Janaushadhi Sugam App: ୮୦% ପର୍ଯ୍ୟନ୍ତ ଶସ୍ତାରେ ମିଳିବ ଔଷଧ, ଗୁଣବତ୍ତାର ଗ୍ୟାରେଣ୍ଟି; ଆସିଲା ନୂଆ ସରକାରୀ ଆପ୍!
ନୂଆଦିଲ୍ଲୀ, ୧୯।୮: ଦିନକୁ ଦିନ ଔଷଧ ଖର୍ଚ୍ଚ ବଢ଼ିବାରେ ଲାଗିଛି । କିନ୍ତୁ ବର୍ତ୍ତମାନ ଆପଣଙ୍କୁ ମହଙ୍ଗା ଔଷଧ କିଣିବାକୁ ପଡ଼ିବ ନାହିଁ, ବରଂ ଘରେ ବସି ସହଜରେ ସଞ୍ଚୟ କରିପାରିବେ । ସରକାରୀ ସ୍ତରରେ ପ୍ରସ୍ତୁତ ଏକ ବିଶେଷ ମୋବାଇଲ୍ ଆପ୍ ଜରିଆରେ ବର୍ତ୍ତମାନ ଖୁବ୍ କମ୍ ଖର୍ଚ୍ଚରେ ଭଲ ମାନର ଜେନେରିକ୍ ଔଷଧ ପାଇପାରିବେ । ଏହି ସରକାରୀ ଆପ୍ ଜିପିଏସ୍ ଏବଂ ଗୁଗଲ୍ ମ୍ୟାପ୍ର ବ୍ୟବହାର କରି ଆପଣଙ୍କ ସବୁଠାରୁ ନିକଟବର୍ତ୍ତୀ ‘ପ୍ରଧାନମନ୍ତ୍ରୀ ଭାରତୀୟ ଜନଔଷଧି କେନ୍ଦ୍ର’ ର ସଠିକ୍ ଠିକଣା ଏବଂ ବାଟ ଦେଖାଇବ । ଆପଣ ଏହି ଆପ୍ ମାଧ୍ୟମରେ କୌଣସି ନିର୍ଦ୍ଦିଷ୍ଟ ରୋଗ କିମ୍ବା ଔଷଧର ସଲ୍ଟ ଯେପରିକି ପାରାସିଟାମଲ୍ ଟାଇପ୍ କରି ସରକାରୀ ଦୋକାନରେ ତାହା ଉପଲବ୍ଧ ଅଛି କି ନାହିଁ, ତାହା ମଧ୍ୟ ଯାଞ୍ଚ କରିପାରିବେ ।
ବ୍ରାଣ୍ଡେଡ୍ ଔଷଧଠାରୁ ୫୦% ରୁ ୯୦% ପର୍ଯ୍ୟନ୍ତ ଶସ୍ତା:
ଏହି ଆପ୍ରେ ଆଉ ଏକ ଆକର୍ଷକ ଫିଚର୍ ରହିଛି, ଯାହା ଜରିଆରେ ଆପଣ ଜାଣିପାରିବେ ଯେ ବଜାରରେ ମିଳୁଥିବା ମହଙ୍ଗା ବ୍ରାଣ୍ଡେଡ୍ ଔଷଧ ତୁଳନାରେ ଜନଔଷଧିର ଜେନେରିକ୍ ଔଷଧ କେତେ ଶସ୍ତା ଏବଂ ଆପଣ କେତେ ଟଙ୍କା ସଞ୍ଚୟ କରୁଛନ୍ତି । ଏହି ଆପ୍ ଜରିଆରେ ମିଳୁଥିବା ଔଷଧଗୁଡ଼ିକ ବଜାରର ସାଧାରଣ ଔଷଧ ତୁଳନାରେ ୫୦% ରୁ ୯୦% ପର୍ଯ୍ୟନ୍ତ ଶସ୍ତା ହୋଇଥାଏ । ଏହାଦ୍ୱାରା ପରିବାରର ମାସିକ ଔଷଧ ଖର୍ଚ୍ଚ ପ୍ରାୟତଃ ଅଧାରୁ ଅଧିକ କମିଯିବ ।
ଗୁଣାତ୍ମକ ମାନ ଏବଂ ସୁରକ୍ଷା ନେଇ ସମ୍ପୂର୍ଣ୍ଣ ଭରସା:
ଶସ୍ତା ହେଲେ ମଧ୍ୟ ଏହାର ଗୁଣବତ୍ତା ନେଇ ଆଶଙ୍କା କରିବାର କୌଣସି କାରଣ ନାହିଁ । ଆପ୍ ଭିତରେ ଔଷଧଗୁଡ଼ିକର ଲାବୋରେଟୋରୀ ଟେଷ୍ଟିଂ ଏବଂ ଗୁଣବତ୍ତା (WHO-GMP Certified) ସମ୍ବନ୍ଧୀୟ ସମସ୍ତ ସୂଚନା ଉପଲବ୍ଧ ଥାଏ । ଏହା ଏକ ସରକାରୀ ପରିଚାଳିତ ଆପ୍ ହୋଇଥିବାରୁ ଏଠାରେ ମିଳୁଥିବା ଔଷଧର ଦର ଏବଂ ଗୁଣବତ୍ତା ସମ୍ପୂର୍ଣ୍ଣ ନିର୍ଭରଯୋଗ୍ୟ ।
ଆପ୍ କିପରି ଏବଂ କେଉଁଠାରୁ ପାଇବେ ?
ଆପଣ ଏହି ଉପଯୋଗୀ ଆପ୍କୁ ସିଧାସଳଖ ଗୁଗୁଲ୍ ପ୍ଲେ ଷ୍ଟୋର୍ କିମ୍ବା ଆପଲ୍ ଆପ୍ ଷ୍ଟୋର୍ରୁ ଡାଉନଲୋଡ୍ କରିପାରିବେ । ଏହା ବ୍ୟତୀତ ଆପଣ ଚାହିଁଲେ କେନ୍ଦ୍ର ସରକାରଙ୍କ ଅଫିସିଆଲ୍ ଉମଙ୍ଗ ଆପ୍ ଜରିଆ ମଧ୍ୟ ଏହାକୁ ସହଜରେ ବ୍ୟବହାର କରିପାରିବେ
ସୌଜନ୍ୟ ପ୍ରମେୟ
