ନୂଆଦିଲ୍ଲୀ,୨୨।୯: ଆଗାମୀ ୨ ଅକ୍ଟୋବର ୨୦୨୬ରୁ ସମଗ୍ର ତାମିଲନାଡୁରେ ଲାଗୁ ହେବାକୁ ଥିବା ‘ଭେଟ୍ରି ପୟନମ’ ଯୋଜନା ଦ୍ୱାରା ପ୍ରତିଦିନ ପ୍ରାୟ ୮୪.୩୨ ଲକ୍ଷ ମହିଳା ପ୍ରତ୍ୟକ୍ଷ ଭାବେ ଉପକୃତ ହେବାର ଅନୁମାନ କରାଯାଉଛି। ଏହି ଯୋଜନା ଆରମ୍ଭ ହେବା ସହିତ ଏବେ ସାଧାରଣ ପୌର ନିଗମ (ମ୍ୟୁନିସିପାଲ) ବସ ବ୍ୟତୀତ ଏକ୍ସପ୍ରେସ, ଡିଲକ୍ସ ଏବଂ ଘାଟି ରାସ୍ତାର ବସଗୁଡ଼ିକରେ ମଧ୍ୟ ମହିଳାମାନେ ମାଗଣାରେ ଯାତ୍ରା କରିପାରିବେ।
ତାମିଲନାଡୁ ସରକାର ରାଜ୍ୟର ମହିଳା ଓ ଛାତ୍ରୀମାନଙ୍କ ଆର୍ଥିକ ସଶକ୍ତୀକରଣ ତଥା ଶିକ୍ଷା ଓ ରୋଜଗାର କ୍ଷେତ୍ରକୁ ସହଜରେ ପହଞ୍ଚିବା ପାଇଁ ମାଗଣା ବସ ଯାତ୍ରା ଯୋଜନା ‘ଭେଟ୍ରି ପୟନମ’ର ସମ୍ପ୍ରସାରଣ ଘୋଷଣା କରିଛନ୍ତି। ମୁଖ୍ୟମନ୍ତ୍ରୀ ସି. ଜୋସେଫ ବିଜୟଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏକ ଉଚ୍ଚସ୍ତରୀୟ ସମୀକ୍ଷା ବୈଠକ ପରେ ଏହା ନିଶ୍ଚିତ କରାଯାଇଛି ଯେ ଏହି ଯୋଜନା ୨ ଅକ୍ଟୋବରରୁ ସମଗ୍ର ତାମିଲନାଡୁରେ କାର୍ଯ୍ୟକାରୀ ହେବ। ଏହି ନିଷ୍ପତ୍ତି ଫଳରେ କାର୍ଯ୍ୟରତ ମହିଳା ଏବଂ କଲେଜ ଯାଉଥିବା ଛାତ୍ରୀମାନଙ୍କୁ ଯାତାୟାତ ଖର୍ଚ୍ଚରୁ ମୁକ୍ତି ମିଳିବା ସହିତ ସୱାସ୍ଥ୍ୟ ସେବା ପର୍ଯ୍ୟନ୍ତ ସେମାନଙ୍କ ପହଞ୍ଚ ମଧ୍ୟ ବେଶ ସହଜ ହୋଇଯିବ।
ସରକାରୀ ତଥ୍ୟ ଅନୁଯାୟୀ, ଏହି ସମ୍ପ୍ରସାରିତ ଯୋଜନାର ଲାଭ ପ୍ରତିଦିନ ପ୍ରାୟ ୮୪.୩୨ ଲକ୍ଷ ମହିଳା ଉଠାଇବେ। ରାଜ୍ୟ ପରିବହନ ନିଗମ ଦ୍ୱାରା ପରିଚାଳିତ ମୋଟ ବସର ୬୯ ପ୍ରତିଶତ ଅର୍ଥାତ ୧୨,୬୯୨ଟି ସରକାରୀ ବସ ଏହି ଯୋଜନା ଅଧୀନରେ ସଂରକ୍ଷିତ କରାଯାଇଛି। ଏହି ବସଗୁଡ଼ିକ ପ୍ରତିଦିନ ମୋଟ ୧,୬୫,୩୧୨ଟି ସିଙ୍ଗଲ ଟ୍ରିପ ପୂରଣ କରିବେ, ଯାହା ରାଜ୍ୟର ମୋଟ ବସ ଚଳାଚଳର ପ୍ରାୟ ୮୫ ପ୍ରତିଶତ ଅଟେ।
ପୂର୍ୱରୁ ଏହି ସୁବିଧା କେବଳ ସାଧାରଣ ସିଟି ଏବଂ ଟାଉନ ବସ ମଧ୍ୟରେ ସୀମିତ ଥିଲା, କିନ୍ତୁ ଏବେ ଏହାର ପରିସର ବହୁତ ବଢ଼ାଇ ଦିଆଯାଇଛି। ନୂତନ ବ୍ୟବସ୍ଥା ଅନୁଯାୟୀ, ମହିଳାମାନେ ଏବେ ମହାନଗର ନିଗମ ଏବଂ ପୌରପାଳିକା ସୀମା ମଧ୍ୟରେ ଏକ୍ସପ୍ରେସ ଓ ଡିଲକ୍ସ ବସ୍ରେ ମଧ୍ୟ ବିନା ଭଡ଼ାରେ ଯାତ୍ରା କରିପାରିବେ। ଏହା ବ୍ୟତୀତ, ଦୂରଗାମୀ ତଥା ପାର୍ୱତ୍ୟାଞ୍ଚଳରେ ୪୦ କିଲୋମିଟରରୁ ଅଧିକ ଦୂରତା ପର୍ଯ୍ୟନ୍ତ ଚାଲୁଥିବା ମଫସିଲ ଅର୍ଡିନାରୀ ଏବଂ ଘାଟି ଅର୍ଡିନାରୀ ବସରେ ମଧ୍ୟ ଯାତ୍ରା କରିପାରିବେ।
ସୌଜନ୍ୟ ଧରିତ୍ରୀ
