ସତନା (ମଧ୍ୟପ୍ରଦେଶ): ମଧ୍ୟପ୍ରଦେଶର ସତନା ଜିଲ୍ଲା ଅନ୍ତର୍ଗତ ବ୍ୟାଙ୍କ କଲୋନୀରେ ସୋମବାର ଏକ ଜଘନ୍ୟ ହତ୍ୟାକାଣ୍ଡ ଘଟିଛି, ଯେଉଁଠାରେ ଜଣେ ୧୧ ବର୍ଷର ନାବାଳକକୁ ତଣ୍ଟି କାଟି ହତ୍ୟା କରିବା ପରେ ଶବକୁ ଏକ ନୀଳ ରଙ୍ଗର ପ୍ଲାଷ୍ଟିକ୍ ଡ୍ରମ୍ ଭିତରେ ଲୁଚାଇ ରଖାଯାଇଥିଲା। ପୁରୁଣା ଶତ୍ରୁତା ଓ ବାପାଙ୍କ ସହ ବିବାଦର ପ୍ରତିଶୋଧ ନେବା ପାଇଁ ସେହି କଲୋନୀରେ ଲଣ୍ଡ୍ରି ଦୋକାନ ଚଲାଉଥିବା ମଥୁରା ରଜକ ନାମକ ଜଣେ ବ୍ୟକ୍ତି ଏହି ନିର୍ମମ କାଣ୍ଡ ଘଟାଇଥିବା ସନ୍ଦେହ କରାଯାଉଛି। ପୋଲିସ ଭାରତୀୟ ନ୍ୟାୟ ସଂହିତାର ଧାରା ୧୦୩ ଅନୁଯାୟୀ ମାମଲା ରୁଜୁ କରିବା ସହ ଘଟଣା ପରଠାରୁ ଫେରାର ଥିବା ଅଭିଯୁକ୍ତକୁ ଧରିବା ପାଇଁ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି।
ଏହି ଦୁଃଖଦ ଘଟଣାଟି ସେତେବେଳେ ଜଣାପଡ଼ିଥିଲା ଯେତେବେଳେ ନାବାଳକର ମା” ଆଶା ରଜକ ଅପରାହ୍ନ ପ୍ରାୟ ୧୨:୩୦ ବେଳେ ଘରକୁ ଫେରି ବାହାରୁ ତାଲା ପଡ଼ିଥିବା ଦେଖିଥିଲେ। ପୁଅକୁ କେଉଁଠି ନପାଇବାରୁ ସେ ପୋଲିସକୁ ଖବର ଦେଇଥିଲେ ଏବଂ ପୋଲିସ ଘରର ତାଲା ଭାଙ୍ଗି ତଦନ୍ତ କରିବା ପରେ ରକ୍ତଭିଜା ତକିଆ ଓ ଡ୍ରମ୍ ଭିତରୁ ଶବ ଉଦ୍ଧାର କରିଥିଲା। ପରିବାର ପକ୍ଷରୁ ଅଭିଯୋଗ ହୋଇଛି ଯେ ବାଳକର ବାପା ମହାରାଷ୍ଟ୍ରରେ କାମ କରୁଥିବା ବେଳେ ଅଭିଯୁକ୍ତ ମଥୁରା ପୂର୍ବରୁ ଆଶାଙ୍କୁ ହଇରାଣ କରୁଥିଲା ଏବଂ ପ୍ରାୟ ୧୦ ଦିନ ପୂର୍ବରୁ ଏହାକୁ ନେଇ ସେମାନଙ୍କ ମଧ୍ୟରେ ଝଗଡ଼ା ହୋଇଥିଲା। ଏହି ଶତ୍ରୁତା ଯୋଗୁଁ ମଥୁରା ପୂର୍ବରୁ ଜୀବନରେ ମାରିଦେବାକୁ ଧମକ ଦେଇଥିଲା ଏବଂ ବର୍ତ୍ତମାନ ସେ ନିଜର ମୋବାଇଲ୍ ବନ୍ଦ କରି ଫେରାର ରହିଛି।
ସୌଜନ୍ୟ ସମ୍ବାଦ