Tamil Nadu: ସରକାର ଗଢ଼ିବାକୁ ତତ୍ପରତା; କଂଗ୍ରେସ, ବାମ ଦଳ ସହ କଥାବାର୍ତ୍ତା କରୁଛନ୍ତି ବିଜୟ!
ଚେନ୍ନାଇ: ଅଭିନେତାରୁ ରାଜନେତା ବନିଥିବା ଥାଲାପତି ବିଜୟଙ୍କ ଟିଭିକେ (ତାମିଲଗା ଭେଟ୍ଟ୍ରି କାଝାଗମ) ତାମିଲନାଡୁରେ ୧୦୮ ଆସନରେ ଜିତି ଏକ ଚମତ୍କାର ପ୍ରଦର୍ଶନ କରିଛି। କିନ୍ତୁ ସରକାର ଗଠନ ପାଇଁ ଆବଶ୍ୟକ ସଂଖ୍ୟା ଟିଭିକେ ପାଖରେ ନ ଥିବାରୁ ଏହା ଏବେ ମେଣ୍ଟ ସରକାର ଗଠନ ପାଇଁ କଂଗ୍ରେସ, ବାମ ଓ ଅନ୍ୟ ଛୋଟ ଦଳ ସହ କଥାବାର୍ତ୍ତା କରିବାକୁ ଯୋଜନା କରୁଛି।
ମିଳିଥିବା ସୂଚନା ଅନୁଯାୟୀ, ବିଜୟ କଂଗ୍ରେସ ସମେତ ବିଦୁଥଲାଇ ଚିରୁଥିଗଲ କାଚି (ଭିସିକେ), ସିପିଏମ୍, ସିପିଆଇ, ଇଣ୍ଡିଆନ ୟୁନିଅନ ମୁସଲିମ ଲିଗ୍ ସହ କଥାବାର୍ତ୍ତା କରିବେ। ଏହି ଦଳମାନଙ୍କୁ ଖୁବ୍ଶୀଘ୍ର ଏକ ନିମନ୍ତ୍ରଣ ପଠାଯିବ। ତେବେ କଂଗ୍ରେସ, ଭିସିକେ, ସିପିଆଇ, ସିପିଆଇ(ଏମ୍) ଓ ଆଇୟୁଏମ୍ଏଲ୍ ହେଉଛନ୍ତି ଡିଏମ୍କେ ନେତୃତ୍ବାଧୀନ ଏସ୍ପିଏ (ସେକୁଲାର ପ୍ରୋଗ୍ରେସିଭ୍ ମେଣ୍ଟ)ର ଏକ ଅଂଶ। ଚଳିତ ବିଧାନସଭା ନିର୍ବାଚନରେ କଂଗ୍ରେସ ୫ ଆସନରେ ଜିତିଥିବାବେଳେ ଆଇୟୁଏମ୍ଏଲ୍, ସିପିଆଇ, ସିପିଆଇ(ଏମ୍) ଓ ଭିସିକେ ୨ଟି ଲେଖାଏଁ ଆସନରେ ଜିତିଛନ୍ତି।
ଯଦି କଂଗ୍ରେସ ଓ ଅନ୍ୟ ମେଣ୍ଟ ସହଯୋଗୀ ଟିଭିକେ ସହ ମେଣ୍ଟ କରିବାପାଇଁ ନିଷ୍ପତ୍ତି ନିଅନ୍ତି ତେବେ ବିଜୟଙ୍କ ନେତୃତ୍ବାଧୀନ ଦଳ ସହଜରେ ମ୍ୟାଜିକ୍ ନମ୍ବର ଅତିକ୍ରମ କରି ସରକାର ଗଠନ କରିପାରିବ। ଉଲ୍ଲେଖଯୋଗ୍ୟ, ଟିଭିକେ ଏମ୍କେ ଷ୍ଟାଲିନଙ୍କ ନେତୃତ୍ବାଧୀନ ଡିଏମ୍କେକୁ ଗାଦିରୁ ହଟାଇ ଦେଇଛନ୍ତି ଯିଏ କି କେବଳ ୫୯ ଆସନରେ ଜିତିଛନ୍ତି ଏବଂ ବିରୋଧୀ ଦଳ ଭାବେ ଉଭା ହୋଇଛନ୍ତି। ବିଜୟ ଆଜି ପରେ ନବନିର୍ବାଚିତ ବିଧାୟକମାନଙ୍କର ଏକ ବୈଠକ କରିଛନ୍ତି ଏବଂ ସର୍ବସମ୍ମତିକ୍ରମେ ବିଧାୟକଦଳ ନେତାଭାବେ ନିର୍ବାଚିତ ହୋଇଛନ୍ତି।
ସୌଜନ୍ୟ ସମ୍ବାଦ
