଲା ଲାଲ୍ ମନ୍ଦିର

ସିସିଟିଭି ଫୁଟେଜରେ ଦେଖାଯାଇଛି, ସନ୍ଧ୍ୟା ୬:୩୭ ରେ ଲାଲ୍ ମନ୍ଦିର ନିକଟରେ ସନ୍ଦିଗ୍ଧ କାରଟି ଦେଖାଯାଇଥିଲା। ପାର୍କିଂ କରି ନପାରିବାରୁ, ଆକ୍ରମଣକାରୀ ଏକ ୟୁ-ଟର୍ଣ୍ଣ ନେଇ ଲାଲକିଲ୍ଲାର ଗେଟ ନମ୍ବର ୪ ଆଡକୁ ମୁହାଁଇଥିଲେ। ତା’ପରେ ଠିକ୍ ସନ୍ଧ୍ୟା ୬:୫୦ ରେ କାରରେ ଥିବା ବିସ୍ଫୋରକକୁ ବିସ୍ଫୋରଣ କରାଯାଇଥିଲା। ଏନଆଇଏ ଚାର୍ଜସିଟରେ ଦିଲ୍ଲୀରେ ହୋଇଥିବା ଏହି ପ୍ରଥମ ଯାନବାହନ ଆତଙ୍କବାଦୀ ଆକ୍ରମଣର ଷଡଯନ୍ତ୍ର ଏବଂ ଯୋଜନା ବିଷୟରେ ବିସ୍ତୃତ ଭାବରେ ବର୍ଣ୍ଣନା କରାଯାଇଛି। ଏଜେନ୍ସି ଅନୁଯାୟୀ, ସୁରକ୍ଷା କର୍ମୀଙ୍କ ସତର୍କତା ଯୋଗୁଁ ଆକ୍ରମଣକାରୀ ଶେଷ ମୁହୂର୍ତ୍ତରେ ତାଙ୍କ ସ୍ଥାନ ପରିବର୍ତ୍ତନ କରିଥିଲେ।

ତଦନ୍ତ ରିପୋର୍ଟ ଅନୁଯାୟୀ, ରାଜଧାନୀରେ ଘଟିଥିବା ବିସ୍ଫୋରଣରେ ୧୧ ଜଣଙ୍କର ମୃତ୍ୟୁ ହୋଇଥିଲା ଏବଂ ୨୯ ଜଣ ଆହତ ହୋଇଥିଲେ। ତଦନ୍ତ ରିପୋର୍ଟ ଅନୁଯାୟୀ, ଅଞ୍ଚଳରେ ପ୍ରାୟ ୧୭ ଲକ୍ଷ ୭୦ ହଜାର ଟଙ୍କାର ସମ୍ପତ୍ତିର କ୍ଷୟକ୍ଷତି ହୋଇଥିବା ଆକଳନ କରାଯାଇଛି। ନଭେମ୍ବର ୨୦୨୫ରେ ଲାଲକିଲ୍ଲା ନିକଟରେ ହୋଇଥିବା କାର ବୋମା ବିସ୍ଫୋରଣ ମାମଲାରେ ଏନଆଇ ପକ୍ଷରୁ ଦାଖଲ ହୋଇଥିବା ଚାର୍ଜସିଟରେ ଆତ୍ମଘାତୀ ଆକ୍ରମଣକାରୀ ଉମର-ଉନ୍-ନବିଙ୍କୁ ଅନସାର ଘଜୱାତ-ଉଲ୍-ହିନ୍ଦ୍‌ର ଆତଙ୍କୀ ମଡ୍ୟୁଲର ଅପରେସନାଲ ଇନଚାର୍ଜ ଭାବରେ ନାମିତ କରାଯାଇଛି। ତଦନ୍ତକାରୀ ସଂସ୍ଥା ଅନୁଯାୟୀ, ନବି ୨୦୨୨ ଆରମ୍ଭରୁ ନିଷ୍କ୍ରିୟ ହୋଇ ପଡ଼ିରହିଥିବା ଆତଙ୍କବାଦୀ ନେଟୱାର୍କକୁ ପୁନଃ ସକ୍ରିୟ କରିବାରେ ଏବଂ ଦେଶରେ ଆତଙ୍କବାଦୀ ଆକ୍ରମଣ ଘଟାଇବା ପାଇଁ ଷଡ଼ଯନ୍ତ୍ରକୁ ଆଗକୁ ବଢାଇବାରେ ନିୟୋଜିତ ଥିଲେ।

ସୌଜନ୍ୟ ସମ୍ବାଦ