“ଭାରତୀୟ ହୋଇ ଶେଷ ନିଃଶ୍ୱାସ ତ୍ୟାଗ କରିବାକୁ ଚାହେଁ”, ୯୪ ବର୍ଷୀୟା ବୃଦ୍ଧା ଛାଡ଼ିଲେ ଆମେରିକା ନାଗରିକତା

ନୂଆଦିଲ୍ଲୀ: ଦୁୁଇ ଦଶନ୍ଧି ବିଦେଶ ମାଟିରେ ବିତିଗଲା । ନାଗରିକତା ବି ଛାଡ଼ି ଦେଇଥିଲେ । କିନ୍ତୁ ଜୀବନର ଶେଷ ସମୟ ନିଜ ମାଟିରେ ବିତାଇବାର ମୋହରେ ନେଇ ବଡ଼ ନିଷ୍ପତ୍ତି । ଆନ୍ଧ୍ରପ୍ରଦେଶର ଜଣେ ବୟସ୍କ ମହିଳା ଭାରତୀୟ ଭାବରେ ନିଜର ଶେଷ ନିଃଶ୍ୱାସ ତ୍ୟାଗ କରିପାରିବା ଆଶାରେ ନିଜର ଆମେରିକୀୟ ନାଗରିକତା ଛାଡ଼ିଛନ୍ତି । ୯୦ ବର୍ଷରୁ ଅଧିକ ବୟସ୍କର ଏହି ମହିଳା ଜଣକ ଯଥାଶୀଘ୍ର ତାଙ୍କୁ ଭାରତୀୟ ନାଗରିକତା ପ୍ରଦାନ କରାଯାଉ ବୋଲି ନିବେଦନ କରିଛନ୍ତି ।

ବାପଟଲା ଜିଲ୍ଲାପାଳ ଭି.ବିନୋଦ କୁମାର ଶୁକ୍ରବାର କହିଛନ୍ତି, କେ.ମହାଲକ୍ଷ୍ମମ୍ମା ନାମକ ଜଣେ ମହିଳା ଆନ୍ଧ୍ରପ୍ରଦେଶରେ ଥିବା ନିଜର ଭିଟାମାଟିକୁ ଫେରିବା ପାଇଁ ଆମେରିକା ନାଗରିକତା ଛାଡ଼ିଛନ୍ତି । ଜଣେ ଭାରତୀୟ ନାଗରିକ ଭାବରେ ପ୍ରାଣତ୍ୟାଗ କରିବାକୁ ଇଚ୍ଛା ପ୍ରକାଶ କରିଛନ୍ତି । ୯୪ ବର୍ଷୀୟା ମହାଲକ୍ଷ୍ମମ୍ମା ଦୁଇ ଦଶନ୍ଧିରୁ ଅଧିକ ସମୟ ଧରି ଆମେରିକାରେ ରହୁଥିଲେ ।

ଜିଲ୍ଲାପାଳ ବିନୋଦ କୁମାର କହିଛନ୍ତି, “ସେ ନିଜର ଶେଷ ସମୟ ନିଜ ଦେଶ ଏବଂ ନିଜ ଗାଁରେ ବିତାଇବାକୁ ଚାହୁଁଥିଲେ ଏବଂ ତାଙ୍କର ଇଚ୍ଛା ଥିଲା ଯେ ତାଙ୍କର ଶେଷ ସଂସ୍କାର ମଧ୍ୟ ସେଇଠି ହେଉ । ଏହା ଏକ ଅତ୍ୟନ୍ତ ଭାବପୂର୍ଣ୍ଣ ମୁହୂର୍ତ୍ତ ଥିଲା ।”

ବାପଟଲା ଜିଲ୍ଲାର ଚିନ୍ତାଗୁମ୍ପଲା ଗାଁର ବାସିନ୍ଦା ମହାଲକ୍ଷ୍ମମ୍ମା, ନିଜ ସ୍ୱାମୀ ନାଗଭୂଷଣମଙ୍କ ମୃତ୍ୟୁ ପରେ ନିଜ ପୁଅଙ୍କ ସହ ରହିବା ପାଇଁ ଆମେରିକା ଚାଲିଯାଇଥିଲେ । ତାଙ୍କ ପୁଅ ଆମେରିକାରେ ଜଣେ କର୍କଟ ରୋଗ ବିଶେଷଜ୍ଞ । ମହିଳା ଜଣକ ଜୁଲାଇ, ୨୦୦୦ ମସିହାରେ ଆମେରିକାର ନାଗରିକତା ଗ୍ରହଣ କରିଥିଲେ । ସେ ବହୁ ବର୍ଷ ଧରି ଆମେରିକାରେ ରହିବା ପରେ, ୨୦୧୮ ମସିହାରେ ନିଜ ପରିବାର ସହ ଭାରତ ଫେରିଆସିଥିଲେ । ନାଗରିକତା ଆଇନ ଅନୁଯାୟୀ, ଭାରତୀୟ ନାଗରିକତା ଚାହୁଁଥିବା ପ୍ରତ୍ୟେକ ବ୍ୟକ୍ତିଙ୍କୁ ଜିଲ୍ଲା କଲେକ୍ଟରଙ୍କ ସମ୍ମୁଖରେ ଭାରତର ସମ୍ବିଧାନ ପ୍ରତି ନିଷ୍ଠାର ଶପଥ ନେବାକୁ ପଡିଥାଏ । ମହାଲକ୍ଷ୍ମମ୍ମା ମଧ୍ୟ ଏହି ଶପଥ ନେଇଥିଲେ । ଶପଥ ଗ୍ରହଣ କରିବା ପରେ, ଫର୍ମ III ଏବଂ ଫର୍ମ VIIକୁ ଗୃହ ମନ୍ତ୍ରଣାଳୟକୁ ପଠାଯାଇଛି ।

ସୌଜନ୍ୟ Prameya News7