ମୁମ୍ବାଇ,୧୦।୧୧: ମହାରାଷ୍ଟ୍ରର ନାଗପୁରରୁ ଚୋରିର ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଦାମୀ iPhone କିଣିବାର ସଉକ ପୂରଣ କରିବା ପାଇଁ ଜଣେ ବୋହୂ ନିଜ ଶାଶୂଙ୍କ ସୁନା ଗହଣା ଚୋରି କରିଥିବା ଅଭିଯୋଗ ହୋଇଛି। ଆଲମାରିରେ ରଖାଯାଇଥିବା ୫୩ ଗ୍ରାମ ସୁନା ଗହଣା ଚୋରି କରି ବୋହୂ ତାହାକୁ ବିକ୍ରି କରିଦେଇଥିଲେ। ଗହଣା ବିକ୍ରିରୁ ମିଳିଥିବା ଟଙ୍କାରେ ସେ ଏକ ଆପଲ iPhone କିଣିଥିବା ଅଭିଯୋଗ ହୋଇଛି। ଘଟଣା ସାମ୍ନାକୁ ଆସିବା ପରେ ପରିବାରରେ ହଇଚଇ ସୃଷ୍ଟି ହୋଇଛି। ଶାଶୂଙ୍କ ଅଭିଯୋଗ ଆଧାରରେ ଶାନ୍ତିନଗର ପୋଲିସ ବୋହୂଙ୍କ ବିରୋଧରେ ମାମଲା ରୁଜୁ କରିଛି।
ଏହି ଘଟଣା ନାଗପୁରର ଶାନ୍ତିନଗର ପୋଲିସ ଥାନା ଅଞ୍ଚଳରେ ଘଟିଛି। ଅଭିଯୋଗକାରିଣୀ ରାଧା ବର୍ମା ଶିରିଡି ଯାତ୍ରାରେ ଯିବା ପାଇଁ ପ୍ରସ୍ତୁତି କରୁଥିଲେ। ଏହି ସମୟରେ ସେ ଯାତ୍ରା ପାଇଁ ନିଜର ସୁନା ଗହଣା ବାହାର କରିବାକୁ ଚିନ୍ତା କରିଥିଲେ। ତେବେ ଆଲମାରିରେ ଥିବା ଲକର୍ ଖୋଲିବା ପରେ ସେଠାରୁ ସୁନା ଗହଣା ଗାଏବ ଥିବା ଦେଖିବାକୁ ପାଇଥିଲେ। ଲକରରେ ରଖାଯାଇଥିବା ପ୍ରାୟ ୫୩ ଗ୍ରାମ ସୁନା ଗହଣା ନପାଇ ରାଧା ବର୍ମା ଚିନ୍ତିତ ହୋଇପଡ଼ିଥିଲେ। ସେ ଘରର ସବୁ ସ୍ଥାନରେ ଗହଣା ଖୋଜାଖୋଜି କରିଥିଲେ ମଧ୍ୟ କୌଣସି ପତ୍ତା ପାଇନଥିଲେ। ଏହାପରେ ଘରର କୌଣସି ସଦସ୍ୟଙ୍କ ଉପରେ ତାଙ୍କର ସନ୍ଦେହ ହୋଇଥିଲା।
ଗହଣା ଗାଏବ ହେବା ପରେ ରାଧା ବର୍ମା ନିଜ ବୋହୂ ଗ୍ରନ୍ଥାଳୀ ଆକାଶ ବର୍ମାଙ୍କ ଉପରେ ସନ୍ଦେହ କରିଥିଲେ। କୁହାଯାଉଛି ଯେ, ଏହା ପୂର୍ବରୁ ମଧ୍ୟ ବୋହୂଙ୍କ ବିରୋଧରେ ଚୋରି ମାମଲା ରୁଜୁ ହୋଇଥିଲା। ଏହି କାରଣରୁ ଶାଶୂଙ୍କ ସନ୍ଦେହ ଆହୁରି ଘନୀଭୂତ ହୋଇଥିଲା।
ଏହାପରେ ରାଧା ବର୍ମା ବୋହୂଙ୍କୁ ଗହଣା ସମ୍ପର୍କରେ ପଚରାଉଚରା କରିଥିଲେ। ଅଭିଯୋଗ ଅନୁସାରେ, ପ୍ରଥମେ ବୋହୂ କଥାକୁ ଏଡ଼ାଇ ଯାଇଥିଲେ। କିନ୍ତୁ ପରେ କଥିତ ଭାବେ ଗହଣା ଚୋରି କରିଥିବା ସ୍ବୀକାର କରିଥିଲେ। ଏଥିସହ ଖୁବଶୀଘ୍ର ଶାଶୂଙ୍କ ଗହଣା ଫେରାଇଦେବେ ବୋଲି ଭରସା ଦେଇଥିଲେ।
ତେବେ ଶାଶୂ ବାରମ୍ବାର ଗହଣା ଫେରାଇବାକୁ କହିଥିଲେ ମଧ୍ୟ ବୋହୂ ତାହା ଫେରାଇନଥିଲେ। ଦୀର୍ଘ ସମୟ ଅପେକ୍ଷା କରିବା ପରେ ମଧ୍ୟ ଗହଣା ନମିଳିବାରୁ ଶେଷରେ ରାଧା ବର୍ମା ପୋଲିସର ଦ୍ୱାରସ୍ଥ ହେବାକୁ ନିଷ୍ପତ୍ତି ନେଇଥିଲେ।
ପୋଲିସରେ ଅଭିଯୋଗ ଦାଖଲ ହେବା ପରେ ଘଟଣାର ତଦନ୍ତ ଆରମ୍ଭ ହୋଇଥିଲା। ପୋଲିସର ପଚରାଉଚରା ବେଳେ କଥିତ ଭାବେ ଜଣାପଡ଼ିଥିଲା ଯେ, ଗ୍ରନ୍ଥାଳୀ ଚୋରି କରିଥିବା ସୁନା ଗହଣାକୁ ବିକ୍ରି କରିଦେଇଥିଲେ। ସେଥିରୁ ମିଳିଥିବା ଟଙ୍କାରେ ସେ ଏକ ଦାମୀ ଆପଲ iPhone କିଣିଥିଲେ।
ଏହି ଖୁଲାସା ପରେ ପରିବାରର ସଦସ୍ୟମାନେ ମଧ୍ୟ ଆଶ୍ଚର୍ଯ୍ୟ ହୋଇଯାଇଥିଲେ। ପରିବାରର ଜଣେ ସଦସ୍ୟ ଭାବେ ଯାହାଙ୍କ ଉପରେ ଭରସା କରାଯାଇଥିଲା, ସେହି ବୋହୂଙ୍କ ବିରୋଧରେ ଶାଶୂଙ୍କ ଜୀବନବ୍ୟାପୀ ସଞ୍ଚିତ ସମ୍ପତ୍ତି ଚୋରି କରିଥିବା ଅଭିଯୋଗ ଆସିଛି।
ବର୍ତ୍ତମାନ ଶାନ୍ତିନଗର ପୋଲିସ ରାଧା ବର୍ମାଙ୍କ ଅଭିଯୋଗ ଆଧାରରେ ମାମଲା ରୁଜୁ କରିଛି। ୫୩ ଗ୍ରାମ ସୁନା ଗହଣା କେଉଁଠାରେ ବିକ୍ରି କରାଯାଇଥିଲା, ତାହା ବିକ୍ରି କରି କେତେ ଟଙ୍କା ମିଳିଥିଲା ଏବଂ ସେହି ଟଙ୍କାରେ କିଣାଯାଇଥିବା ମୋବାଇଲର ମଧ୍ୟ ତଦନ୍ତ କରୁଛି ପୋଲିସ। ଏହି ଘଟଣାରେ ଆଗକୁ ତଦନ୍ତ ଜାରି ରହିଛି।
ସୌଜନ୍ୟ ଧରିତ୍ରୀ
