୩୭୦ ଟଙ୍କିଆ ବିରିୟାନୀ ମନ୍ତବ୍ୟ ମାମଲା: କମେଡିଆନ ପ୍ରଣିତ ମୋର ଏବଂ ହିମାଂଶୁ ଜାଙ୍ଗଡ଼ାଙ୍କୁ ମହିଳା କମିଶନଙ୍କ ସମନ

ନୂଆଦିଲ୍ଲୀ: ଗୁରୁଗ୍ରାମରେ ଆୟୋଜିତ ଏକ ଷ୍ଟାଣ୍ଡ-ଅପ୍ କମେଡି ଶୋ’ରେ ଅଶ୍ଳୀଳ ଏବଂ ମହିଳାଙ୍କ ସମ୍ମାନ ହାନି ହେଲା ଭଳି ମନ୍ତବ୍ୟ ଦେବା ଅଭିଯୋଗରେ ଜାତୀୟ ମହିଳା କମିଶନ (NCW) କମେଡିଆନ ପ୍ରଣିତ ମୋର ଏବଂ ୱେବ ଡେଭଲପର ହିମାଂଶୁ ଜାଙ୍ଗଡ଼ାଙ୍କୁ ସମନ ଜାରି କରିଛନ୍ତି।

ଏକ ଷ୍ଟାଣ୍ଡ-ଅପ୍ କମେଡି ଶୋ’ରେ ହିମାଂଶୁ ଜାଙ୍ଗଡ଼ା ଜଣେ ଯୁବତୀଙ୍କ ସହ ଡେଟ୍‌ରେ ଗଲା ବେଳେ ୩୭୦ ଟଙ୍କା ଦେଇ ଚିକେନ୍ ବିରିୟାନୀ କିଣିବା ବିଷୟରେ କହିଥିଲେ। ଝିଅଟି ତାଙ୍କୁ ଘରେ ଛାଡ଼ିଦେବାକୁ କହିବାରୁ, ଜାଙ୍ଗଡ଼ା ବିରିୟାନୀ ପାଇଁ ଖର୍ଚ୍ଚ ହୋଇଥିବା ଟଙ୍କା ବଦଳରେ ଯୌନ ସମ୍ପର୍କ ପାଇଁ ଦାବି କରିଥିଲେ। ଜାଙ୍ଗଡ଼ାଙ୍କର ଏହି କଥା ଶୁଣି ସେଠାରେ ଉପସ୍ଥିତ ଥିବା ଅନ୍ୟ ଦର୍ଶକ ଓ ଶୋର ମୁଖ୍ୟ ପ୍ରଣିତ ମୋର ହସୁଥିବା ଦେଖିବାକୁ ମିଳିଥିଲା। ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ବ୍ୟାପକ ସମାଲୋଚନା ହୋଇଥିଲା।

ନିଜ ଆଡ଼ୁ ମାମଲା ରୁଜୁ କଲେ ମହିଳା କମିଶନ

ମହିଳା କମିଶନ ଏହି ଘଟଣାର ଭିଡିଓ ଦେଖିବା ପରେ ନିଜ ଆଡୁ ମାମଲା ରୁଜୁ କରିଛନ୍ତି। କମିଶନଙ୍କ ଅଧ୍ୟକ୍ଷା ବିଜୟା ରାହତକର ହରିୟାଣା ପୋଲିସ ମହାନିର୍ଦ୍ଦେଶକଙ୍କୁ ଚିଠି ଲେଖି ୭ ଦିନ ମଧ୍ୟରେ କାର୍ଯ୍ୟାନୁଷ୍ଠାନ ରିପୋର୍ଟ (ATR) ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି।

ଏହି ମାମଲାରେ କ’ଣ କାର୍ଯ୍ୟାନୁଷ୍ଠାନ ନିଆଯାଇଛି ଏବଂ ଭିଡିଓର ସତ୍ୟତା ସମ୍ପର୍କରେ ତଥ୍ୟ ମଗାଯାଇଛି। ଆସନ୍ତା ଜୁନ୍ ୨୨ ତାରିଖ ଅପରାହ୍ନ ୪ଟାରେ ଏହି ମାମଲାର ଶୁଣାଣି ହେବ।

କଣ କହିଲେ ମହିଳା କମିଶନ ?

ଏନେଇ ମହିଳା କମିଶନ କହିଛନ୍ତି ଯେ, ମହିଳାଙ୍କ ସମ୍ମତି ଏବଂ ସମ୍ମାନକୁ ଅପମାନିତ କରୁଥିବା ଏବଂ ଯୌନ ଉତ୍ପୀଡ଼ନକୁ ହାସ୍ୟରସ ଭାବରେ ଉପସ୍ଥାପନ କରିବା କଦାପି ଗ୍ରହଣୀୟ ନୁହେଁ। ଏହା ମହିଳାଙ୍କ ସୁରକ୍ଷା ପାଇଁ ବିପଜ୍ଜନକ। ଏହା ଭାରତୀୟ ନ୍ୟାୟ ସଂହିତା (BNS) ଏବଂ ଅନ୍ୟାନ୍ୟ ପ୍ରଯୁଜ୍ୟ ଆଇନର ପ୍ରାସଙ୍ଗିକ ବ୍ୟବସ୍ଥା ଅନୁଯାୟୀ ଏକ FIR ର ସ୍ଥିତି, ସମ୍ପୃକ୍ତ ଲୋକଙ୍କ ବିରୁଦ୍ଧରେ ନିଆଯାଇଥିବା କାର୍ଯ୍ୟାନୁଷ୍ଠାନ, ଭାଇରାଲ ଭିଡିଓର ସତ୍ୟତା ଓ ପ୍ରମାଣୀକରଣ ଏବଂ ଘଟଣାରେ ଆୟୋଜକ, ପ୍ରଦର୍ଶକ ଏବଂ ସ୍ଥାନ ପରିଚାଳନାର ଭୂମିକା ସମ୍ପର୍କରେ ବିବରଣୀ ମାଗିଛି ବୋଲି କମିଶନ କହିଛନ୍ତି।
ସାର୍ବଜନୀନ ମନୋରଞ୍ଜନ ପ୍ଲାଟଫର୍ମ ଏବଂ ଡିଜିଟାଲ୍ ସ୍ଥାନଗୁଡ଼ିକ ଯେପରି “ମହିଳାଙ୍କ ସମ୍ମାନକୁ ଉଲ୍ଲଂଘନ କରୁଥିବା ଯୌନ ଉତ୍ପୀଡ଼ନ, ବଳପୂର୍ବମାନସିକତା କିମ୍ବା ଆଚରଣକୁ ପ୍ରୋତ୍ସାହିତ, ଉତ୍ସାହିତ କିମ୍ବା ସାଧାରଣ କଥା କରିଦେବା ଭଳି ମାଧ୍ୟମ ନ ପାଲଟନ୍ତି, ସେଥିପାଇଁ ରାଜ୍ୟ ପୋଲିସ ଦ୍ୱାରା ପ୍ରସ୍ତାବିତ ପଦକ୍ଷେପ ସମ୍ପର୍କରେ ମଧ୍ୟ ସୂଚନା କମିଶନ ମାଗିଛନ୍ତି। ମହିଳା କମିଶନ ଏହି ଘଟଣାର ଦୃଢ଼ ନିନ୍ଦା କରବା ସହ ମହିଳାଙ୍କ ସ୍ୱାୟତ୍ତତା ପ୍ରତି ଯୌନ ଜବରଦସ୍ତି, ଅଧିକାର କିମ୍ବା ଅସମ୍ମାନକୁ ହାସ୍ୟରସ କିମ୍ବା ମନୋରଞ୍ଜନ ଭାବରେ ଚିତ୍ରଣ କରିବାର ଯେକୌଣସି ପ୍ରୟାସ ଗ୍ରହଣୀୟ ନୁହେଁ ଏବଂ ଭାରତର ସମ୍ବିଧାନ ଏବଂ ଆଇନ ଅନୁଯାୟୀ ମହିଳାମାନଙ୍କୁ ସୁନିଶ୍ଚିତ କରାଯାଇଥିବା ସମାନତା, ମର୍ଯ୍ୟାଦା ଏବଂ ସୁରକ୍ଷାର ନୀତିର ବିପରୀତ ବୋଲି କମିଶନ କହିଛି।

ସୋସିଆଲ ମିଡିଆରେ ବ୍ୟାପକ ବିରୋଧ ପରେ ଉଭୟ ପ୍ରଣିତ ଏବଂ ହିମାଂଶୁ କ୍ଷମା ମାଗିଛନ୍ତି। ହିମାଂଶୁ ନିଜର ଇନଷ୍ଟାଗ୍ରାମ ଆକାଉଣ୍ଟ ଡିଆକ୍ଟିଭେଟ୍ କରିଦେଇଥିବା ବେଳେ ସେ ଯେଉଁ କମ୍ପାନୀରେ କାମ କରୁଥିବା ସେହି କମ୍ପାନୀ ତାଙ୍କର ଏଭଳି ମନ୍ତବ୍ୟ ପାଇଁ ତାଙ୍କୁ ଚାକିରିରୁ ବରଖାସ୍ତ କରିଛି।

ସୌଜନ୍ୟ Prameya News7