Trump Health: ସ୍ୱାସ୍ଥ୍ୟକୁ ନେଇ ପ୍ରଶ୍ନ କରିବାରୁ ରାଗିଗଲେ ଟ୍ରମ୍ପ; ସାମ୍ବାଦିକଙ୍କୁ କଲେ ଅପମାନିତ

ଅକ୍ଟୋବର ୨୯ ତାରିଖରେ ସାମ୍ବାଦିକଙ୍କ ସହ ଆଲୋଚନା ବେଳେ ରଏଟର୍ସର ଜଣେ ସାମ୍ବାଦିକ ଟ୍ରମ୍ପଙ୍କୁ ପଚାରିଥିଲେ, ଲଗାତାର ନିର୍ବାଚନୀ ପ୍ରଚାର ଯୋଗୁଁ ସେ ଥକି ପଡ଼ିଛନ୍ତି କି? ସେଥିପାଇଁ କାନ୍‌ସାସ୍‌ ଗସ୍ତ ବାତିଲ କରିଛନ୍ତି କି?

ଉତ୍ତ୍ୟକ୍ତ ହୋଇପଡ଼ିଥିଲେ ଟ୍ରମ୍ପ
ଏହା ଶୁଣି ଟ୍ରମ୍ପ ଉତ୍ତ୍ୟକ୍ତ ହୋଇପଡ଼ିଥିଲେ। ସାମ୍ବାଦିକଙ୍କୁ ଅସୁସ୍ଥ ବୋଲି କହିବା ସହ ରଏଟର୍ସକୁ ମଧ୍ୟ ସମାଲୋଚନା କରିଥିଲେ। ଏତିକିରେ ତାଙ୍କ ରାଗ ଶାନ୍ତ ହୋଇନଥିଲା। ସାମ୍ବାଦିକଙ୍କ ଶାରୀରିକ ଗଠନକୁ ନେଇ ଟ୍ରମ୍ପ କଟାକ୍ଷ କରିଥିଲେ। ତେବେ ନିଜ ସ୍ୱାସ୍ଥ୍ୟ ଭଲ ଥିବା ଦାବି କରି ସେ କହିଥିଲେ ଯେ ସେ ସମ୍ପୂର୍ଣ୍ଣ ସୁସ୍ଥ ଅଛନ୍ତି।

୧୯ଟି ରାଜ୍ୟରେ ୨୫ଟି ନିର୍ବାଚନୀ ସଭା
ଅନ୍ୟପକ୍ଷରେ, ଟ୍ରମ୍ପ କାନ୍‌ସାସ୍‌ର ସାଲିନା ଓ ଆୟୋୱାର ଡୁବୁକ୍ୟରେ ହେବାକୁ ଥିବା ଦୁଇଟି ନିର୍ବାଚନୀ ସଭା ବାତିଲ କରିଛନ୍ତି। ଅକ୍ଟୋବର ପହିଲାରୁ ଏଯାଏଁ ଟ୍ରମ୍ପ ୧୯ଟି ରାଜ୍ୟରେ ୨୫ଟି ନିର୍ବାଚନୀ ସଭା କରିସାରିଛନ୍ତି। ଆଗାମୀ ମଧ୍ୟବର୍ତ୍ତୀ ନିର୍ବାଚନକୁ ନେଇ ରିପବ୍ଲିକାନ୍ ଦଳ ପାଇଁ ଏହି ପ୍ରଚାର ଗୁରୁତ୍ୱପୂର୍ଣ୍ଣ ହୋଇଛି।