LPG Price Hike: ମହଙ୍ଗା ମାଡ଼ରେ ଆକ୍ତାମାକ୍ତା ହେବେ ଖାଉଟି, ପେଟ୍ରୋଲ ଏବଂ ଡିଜେଲ ପରେ ବଢ଼ିଗଲା ଗ୍ୟାସ୍ ଦର
ନୂଆଦିଲ୍ଲୀ: ପେଟ୍ରୋଲ, ଡିଜେଲ ଏବଂ CNG ର ମୂଲ୍ୟ ବୃଦ୍ଧି ପରେ ତୈଳ କମ୍ପାନୀଗୁଡ଼ିକ ଏବେ LPG ସିଲିଣ୍ଡରର ମଧ୍ୟ ଦର ବୃଦ୍ଧି କରିଛନ୍ତି। ବାଣିଜ୍ୟିକ LPG ସିଲିଣ୍ଡରର ମୂଲ୍ୟ ପ୍ରତି ସିଲିଣ୍ଡର ପିଛା ୪୨ ଟଙ୍କା ପର୍ଯ୍ୟନ୍ତ ବୃଦ୍ଧି କରାଯାଇଛି। ୫ କିଲୋଗ୍ରାମ ଫ୍ରି ଟ୍ରେଡ୍ LPG (FTL) ସିଲିଣ୍ଡରର ମୂଲ୍ୟ ମଧ୍ୟ ୧୧ ଟଙ୍କା ବୃଦ୍ଧି ପାଇଛି। ଦିଲ୍ଲୀରେ ଏହାର ମୂଲ୍ୟ ବର୍ତ୍ତମାନ ୮୨୧.୫୦ରେ ପହଞ୍ଚିଛି।
ସେହିପରି ୧୯ କେଜି ବାଣିଜ୍ୟିକ ସିଲିଣ୍ଡରର ମୂଲ୍ୟ ପ୍ରତି ସିଲିଣ୍ଡର ପିଛା ୩୧୧୩.୫୦ରେ ପହଞ୍ଚିଛି। କୋଲକାତାରେ ୧୯ କେଜି ବାଣିଜ୍ୟିକ LPG ସିଲିଣ୍ଡରର ମୂଲ୍ୟ ପ୍ରତି ସିଲିଣ୍ଡର ପିଛା ୩୨୫୫.୫୦ରେ ପହଞ୍ଚିଛି। ଘରୋଇ ବ୍ୟବହାର ପାଇଁ ଉଦ୍ଦିଷ୍ଟ 14.2 କେଜି LPG ସିଲିଣ୍ଡରର ମୂଲ୍ୟରେ କୌଣସି ପରିବର୍ତ୍ତନ ହୋଇନାହିଁ।
ବାଣିଜ୍ୟିକ ଗ୍ୟାସ ସିଲିଣ୍ଡରର ମୂଲ୍ୟ ବୃଦ୍ଧି ସିଧାସଳଖ ହୋଟେଲ, ଢାବା, ରେଷ୍ଟୁରାଣ୍ଟ, ବିବାହ ଏବଂ ପାର୍ଟି ପାଇଁ କ୍ୟାଟରିଂ ସେବା ପ୍ରଦାନକାରୀ ଏବଂ ଖାଦ୍ୟ ବ୍ୟବସାୟ ସହିତ ଜଡିତ ଅନ୍ୟ ଉଦ୍ୟୋଗୀଙ୍କ ବଜେଟ୍ ଉପରେ ପ୍ରଭାବ ପକାଇବ। ସେମାନେ ଏହି ବର୍ଦ୍ଧିତ ଖର୍ଚ୍ଚ ଗ୍ରାହକଙ୍କ ଉପରେ ଲଦି ଦେଇପାରନ୍ତି। ଯାହା ଫଳରେ ହୋଟେଲ ଏବଂ ରେଷ୍ଟୁରାଣ୍ଟରେ ଖାଇବା ମହଙ୍ଗା ହୋଇପାରେ।
ଏହା ପୂର୍ବରୁ, ମେ ୧ ତାରିଖରେ ୧୯ କିଲୋଗ୍ରାମ ବାଣିଜ୍ୟିକ LPG ସିଲିଣ୍ଡରର ମୂଲ୍ୟ ବୃଦ୍ଧି କରାଯାଇଥିଲା। ସେହି ସମୟରେ, ତୈଳ କମ୍ପାନୀଗୁଡ଼ିକ ଏହାର ଦରରେ ୯୯୩ ଟଙ୍କା ବୃଦ୍ଧି କରିଥିଲେ। ଫଳସ୍ୱରୂପ, ଦିଲ୍ଲୀରେ ଏକ ବାଣିଜ୍ୟିକ ସିଲିଣ୍ଡରର ମୂଲ୍ୟ ₹2,078.50 ରୁ ₹3,071.50କୁ ବୃଦ୍ଧି ପାଇଥିଲା। 5 କିଲୋଗ୍ରାମ ‘ଛୋଟୁ’ ସିଲିଣ୍ଡରର ମୂଲ୍ୟ ମଧ୍ୟ ₹261 ବୃଦ୍ଧି କରାଯାଇଥିଲା।
ରବିବାର ଦିନ, ସରକାର ପେଟ୍ରୋଲ, ଡିଜେଲ ଏବଂ ବିମାନ ଇନ୍ଧନ ଉପରେ ରପ୍ତାନି ଶୁଳ୍କ ହ୍ରାସ ଘୋଷଣା କରିଥିଲେ। ଆଜିଠାରୁ ନୂତନ ଦର କାର୍ଯ୍ୟକାରୀ ହୋଇଛି।
ସୌଜନ୍ୟ Prameya News7
