ନୂଆଦିଲ୍ଲୀ: ଭାରତ ଓ ଆମେରିକା ମଧ୍ୟରେ ରଣନୈତିକ ସମ୍ପର୍କକୁ ଆହୁରି ମଜବୁତ କରିବା ଦିଗରେ ଆମେରିକା ବୈଦେଶିକ ବିଭାଗ ଦୁଇଟି ବୃହତ୍ ପ୍ରତିରକ୍ଷା ସହାୟତା ପ୍ୟାକେଜ୍କୁ ଅନୁମୋଦନ କରିଛି। ଆମେରିକାର ବୈଦେଶିକ ବିଭାଗ ଭାରତକୁ ଆପାଚି ହେଲିକପ୍ଟର ପାଇଁ ଅତ୍ୟାବଶ୍ୟକ ସେବା ଏବଂ ସମ୍ପର୍କିତ ଉପକରଣ ଯୋଗାଇବା ସହ ‘ଏମ୍୭୭୭-ଏ୨’ ଅଲ୍ଟ୍ରା-ଲାଇଟ୍ ହାଓ୍ବିଟଜର୍ସ ତୋପର ରକ୍ଷଣାବେକ୍ଷଣ ସେବା ବିକ୍ରୟକୁ ମଞ୍ଜୁରୀ ପ୍ରଦାନ କରିଛି। ସରକାରୀ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ପ୍ରତିରକ୍ଷା କ୍ଷେତ୍ରରେ ଦୁଇ ଦେଶ ମଧ୍ୟରେ ହୋଇଥିବା ଏହି ଦୁଇଟିଯାକ ଚୁକ୍ତିର ମୋଟ ଆନୁମାନିକ ମୂଲ୍ୟ ପ୍ରାୟ ୪୨୮.୨ ମିଲିୟନ୍ ଆମେରିକୀୟ ଡଲାର ବୋଲି ଜଣାପଡ଼ିଛି। ଭାରତୀୟ ସେନା ପକ୍ଷରୁ ଏହି ଉନ୍ନତ ଯୁଦ୍ଧାସ୍ତ୍ରଗୁଡ଼ିକର ଦୀର୍ଘକାଳୀନ ବ୍ୟବହାର ଓ ସୁରକ୍ଷା ପାଇଁ ଆମେରିକା ନିକଟରେ ଅନୁରୋଧ କରାଯାଇଥିଲା, ଯାହାକୁ ଏବେ ସବୁଜ ସଙ୍କେତ ମିଳିଛି।
୨୩୦ ମିଲିୟନ୍ ଆମେରିକୀୟ ଡଲାରର ବିକ୍ରୟ ପ୍ରସ୍ତାବ
ଏହି ମେଗା ଚୁକ୍ତି ଅଧୀନରେ ପ୍ରଥମ ପ୍ରସ୍ତାବଟି ଏଏଚ୍-୬୪ଇ ଆପାଚେ ହେଲିକପ୍ଟରର ଅତ୍ୟାବଶ୍ୟକ ସେବା ଓ ଉପକରଣ ବିକ୍ରୟ ପାଇଁ ଉଦ୍ଦିଷ୍ଟ, ଯାହାର ମୂଲ୍ୟ ୧୯୮.୨ ମିଲିୟନ୍ ଡଲାର ରହିଛି। ସେହିପରି ଦ୍ୱିତୀୟ ଚୁକ୍ତି ଅଧୀନରେ ‘ଏମ୍୭୭୭-ଏ୨’ ହାଓ୍ବିଟଜର୍ସର ରକ୍ଷଣାବେକ୍ଷଣ ଓ ସମର୍ଥନ ସେବା ପାଇଁ ୨୩୦ ମିଲିୟନ୍ ଆମେରିକୀୟ ଡଲାରର ବିକ୍ରୟ ପ୍ରସ୍ତାବ ଅନ୍ତର୍ଭୁକ୍ତ। ଏହି ସେବା ଯୋଗାଇବା ପାଇଁ ବିଶ୍ୱପ୍ରସିଦ୍ଧ ବିମାନ ନିର୍ମାତା କମ୍ପାନୀ ”ବୋଇଂ” ଓ ”ଲକହିଡ୍ ମାର୍ଟିନ୍” ମିଳିତ ଭାବେ ଆପାଚେ ହେଲିକପ୍ଟର ସହିତ ଜଡ଼ିତ ସମସ୍ତ ଗୁରୁତ୍ୱପୂର୍ଣ୍ଣ ବୈଷୟିକ ସହାୟତା ପ୍ରଦାନ କରିବେ। ଅପରପକ୍ଷରେ କୁମ୍ବ୍ରିଆରେ ମୁଖ୍ୟାଳୟ ଥିବା ପ୍ରତିଷ୍ଠିତ ବ୍ରିଟିଶ କମ୍ପାନୀ ”ବିଏଇ ସିଷ୍ଟମ୍ସ” ଭାରତର ‘ଏମ୍୭୭୭-ଏ୨’ ହାୱିଜର୍ସ ତୋପଗୁଡ଼ିକ ପାଇଁ ଆବଶ୍ୟକୀୟ ସହାୟତା ଓ ରକ୍ଷଣାବେକ୍ଷଣ ସେବା ଯୋଗାଇଦେବ ବୋଲି ଆମେରିକାର ବୈଦେଶିକ ବିଭାଗ ସ୍ପଷ୍ଟ କରିଛି।
ଭାରତୀୟ ସେନାରେ ପୂର୍ବରୁ ହିଁ ଆପାଚେ ହେଲିକପ୍ଟର ଏବଂ ‘ଏମ୍୭୭୭’ ହାୱିଜର୍ସ ବ୍ୟବହୃତ ହୋଇ ଅତି ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଆସୁଛି, ମାତ୍ର ସେଗୁଡ଼ିକର କାର୍ଯ୍ୟଦକ୍ଷତାକୁ ସର୍ବଦା ସଦୃଢ଼ ରଖିବା ପାଇଁ ନିୟମିତ ବୈଷୟିକ ସହାୟତା, ଇଞ୍ଜିନିୟରିଂ ଏବଂ ଲଜିଷ୍ଟିକ୍ସ ସମର୍ଥନର ବେଶ୍ ଆବଶ୍ୟକତା ରହିଛି। ଆମେରିକାର ଏହି ଅନୁମୋଦନ ଫଳରେ ଭାରତୀୟ ସେନାକୁ ସମସ୍ତ ଉନ୍ନତ ସେବା, ତାଲିମ ଓ ଯାନ୍ତ୍ରିକ ଡକ୍ୟୁମେଣ୍ଟେସନ୍ ସହଜରେ ମିଳିପାରିବ। ବିଶେଷ କରି ସାମ୍ପ୍ରତିକ ସମୟରେ ଯେତେବେଳେ ଭାରତ ନିଜର ସୀମା ସୁରକ୍ଷା କ୍ଷମତାକୁ ସୁଦୃଢ଼ କରିବା ଉପରେ ସର୍ବାଧିକ ଧ୍ୟାନ ଦେଉଛି, ଏଭଳି ସ୍ଥିତିରେ ଏହି ରଣନୈତିକ ପଦକ୍ଷେପ ଉଭୟ ଭାରତ ଓ ଆମେରିକା ମଧ୍ୟରେ ବଢ଼ୁଥିବା ଦ୍ୱିପାକ୍ଷିକ ଓ ପ୍ରତିରକ୍ଷା ସମ୍ପର୍କକୁ ଆହୁରି ମଜବୁତ କରିବ ବୋଲି ପ୍ରତିରକ୍ଷା ବିଶେଷଜ୍ଞମାନେ ମତ ପ୍ରକାଶ କରିଛନ୍ତି।
