କର୍ମକୁ ନେଇ ଲୋକଙ୍କ ମଧ୍ୟରେ ଭ୍ରାନ୍ତ ଧାରଣା, ଏହା ଭଲ ନା ଖରାପ…

ଭୁବନେଶ୍ୱର : ଅନେକ ସମୟରେ ଆମ ମନରେ ପ୍ରଶ୍ନ ଆସିଥାଏ ଯେ କର୍ମ କଣ ? ଏହା କିପରି କାମ କରିଥାଏ ? କିଏ ଆମ କର୍ମକୁ ଦେଖି ଫଳ ଦିଅନ୍ତି ? ତେବେ ଏହି ପ୍ରଶ୍ନର ଉତ୍ତର ଅନେକ ରହିଛି କିନ୍ତୁ ଯିଏ ନିଜ ଦାୟିତ୍ୱକୁ ମାନି ଠିକରେ ଚାଲିବା ଶିଖିଛି ସେ ହିଁ ନିଜ କର୍ମପଥରେ ଠିକରେ ଚାଲିଥାଏ | ଆଉ ଆଗକୁ ଈଶ୍ୱରଙ୍କ କୃପା ମଧ୍ୟ ଲାଭ କରିଥାଏ | କର୍ମ କେବଳ ଏକ ଶବ୍ଦ ନୁହେଁ, ଏହାକୁ ନେଇ ଲୋକଙ୍କ ମଧ୍ୟରେ ଅନେକ ଭ୍ରାନ୍ତି ରହିଛି। ଅଧିକାଂଶ ଲୋକ ଭାବନ୍ତି ଯେ ଭଲ କାମ କଲେ ସଙ୍ଗେସଙ୍ଗେ ଭଲ ଫଳ ମିଳିବ ଏବଂ ଖରାପ କାମ କଲେ ତୁରନ୍ତ ଦଣ୍ଡ ମିଳିବ। କିନ୍ତୁ ସତରେ କର୍ମର ଫଳ କଣ ଏତେ ସରଳ? କାହିଁକି ଆମେ କର୍ମକୁ ଭୁଲ୍ ଭାବରେ ବୁଝିଥାଉ ? ଆସନ୍ତୁ ସେ ବିଷୟରେ ଜାଣିବା ….

‘କର୍ମ’ ଭାରତୀୟ ଦର୍ଶନର ଏକ ଗୁରୁତ୍ୱପୂର୍ଣ୍ଣ ଧାରଣା। ଅନେକଙ୍କ ବିଶ୍ୱାସ, ଯେପରି କାମ କରିବେ ସେପରି ଫଳ ମିଳିବ। କିନ୍ତୁ ବିଶେଷଜ୍ଞଙ୍କ କହିବା ହେଉଛି, କର୍ମ କୌଣସି ତୁରନ୍ତ ଦଣ୍ଡ କିମ୍ବା ପୁରସ୍କାରର ବ୍ୟବସ୍ଥା ନୁହେଁ। ଏହା କାରଣ ଓ ପରିଣାମର ଏକ ଦୀର୍ଘ ପ୍ରକ୍ରିୟା, ଯାହାର ପ୍ରଭାବ ସମୟ ସହିତ ଜଣାପଡିଥାଏ। ଧାର୍ମିକ ମତାନୁସାରେ, କର୍ମ କେବଳ ଆମର କାର୍ଯ୍ୟ ଉପରେ ନିର୍ଦ୍ଧାରିତ ନୁହେଁ । ଆମର ଚିନ୍ତାଧାରା, ଉଦ୍ଦେଶ୍ୟ ଓ ବ୍ୟବହାର ମଧ୍ୟ କର୍ମର ଏକ ଅଂଶ ହୋଇଥାଏ । ଆମେ ଯାହା ମନରେ ଚିନ୍ତା କରୁ ତାହା ବି ଏହାର ଅଂଶ | ସେଥିପାଇଁ ଭଲ କାମ କରିଲେ ତୁରନ୍ତ ଭଲ ଫଳ ମିଳିବ କିମ୍ବା ଖରାପ କାମ କରିଲେ ସଙ୍ଗେସଙ୍ଗେ ଦଣ୍ଡ ମିଳିବ ଏଭଳି ଧାରଣା ସଠିକ୍ ନୁହେଁ।

ଅନେକ ସମୟରେ ଦେଖାଯାଏ, ଭଲ ଲୋକମାନେ କଷ୍ଟ ଭୋଗନ୍ତି, ଆଉ ଖରାପ କାମ କରୁଥିବା ଲୋକମାନେ ସଫଳ ହୋଇଥାନ୍ତି। ଏହାକୁ ନେଇ ଲୋକଙ୍କ ମନରେ ପ୍ରଶ୍ନ ଉଠେ ଯେ ତାହେଲେ କର୍ମ କେଉଁଠି ? ବିଶେଷଜ୍ଞଙ୍କ ମତରେ, ଜୀବନର ପ୍ରତ୍ୟେକ ଘଟଣାକୁ କେବଳ କର୍ମ ସହ ଯୋଡ଼ି ଦେଖିହେବ ନାହିଁ। ପରିସ୍ଥିତି, ନିଷ୍ପତ୍ତି, ସମାଜ ଓ ସୁଯୋଗ ମଧ୍ୟ ଜୀବନକୁ ପ୍ରଭାବିତ କରେ। କର୍ମର ପ୍ରକୃତ ଅର୍ଥ ହେଉଛି ନିଜ କାମ ପ୍ରତି ଦାୟିତ୍ୱବାନ ହେବା। ଭଲ କାମ କରିବାର ଉଦ୍ଦେଶ୍ୟ କେବଳ ପୁରସ୍କାର ପାଇବା ନୁହେଁ, ବରଂ ଏକ ଉତ୍ତମ ବ୍ୟକ୍ତିତ୍ୱ ଓ ସମାଜ ଗଠନ କରିବାରେ ରହିଛି । ସେଥିପାଇଁ କର୍ମକୁ ଭୟ କିମ୍ବା ଲାଭର ଦୃଷ୍ଟିରୁ ନୁହେଁ, ବରଂ ଜୀବନର ନୈତିକ ଦାୟିତ୍ୱ ଭାବରେ ବୁଝିବା ଆବଶ୍ୟକ। ତାହା ହେଲେ ଜଣେ ନିଜ କର୍ମ ଠିକ କରିଛି ବୋଲି କୁହାଯାଇପାରିବ |

ତେଣୁ କର୍ମ କୌଣସି ତୁରନ୍ତ ଫଳ ଦେବାର ବ୍ୟବସ୍ଥା ନୁହେଁ। ଏପରି ଚିନ୍ତା ମନରେ ରଖିବା ମଧ୍ୟ ଉଚିତ ନୁହଁ | ଏହା ଆମର ଚିନ୍ତା, କାର୍ଯ୍ୟ ଓ ଆଚରଣର ଦୀର୍ଘକାଳୀନ ପ୍ରଭାବ ସହ ଜଡିତ ଏକ ଜୀବନ ଦର୍ଶନ। କର୍ମକୁ ସଠିକ୍ ଭାବେ ବୁଝିଲେ ଜୀବନ ପ୍ରତି ଆମର ଦୃଷ୍ଟିକୋଣ ମଧ୍ୟ ବଦଳିପାରେ।

ସୌଜନ୍ୟ Prameya News7