ରାଉରକେଲା,୨୨\୯(ସୁଜ୍ଞାନୀ ରାୟ) : ଗଣପର୍ବ ‘କରମା’କୁ ନେଇ ଉତ୍ସବମୁଖର ଆଦିବାସୀ ପଡ଼ା । ଉଜ୍ଜୀବିତ ହୋଇଛି ପ୍ରକୃତି ପୂଜାର ଅନନ୍ୟ ପରମ୍ପରା । ସୁଦୃଢ଼ ହୋଇଛି ଭାଇ-ଭଉଣୀଙ୍କ ପବିତ୍ର ସମ୍ପର୍କ । ମାଦଳର ତାଳେତାଳେ ନାଚଗୀତରେ ଜନଜାତି ସମ୍ପ୍ରଦାୟର ଆବାଳ ବୃଦ୍ଧ ବନିତା ମତୁଆଲା ହୋଇ ଉଠିଛନ୍ତି । ପ୍ରକୃତିର ଉପାସନା ଏବଂ ସାମାଜିକ ସମ୍ପର୍କର ମୂକସାକ୍ଷୀ ଏହି ପର୍ବ ପାଇଁ ସମଗ୍ର ସୁନ୍ଦରଗଡ଼ ଜିଲ୍ଲା ଉଠୁଛି ପଡୁଛି । ପ୍ରକୃତି ପ୍ରତି ସମର୍ପଣ, ଭଲ ଫସଲ ଏବଂ ଭାଇ-ଭଉଣୀଙ୍କ ପବିତ୍ର ସମ୍ପର୍କର ଧାରାକୁ ବଜାୟ ରଖିବା ଉଦ୍ଦେଶ୍ୟରେ ପାଳିତ ହେଉଛି କର୍ମା ପୂଜା ।
ଆଦିବାସୀ ଅଧ୍ୟୁଷିତ ସୁନ୍ଦରଗଡ଼ ଜିଲ୍ଲାର ଓରାମ, ମୁଣ୍ଡା, ଖଡ଼ିଆ, କିଷାନ, ଭୂୟାଁ, କୁଡୁମୀ, ସାନ୍ତାଳୀ ସମ୍ପ୍ରଦାୟର ଏହା ଗଣପର୍ବ । ପ୍ରତିବର୍ଷ ଭାଦ୍ରବ ମାସ ଶୁକ୍ଳପକ୍ଷ ଏକାଦଶୀ ତିଥି (ଚଳିତବର୍ଷ ସେପ୍ଟେମ୍ବର ୨୨)ରେ ମୁଖ୍ୟପୂଜା ଆୟୋଜିତ ହେଉଛି । କିନ୍ତୁ ଏହାର ଯଥେଷ୍ଟ ପୂର୍ବରୁ ଆରମ୍ଭ ହୋଇଯାଏ ପ୍ରସ୍ତୁତି । କରମା ପୂଜାର ନିର୍ଦ୍ଦିଷ୍ଟ ନୀତିନିୟମ ରହିଛି । ଭାଦ୍ରବ ପଞ୍ଚମୀ ତିଥିରେ ଅବିବାହିତା କନ୍ୟାମାନେ ନଦୀ ତୁଠରୁ ବାଲି ଆଣି ଘର ଭିତରେ ଅନ୍ଧାରୁଆ ସ୍ଥାନରେ ରଖିଥାଆନ୍ତି । ବାଲିରେ ୭ ପ୍ରକାର ଶସ୍ୟର ବୀଜ ପୋତା ଯାଏ । ପ୍ରତିଦିନ ସକାଳେ ଝିଅମାନେ ନିତ୍ୟକର୍ମ ସାରି ସେଠାରେ ପୂଜା କରନ୍ତି ଓ ହଳଦୀ ପାଣି ସିଞ୍ଚନ କରନ୍ତି । ଅଙ୍କୁରିତ ହୋଇଥିବା ବୀଜକୁ ‘ଜାୱା ଫୁଲ’ କୁହାଯାଏ । ସମ୍ପ୍ରଦାୟର ଦେବତା ଧର୍ମେଶଙ୍କ ପ୍ରତୀକ ଭାବେ କରମା ଗଛ ଡାଳ ଆଣି ପୂଜାରେ ସାମିଲ ଝିଅମାନେ ଆଖଡ଼ା ଘରେ ସ୍ଥାପନ କରନ୍ତି । ପାହାନା (ଆଦିବାସୀ ପୂଜକ)ଙ୍କ ଦ୍ୱାରା ସେଠାରେ ପୂଜା କରାଯାଇଥାଏ । କରମା ପୂଜା ସମୟରେ ‘ଜାୱା ଫୁଲ’କୁ ଭୋଗ ଭାବେ ଅର୍ପଣ କରାଯାଏ । ଏହାପରେ ‘କରମା ଓ ଧରମା’ ଦୁଇ ଭାଇଙ୍କ ପୌରାଣିକ କଥା ପାହାନା ଶୁଣାଇଥାନ୍ତି ।
ସୌଜନ୍ୟ ପ୍ରମେୟ
