ବେଙ୍ଗାଲୁରୁ: ତେଲେଙ୍ଗାନା ମୁଖ୍ୟମନ୍ତ୍ରୀ ଏ.ରେଭନ୍ତ ରେଡ୍ଡୀ ଶନିବାର ବେଙ୍ଗାଲୁରୁଠାରେ ଆୟୋଜିତ ଏକ କାର୍ଯ୍ୟକ୍ରମରେ ହାଇଦ୍ରାବାଦ ବିପର୍ଯ୍ୟୟ ପରିଚାଳନା ଓ ସମ୍ପତ୍ତି ସୁରକ୍ଷା ସଂସ୍ଥା (ହାଇଡ୍ରା)ର ନାମକରଣ ଜର୍ମାନ ଏକଛତ୍ରବାଦୀ ଶାସକ ଆଡଲଫ୍ ହିଟଲରଙ୍କ ପ୍ରିୟ ଶବ୍ଦ ‘ହାଇଡ୍ରା’ ଏବଂ ତାଙ୍କର କୋର୍ ଟିମଠାରୁ ଅନୁପ୍ରାଣିତ ହୋଇ କରାଯାଇଛି ବୋଲି ବିବାଦୀୟ ବୟାନ ଦେବା ପରେ ଏହାକୁ ନେଇ ଭାରତୀୟ ଜନତା ପାର୍ଟି (ବିଜେପି) ଏବଂ ବିଆରଏସ୍ ପକ୍ଷରୁ ତୀବ୍ର ସମାଲୋଚନା କରାଯାଇଛି।
ମୁଖ୍ୟମନ୍ତ୍ରୀ ଏହି ସଂସ୍ଥାର ଉଚ୍ଛେଦ ପ୍ରକ୍ରିୟାକୁ ସୁରକ୍ଷା ଦେଇ ଏହାକୁ ଦେଶର ଅନ୍ୟ ବଡ଼ ସହରରେ ଲାଗୁ କରିବାକୁ ପ୍ରସ୍ତାବ ଦେଇଥିବା ବେଳେ ବିଜେପି ପ୍ରତିନିଧିମାନେ ଏହାକୁ କଂଗ୍ରେସର ଜରୁରୀକାଳୀନ ପରିସ୍ଥିତି ମାନସିକତା ସହ ତୁଳନା କରି ରାହୁଲ ଗାନ୍ଧୀଙ୍କ କାର୍ଯ୍ୟାନୁଷ୍ଠାନ ଏବଂ ମୁଖ୍ୟମନ୍ତ୍ରୀଙ୍କ ବିନା ସର୍ତ୍ତରେ କ୍ଷମା ପ୍ରାର୍ଥନା ଦାବି କରିଛନ୍ତି।
ବିଜେପି ମୁଖପାତ୍ର ଶେହଜାଦ ପୁନାୱାଲା ଏବଂ କେନ୍ଦ୍ର ମନ୍ତ୍ରୀ ଜୀ କିଷାନ ରେଡ୍ଡୀ ସୋସିଆଲ ମିଡିଆରେ ମୁଖ୍ୟମନ୍ତ୍ରୀଙ୍କୁ ଘେରିବା ସହ ହାଇଦ୍ରାବାଦରେ ଚାଲିଥିବା ଉଚ୍ଛେଦକୁ ଯୁଦ୍ଧବିଧ୍ୱସ୍ତ ଇରାନ ଓ ଇସ୍ରାଏଲର ପରିସ୍ଥିତି ସହ ତୁଳନା କରିଛନ୍ତି। ଉଲ୍ଲେଖଯୋଗ୍ୟ ଯେ, ଚଳିତ ବର୍ଷ ଏପ୍ରିଲ ମାସରେ ତେଲେଙ୍ଗାନା ହାଇକୋର୍ଟ ଜଣେ ୯୮ ବର୍ଷୀୟ ବୃଦ୍ଧଙ୍କ ଶତାୟୁ ପ୍ରାଚୀନ ସମ୍ପତ୍ତିକୁ ଭାଙ୍ଗିବା ମାମଲାରେ ହାଇଡ୍ରାର କାର୍ଯ୍ୟକଳାପକୁ ଏକ “ଯୁଦ୍ଧ ଭଳି ପରିସ୍ଥିତି” କହି ଅସନ୍ତୋଷ ବ୍ୟକ୍ତ କରିଥିଲେ ଏବଂ ଏହାର ଆଗାମୀ କାର୍ଯ୍ୟାନୁଷ୍ଠାନ ଉପରେ ସ୍ଥିତାବସ୍ଥା ବଜାୟ ରଖିବାକୁ କଡ଼ା ନିର୍ଦ୍ଦେଶ ଦେଇଥିଲେ।
ସୌଜନ୍ୟ ସମ୍ବାଦ
