E-20 Petrol Implementation: ଇ-୨୦ ପେଟ୍ରୋଲ୍ କାର୍ଯ୍ୟକାରିତାର ପୁନର୍ବିଚାର ଦାବି, ଗ୍ରାହକଙ୍କ ଆକ୍ରୋଶର ଶିକାର ହେଉଛନ୍ତି ଡିଲର ସଂଘ
ଇ-୨୦ ପେଟ୍ରୋଲ୍ରେ ଅଧିକ ଇଥାନଲ ମିଶ୍ରଣ ଯୋଗୁଁ ଗାଡ଼ିରେ ଯାନ୍ତ୍ରିକ ସମସ୍ୟା ଦେଖାଦେଉଥିବା ଅଭିଯୋଗ କରିଛନ୍ତି ପେଟ୍ରୋଲିୟମ ଡିଲର ସଂଘ। ଏହାର କାର୍ଯ୍ୟକାରିତାକୁ ନେଇ ସରକାର ପୁନର୍ବିଚାର କରନ୍ତୁ ବୋଲି ସଂଘ ଦାବି କରିଛି।
ନୂଆଦିଲ୍ଲୀ:ଇଥାନଲ ମିଶ୍ରିତ ‘ଇ-୨୦’ ପେଟ୍ରୋଲର ବ୍ୟବହାରକୁ ନେଇ ପେଟ୍ରୋଲିୟମ ଡିଲରମାନଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇଛି। ଏହି ପେଟ୍ରୋଲର କାର୍ଯ୍ୟକାରିତାକୁ ନେଇ ପୁନର୍ବିଚାର କରିବାକୁ ସର୍ବଭାରତୀୟ ପେଟ୍ରୋଲିୟମ ଡିଲର ସଂଘ ଦାବି କରିଛି।
ଇ-୨୦ ପେଟ୍ରୋଲ ଯୋଗୁଁ ଗାଡ଼ିର କାର୍ବୋରେଟର ଏବଂ ଅନ୍ୟାନ୍ୟ ଯାନ୍ତ୍ରିକ ଅଂଶରେ ସମସ୍ୟା ଦେଖାଦେଉଥିବା ଗ୍ରାହକମାନେ ଅଭିଯୋଗ କରୁଛନ୍ତି। ବଜାରରେ ଥିବା ଅଧିକାଂଶ ଗାଡ଼ି ଏହି ଇନ୍ଧନ ବ୍ୟବହାର ପାଇଁ ଡିଜାଇନ୍ ହୋଇନାହିଁ। ତେଲ ଟାଙ୍କିଗୁଡ଼ିକରେ ଇଥାନଲ ମିଶ୍ରଣ କାରଣରୁ ପରିଚାଳନାଗତ ଜଟିଳତା ଦେଖାଦେଉଛି। ଗାଡ଼ିରେ ସମସ୍ୟା ଦେଖାଦେଲେ ଗ୍ରାହକମାନେ ପେଟ୍ରୋଲ ପମ୍ପ କର୍ମଚାରୀ ଏବଂ ମାଲିକଙ୍କ ଉପରେ ରାଗିବା ସହ ହଙ୍ଗାମା କରୁଛନ୍ତି। ଡିଲରମାନେ କହିଛନ୍ତି ଯେ ଇନ୍ଧନ ନୀତି ନିର୍ଦ୍ଧାରଣରେ ସେମାନଙ୍କର କୌଣସି ଭୂମିକା ନ ଥିଲେ ମଧ୍ୟ ସେମାନଙ୍କୁ ତୃଣମୂଳ ସ୍ତରରେ ସବୁ ସମସ୍ୟାର ସାମ୍ନା କରିବାକୁ ପଡ଼ୁଛି।
ପେଟ୍ରୋଲିୟମ ଡିଲର ଆସୋସିଏସନର ସଭାପତି କହିଛନ୍ତି, ଅନ୍ୟ ଦେଶଗୁଡ଼ିକରେ ଇଥାନଲ ମିଶ୍ରଣ ସାଧାରଣତଃ ୧୦% ସୀମିତ ରହିଥିବାବେଳେ ଭାରତରେ ୨୦% ମିଶ୍ରଣ ନିଷ୍ପତ୍ତିକୁ ପୁନର୍ବିଚାର କରାଯିବା ଆବଶ୍ୟକ। ସରକାର ଇନ୍ଧନ ଆମଦାନି ଉପରେ ନିର୍ଭରଶୀଳତା କମାଇବା ପାଇଁ ଏହି ପଦକ୍ଷେପ ନେଇଥିଲେ ମଧ୍ୟ ଏହା ବ୍ୟବହାରକାରୀଙ୍କ ପାଇଁ କଷ୍ଟକର ସାବ୍ୟସ୍ତ ହେଉଛି।
ଅପରପକ୍ଷରେ, ବିଭିନ୍ନ ଅଟୋମୋବାଇଲ କମ୍ପାନି ଏବଂ ଶିଳ୍ପ ବିଶେଷଜ୍ଞମାନେ ଇ-୨୦ ପେଟ୍ରୋଲ ସପକ୍ଷରେ ମତ ଦେଇଛନ୍ତି। ସେମାନଙ୍କ କହିବାନୁସାରେ, ଏହି ଇନ୍ଧନ ବ୍ୟବହାର ପାଇଁ ଅନୁକୂଳ ଗାଡ଼ିଗୁଡ଼ିକୁ ଏକାଧିକ ପର୍ଯ୍ୟାୟରେ ପରୀକ୍ଷା କରାଯାଇଛି ଏବଂ ଏହା ସମ୍ପୂର୍ଣ୍ଣ ସୁରକ୍ଷିତ।
ସରକାର ଇ-୨୦ ଇନ୍ଧନ ବ୍ୟବହାରକୁ ଉତ୍ସାହିତ କରୁଥିବା ବେଳେ ଡିଲରମାନଙ୍କର ଏହି ଅଭିଯୋଗ ନୀତି ନିର୍ଦ୍ଧାରକଙ୍କ ପାଇଁ ଏକ ବଡ଼ ଆହ୍ୱାନ ସୃଷ୍ଟି କରିଛି।
ସୌଜନ୍ୟ Prameya News7
