Bargarh Lightning Strike: ବରଗଡ଼ରେ ବଜ୍ରପାତ ନେଲା ପୁଣି ଦୁଇ ଜୀବନ
ବରଗଡ଼ ଜିଲ୍ଲାର ସୋହେଲା ଓ କଟାପାଲି ଅଞ୍ଚଳରେ ପୃଥକ୍ ବଜ୍ରପାତ ଘଟଣାରେ ଜଣେ ଚାଷୀ ଓ ଜଣେ ମହିଳା ଶ୍ରମିକଙ୍କ ମୃତ୍ୟୁ ହୋଇଛି। ଏହାକୁ ମିଶାଇ ୨୪ ଘଣ୍ଟାରେ ବଜ୍ରପାତରେ ବରଗଡ଼ରେ ୪ ଜଣଙ୍କ ଜୀବନ ଯାଇଛି।
ବରଗଡ଼/ସୋହେଲା: ବରଗଡ଼ ଜିଲ୍ଲାରେ ଆଜି (ଶୁକ୍ରବାର) ବ୍ରଜପାତ ଘଟି ପୁଣି ଦୁଇଜଣଙ୍କ ଜୀବନ ଯାଇଛି। ମୃତକମାନେ ହେଲେ ସୋହେଲା ପଧାନପାଲି ଗ୍ରାମର ସୁରେଶ ପଧାନ(୫୦) ଓ ବରଗଡ଼ ଟାଉନ୍ ଥାନା କଟାପାଲି ଗ୍ରାମର ଦେବକୀ ଗରିୟା(୪୦)। ପୁଲିସ ମୃତଦେହ ଜବତ କରି ଦୁଇଟି ପୃଥକ୍ ମାମଲା ରୁଜୁ କରି ବ୍ୟବଚ୍ଛେଦ ପାଇଁ ପଠାଇଛି। ଏହାକୁ ମିଶାଇ ଗତ ୨୪ ଘଣ୍ଟାରେ ବଜ୍ରପାତରେ ବରଗଡ଼ ଜିଲ୍ଲାରେ ୪ଜଣଙ୍କ ମୃତ୍ୟୁ ହୋଇଛି।
ସୂଚନା ଅନୁସାରେ, ସୁରେଶ ଜଣେ ଚାଷୀ ହୋଇଥିବା ବେଳେ ସେ ଶୁକ୍ରବାର ମଧ୍ୟାହ୍ନରେ ଚାଷଜମିରେ କାମ କରୁଥିଲେ। ଏହି ସମୟରେ ହଠାତ୍ ଘଡ଼ଘଡ଼ି ସହ ବଜ୍ରପାତ ହୋଇଥିଲା। ବଜ୍ରାଘାତରେ ସେ ବିଲରେ ହିଁ ଟଳି ପଡ଼ିଥିଲେ। ଅନ୍ୟମାନେ ତାଙ୍କୁ ଉଦ୍ଧାର କରି ଡାକ୍ତରଖାନା ନେଇଥିଲେ। ଡାକ୍ତର ତାଙ୍କୁ ମୃତ ଘୋଷଣା କରିଥିଲା। ପରିବାରବର୍ଗଙ୍କ ଇଚ୍ଛା କ୍ରମେ ତାଙ୍କର ଚକ୍ଷୁଦାନ କରାଯାଇଛି। ଖବର ପାଇ ରାଜ୍ୟ ବିଜେଡି ଉପସଭାପତି ସୁବ୍ରତ ସିଂ ସୋହେଲା ମେଡିକାଲରେ ପହଞ୍ଚି ମୃତକଙ୍କ ପରିବାରବର୍ଗଙ୍କୁ ସାକ୍ଷାତ କରି ସମବେଦନା ଜ୍ଞାପନ କରିଥିଲେ।
ସେହିପରି କଟାପାଲିର ସୁଶାନ୍ତ ଗରିୟାଙ୍କ ପତ୍ନୀ ଦେବକୀ ଅପରାହ୍ଣରେ ଏକ ଚାଷ ଜମିରେ ମୁଲିଆ ଭାବେ କାମ କରୁଥିଲେ। ଏହି ସମୟରେ ବ୍ରଜପାତ ଘଟିଥିଲା। ଫଳରେ ସେ ବିଲରେ ପଡ଼ି ଯାଇଥିଲେ। ତାଙ୍କୁ ଅନ୍ୟମାନେ ଉଦ୍ଧାର କରି ବରଗଡ଼ ମୁଖ୍ୟ ଚିକିତ୍ସାଳୟକୁ ନେଇଥିଲେ। ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ସୂଚନାଯୋଗ୍ୟ, ଗତକାଲି (ଗୁରୁବାର) ମଧ୍ୟ ସୋହେଲା ଅଞ୍ଚଳରେ ବଜ୍ରପାତରେ ଦୁଇଜଣ ମହିଳାଙ୍କ ମୃତ୍ୟୁ ଘଟିଥିଲା।
ସୌଜନ୍ୟ ସମ୍ବାଦ
