ନୂଆଦିଲ୍ଲୀ ୦୧।୦୮; ପ୍ରତି ମାସ ଭଳି ଅଗଷ୍ଟ ୧ ତାରିଖରୁ ଦେଶରେ ଅନେକ ଆର୍ଥିକ ଏବଂ ବ୍ୟବସାୟିକ ନିୟମରେ ବଡ଼ ଧରଣର ପରିବର୍ତ୍ତନ ହୋଇଛି। ଏହି ପରିବର୍ତ୍ତନଗୁଡ଼ିକ ରୋଷେଇ ଗ୍ୟାସ ଦରଠାରୁ ଆରମ୍ଭ କରି ଟ୍ରେନ୍ ଟିକେଟ୍ ବୁକିଂ ଏବଂ ବ୍ୟାଙ୍କିଙ୍ଗ୍ ସେବା ପର୍ଯ୍ୟନ୍ତ ସବୁଠି ଦେଖିବାକୁ ମିଳିଛି । ଆସନ୍ତୁ ଜାଣିବା ଆଜିଠାରୁ କେଉଁ ସବୁ ନିୟମରେ ପରିବର୍ତ୍ତନ ହେଲା-
ଏଲପିଜି ସିଲିଣ୍ଡର ଦର
ଅଗଷ୍ଟ ପହିଲାରୁ ୧୯ କେଜି ବିଶିଷ୍ଟ କମର୍ସିଆଲ୍ ଗ୍ୟାସ୍ ସିଲିଣ୍ଡର ଦାମରେ ୨୦୨ ଟଙ୍କା ହ୍ରାସ କରାଯାଇଛି । ଫଳରେ ଦିଲ୍ଲୀରେ ଏହାର ମୂଲ୍ୟ ୨୭୨୮ ଟଙ୍କା ଓ କୋଲକାତାରେ ୨୮୭୨.୫୦ ଟଙ୍କା ହୋଇଛି। ତେବେ ଘରୋଇ ରୋଷେଇ ଗ୍ୟାସ୍ ଦର ଅପରିବର୍ତ୍ତିତ ରହିଛି।
ରେଲଓ୍ୱେ ତତ୍କାଳ ଟିକେଟ୍
ଷ୍ଟେସନରେ ଭିଡ଼ କମାଇବା ପାଇଁ ରେଳବାଇ ଏବେ ତତ୍କାଳ ଟିକେଟ୍ ପାଇଁ ଟୋକନ୍ ବ୍ୟବସ୍ଥା ଲାଗୁ କରିଛି । ଏବେ ଟୋକନ୍ ମିଳିବା ପରେ ହିଁ କାଉଣ୍ଟରରୁ ଟିକେଟ୍ ଜାରି କରାଯିବ।
ଆୟକର ରିଟର୍ଣ୍ଣ (ITR)
ଆୟକର ଦାଖଲର ସମୟସୀମା ଜୁଲାଇ ୩୧ରେ ଶେଷ ହୋଇଛି। ଏବେ ଅଗଷ୍ଟ ୧ରୁ ରିଟର୍ଣ୍ଣ ଦାଖଲ କଲେ ୧୦୦୦ରୁ ୫୦୦୦ ଟଙ୍କା ପର୍ଯ୍ୟନ୍ତ ଜରିମାନା ବା ଲେଟ୍ ଫି’ ଦେବାକୁ ପଡ଼ିବ।
କ୍ରେଡିଟ୍ କାର୍ଡ
ଅନେକ ବ୍ୟାଙ୍କ ଅଗଷ୍ଟ ୧ ତାରିଖରୁ ସେମାନଙ୍କ କ୍ରେଡିଟ୍ କାର୍ଡ ନୀତିରେ ପରିବର୍ତ୍ତନ କରୁଛନ୍ତି । ଏହି ପରିବର୍ତ୍ତନଗୁଡ଼ିକରେ ରିୱାର୍ଡ ପଏଣ୍ଟ କାର୍ଯ୍ୟକ୍ରମ, ବାର୍ଷିକ ରକ୍ଷଣାବେକ୍ଷଣ ଫି ଏବଂ ଅନ୍ୟାନ୍ୟ ସେବା ଶୁଳ୍କରେ ସଂଶୋଧନ ଅନ୍ତର୍ଭୁକ୍ତ ହୋଇପାରେ। ଏହି ପରିବର୍ତ୍ତନଗୁଡ଼ିକ ବ୍ୟାଙ୍କ ଅନୁସାରେ ଭିନ୍ନ ହୋଇଥାଏ, ତେଣୁ ଗ୍ରାହକମାନେ ସେମାନଙ୍କ ବ୍ୟାଙ୍କ ଦ୍ୱାରା ଜାରି କରାଯାଇଥିବା ସର୍ବଶେଷ ଫି ସୂଚୀ ଏବଂ କ୍ରେଡିଟ୍ କାର୍ଡ ସର୍ତ୍ତାବଳୀ ଯାଞ୍ଚ କରିବା ଉଚିତ।
ସାମଗ୍ରୀ ଦର ବୃଦ୍ଧି
ଏହି ମାସରେ ବିଭିନ୍ନ ସାମଗ୍ରୀର ମୂଲ୍ୟ ବୃଦ୍ଧି ପାଇବାର ସମ୍ଭାବନା ରହିଛି। ଉତ୍ପାଦନ ଖର୍ଚ୍ଚ ବୃଦ୍ଧି ପାଇବା ଦ୍ୱାରା ଚା’ ଠାରୁ ପୋଷାକ, ଟେଲିଭିଜନ, ରେଫ୍ରିଜରେଟର ଏବଂ ୱାଶିଂ ମେସିନ୍ ପର୍ଯ୍ୟନ୍ତ ବିଭିନ୍ନ ଉତ୍ପାଦର ମୂଲ୍ୟ ବୃଦ୍ଧି ହେବ ବୋଲି ବଜାର ବିଶେଷଜ୍ଞମାନେ ଆକଳନ କରିଛନ୍ତି। ଇନପୁଟ୍ କଷ୍ଟ ବଢ଼ୁଥିବାରୁ ଚା’, ପୋଷାକ, ଟିଭି, ଫ୍ରିଜ୍ ଏବଂ ୱାଶିଂ ମେସିନ୍ ଭଳି ଜିନିଷର ଦାମ ୪ ରୁ ୬ ପ୍ରତିଶତ ପର୍ଯ୍ୟନ୍ତ ବଢ଼ିବାର ସମ୍ଭାବନା ରହିଛି।
CKYC ଓ GST
ବ୍ୟାଙ୍କିଙ୍ଗକୁ ସହଜ କରିବା ପାଇଁ CKYC 2.0 ଲାଗୁ କରାଯାଇଛି, ଯାହାଫଳରେ ଗ୍ରାହକଙ୍କୁ ପ୍ରତିଥର KYC ଦଲିଲ ଦେବାକୁ ପଡ଼ିବ ନାହିଁ । ସେହିପରି GST ନିୟମରେ ପରିବର୍ତ୍ତନ କରାଯାଇ ଇ-ଇନଭଏସ୍ ଓ ଇ-ୱେ ବିଲ୍ ବ୍ୟବସ୍ଥାକୁ ଅଧିକ ସ୍ୱଚ୍ଛ କରାଯାଇଛି।
ବ୍ୟାଙ୍କ ସେବା
ବ୍ୟାଙ୍କ ସମ୍ବନ୍ଧୀୟ ଏକ ପରିବର୍ତ୍ତନ ମଧ୍ୟ ଚାଲିଛି। ଏପ୍ରିଲ ପହିଲାରୁ, ଅନେକ ବ୍ୟାଙ୍କ ସେମାନଙ୍କର ସେବା ପାଇଁ ପ୍ରଯୁଜ୍ୟ ଚାର୍ଜ ପରିବର୍ତ୍ତନ କରୁଛନ୍ତି। ଏଥିମଧ୍ୟରୁ, ଉଜ୍ଜୀବନ ସ୍ମଲ୍ ଫାଇନାନ୍ସ ବ୍ୟାଙ୍କ ତାର ଗ୍ରାହକମାନଙ୍କ ପାଇଁ SMS ଆଲର୍ଟ ଚାର୍ଜ ପରିବର୍ତ୍ତନ କରୁଛି।
ସୌଜନ୍ୟ Prameya News7
