ମହାକାଶ ଏବଂ ପ୍ରତିରକ୍ଷା ଜଗତରେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଛନ୍ତି ଓଡ଼ିଶାର ଯୁବ ପ୍ରତିଭା ବୋଧିସତ୍ତ୍ବ ସଂଘପ୍ରିୟ । ପିଲାଦିନେ ଲ୍ୟାବ୍ରେ ପ୍ରବେଶ ବାର୍ଷିକ ହୋଇଥିବା ଏହି ପୁଅ ଆଜି ଦେଶର ପ୍ରତିରକ୍ଷା ପ୍ରତିଷ୍ଠାନ ପାଇଁ ଡ୍ରୋନ୍ ନିର୍ମାଣ କରୁଛନ୍ତି । ୧୯୯୬ ମସିହାରେ ଭଦ୍ରକ ଜିଲ୍ଲାରେ ବୋଧିସତ୍ତ୍ବଙ୍କ ଜନ୍ମ । ତାଙ୍କ ବାପା ଜଣେ ଶିକ୍ଷକ ଥିଲେ ଏବଂ ଘରେ ଏକ ବିଜ୍ଞାନ କ୍ଲବ୍ ଚଲାଉଥିଲେ । ଏହା ଦ୍ବାରା ବୋଧିସତ୍ତ୍ବ ପିଲାଦିନୁ ବର୍ଜ୍ୟ ଇଲେକ୍ଟ୍ରୋନିକ୍ସ ସାମଗ୍ରୀ ଏବଂ ବିଜ୍ଞାନ ପରୀକ୍ଷା ସହ ଜଡ଼ିତ ହେବାର ସୁଯୋଗ ପାଇଥିଲେ । ଗ୍ରାମରେ ବନ୍ୟା ଏବଂ ବାତ୍ୟା ସମୟରେ ସଠିକ୍ ସମୟରେ ଖବର ପହଞ୍ଚୁ ନଥିବାରୁ, ମାତ୍ର ୬ ବର୍ଷ ବୟସରେ ବୋଧିସତ୍ତ୍ବ ସାଙ୍ଗମାନଙ୍କ ସହ ମିଶି ପୁରୁଣା ଇଲେକ୍ଟ୍ରୋନିକ୍ସ ପାର୍ଟସରୁ ଏକ କମ୍ୟୁନିଟି ରେଡିଓ ଷ୍ଟେସନ ତିଆରି କରିଥିଲେ ।
ପରବର୍ତ୍ତୀ ସମୟରେ ପୋକ ଆକ୍ରମଣରୁ ଫସଲ ରକ୍ଷା ପାଇଁ ପାରମ୍ପରିକ ଜ୍ଞାନକୁ ବ୍ୟବହାର କରି ଏକ ଜୈବିକ ଔଷଧ ମଧ୍ୟ ପ୍ରସ୍ତୁତ କରିଥିଲେ । ବୁର୍ଲା ସ୍ଥିତ ‘ବୀର ସୁରେନ୍ଦ୍ର ସାଏ ପ୍ରଯୁକ୍ତି ବିଦ୍ୟା ବିଶ୍ୱବିଦ୍ୟାଳୟ’ ରେ ଇଞ୍ଜିନିୟରିଂ ପଢ଼ୁଥିବା ସମୟରେ ବୋଧିସତ୍ତ୍ବ ରୋବୋଟିକ୍ସ ଏବଂ କୋଡିଂ କ୍ଲବ୍ରେ ସକ୍ରିୟ ଥିଲେ । ସେ ସ୍ମାର୍ଟୱାଚ୍, ଜଳ ନିୟନ୍ତ୍ରଣ ଯନ୍ତ୍ର ଏବଂ ବ୍ୟାଡମିଣ୍ଟନ୍ ଖେଳୁଥିବା ରୋବୋଟ୍ ଭଳି ବିଭିନ୍ନ ପ୍ରୋଜେକ୍ଟ କରିଥିଲେ । ଯେତେବେଳେ ସେ ଏକ ରକେଟ୍ ତିଆରି କରିବାକୁ ପ୍ରସ୍ତାବ ଦେଲେ, ସେତେବେଳେ ବିଶ୍ୱବିଦ୍ୟାଳୟର ଭାଇସ୍-ଚାନ୍ସେଲର ଏହାକୁ ହାଲୁକା ଭାବେ ନେଇ ହସି ଦେଇଥିଲେ । କାରଣ କଲେଜର ବାର୍ଷିକ ବଜେଟ୍ ଥିଲା ପ୍ରାୟ ୯୦ ଲକ୍ଷ ଟଙ୍କା, ଆଉ ଛାତ୍ର ଜଣକ ମାଗୁଥିଲେ ୧୫ କୋଟି ଟଙ୍କା ।
ସୌଜନ୍ୟ ପ୍ରମେୟ
