Tamil Nadu: ପରାଜୟ ପରେ ଜନସାଧାରଣଙ୍କ ଉଦ୍ଦେଶ୍ୟରେ ଭାବପ୍ରବଣ ଚିଠି ଲେଖିଲେ ମୁଖ୍ୟମନ୍ତ୍ରୀ ଷ୍ଟାଲିନ
ଚେନ୍ନାଇ: ବିଧାନସଭା ନିର୍ବାଚନ ଫଳାଫଳ ପରେ ଦ୍ରାବିଡ ମୁନେତ୍ର କାଝଗମ (ଡିଏମ୍କେ) ମୁଖ୍ୟ ତଥା ତାମିଲନାଡୁ ମୁଖ୍ୟମନ୍ତ୍ରୀ ଏମ୍କେ ଷ୍ଟାଲିନ ଜନସାଧାରଣଙ୍କୁ ଏକ ଭାବପ୍ରବଣ ଚିଠି ଲେଖିଛନ୍ତି। ସେ ଧର୍ମନିରପେକ୍ଷ ପ୍ରଗତିଶୀଳ ମେଣ୍ଟର ପ୍ରାର୍ଥୀଙ୍କ ଉପରେ ଭରସା ରଖିଥିବା ତାମିଲନାଡୁର ସମସ୍ତ ଭୋଟରଙ୍କୁ ଧନ୍ୟବାଦ ଜଣାଇଛନ୍ତି। ଷ୍ଟାଲିନ୍ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ କହିଛନ୍ତି, ତାଙ୍କୁ ମିଳିଥିବା ପ୍ରତ୍ୟେକ ଭୋଟ୍ ଜନସାଧାରଣଙ୍କ ବିଶ୍ୱାସର ଏକ ମୂଲ୍ୟବାନ ପ୍ରତୀକ। ସେ କହିଛନ୍ତି, ଭୋଟ୍ ଗଣତି ଅନୁସାରେ, ଡିଏମ୍କେ ମେଣ୍ଟକୁ ମୋଟ ୧ କୋଟି ୫୪ ଲକ୍ଷ ୮୨ ହଜାର ୭୮୨ ଭୋଟ୍ ମିଳିଛି। ଏଥିପାଇଁ ସେ ସମସ୍ତ ଭୋଟରଙ୍କୁ ହୃଦୟରୁ କୃତଜ୍ଞତା ଜଣାଉଛନ୍ତି।
ସେ ଏହା ମଧ୍ୟ ଦର୍ଶାଇଛନ୍ତି ଯେ, ଅଧିକ ଆସନ ଜିତିଥିବା ଦଳଗୁଡ଼ିକ ଡିଏମ୍କେ ମେଣ୍ଟ ତୁଳନାରେ ମାତ୍ର ୧୭.୪୩ ଲକ୍ଷ ଅଧିକ ଭୋଟ ପାଇଛନ୍ତି। ଉଭୟଙ୍କ ମଧ୍ୟରେ ଭୋଟ ପ୍ରତିଶତର ପାର୍ଥକ୍ୟ ମାତ୍ର ୩.୫୨ ପ୍ରତିଶତ। ଷ୍ଟାଲିନ କହିଛନ୍ତି, ଏହା ସୂଚାଇ ଦେଉଛି ଯେ ଡିଏମ୍କେ ପ୍ରତି ଜନସାଧାରଣଙ୍କ ବିଶ୍ୱାସ ଏବେ ବି ରହିଛି।
ଷ୍ଟାଲିନ ତାଙ୍କ ଦଳର ସମସ୍ତ ବିଜୟୀ ପ୍ରାର୍ଥୀଙ୍କୁ ତୁରନ୍ତ ନିଜ ନିଜ ନିର୍ବାଚନମଣ୍ଡଳୀକୁ ଫେରି ଜନସାଧାରଣଙ୍କୁ ଭେଟି ଧନ୍ୟବାଦ ଜଣାଇବାକୁ ନିବେଦନ କରିଛନ୍ତି। ସେ କହିଛନ୍ତି ଯେ, ଗଣତନ୍ତ୍ରରେ ଜନସାଧାରଣ ସର୍ବୋଚ୍ଚ ଏବଂ ପ୍ରତ୍ୟେକ ରାଜନୈତିକ ପଦକ୍ଷେପ ଲୋକଙ୍କ ପାଇଁ ହେବା ଉଚିତ। ଦଳର ଇତିହାସ ବିଷୟରେ ଉଲ୍ଲେଖ କରି ସେ କହିଛନ୍ତି ଯେ, ଡିଏମକେ ଛଅ ଥର କ୍ଷମତାରେ ରହିଛି ଏବଂ ବିଜୟ ଏବଂ ପରାଜୟ ଉଭୟ ଅନୁଭବ କରିଛି। ସେ ସ୍ପଷ୍ଟ କରିଛନ୍ତି ପରିସ୍ଥିତି ଯେକୌଣସି ହେଉ ନା କାହିଁକି, ଦଳର ବିଚାରଧାରା ବଜାୟ ରଖିବା ତାଙ୍କର ପ୍ରାଥମିକତା। ସେ କହିଛନ୍ତି, ଦଳର ପ୍ରକୃତ ଶକ୍ତି ସେହି କର୍ମୀମାନଙ୍କଠାରେ ରହିଛି ଯେଉଁମାନେ ବିଜୟ ଏବଂ ପରାଜୟକୁ ସମାନ ଭାବେ ଗ୍ରହଣ କରନ୍ତି ଏବଂ ଦଳର ନୀତି ଅନୁସରଣ କରନ୍ତି।
ଏମକେ ଷ୍ଟାଲିନ ତାଙ୍କ କର୍ମୀମାନଙ୍କୁ ପ୍ରଶଂସା କରି ସେମାନଙ୍କୁ ଆନ୍ଦୋଳନର ଜୀବନ ବୋଲି କହିଛନ୍ତି। ସେ କହିଛନ୍ତି,ଯେପର୍ଯ୍ୟନ୍ତ କର୍ମୀମାନେ ତାଙ୍କ ସହିତ ଅଛନ୍ତି, ସେପର୍ଯ୍ୟନ୍ତ ତାଙ୍କର କୌଣସି ଚିନ୍ତା ନାହିଁ। ସମସ୍ତ କର୍ମୀ ସେମାନଙ୍କ ନେତା କରୁଣାନିଧିଙ୍କ ପ୍ରତି ନିବିଡ଼ ଭାବେ ଜଡିତ। ଦଳ ଏହା ସହିତ ଆଗକୁ ବଢ଼ିବ।
ଦଳକୁ ମିଳିଥିବା ଭୋଟକୁ ଦଳୀୟ କର୍ମୀଙ୍କ କଠିନ ପରିଶ୍ରମର ଫଳ:ଏମ୍କେ ଷ୍ଟାଲିନ
ଦଳକୁ ମିଳିଥିବା ଭୋଟକୁ ସେ ଦଳୀୟ କର୍ମୀଙ୍କ କଠିନ ପରିଶ୍ରମର ଫଳ ବୋଲି କହିଛନ୍ତି। ସେ ଲୋକଙ୍କ ପାଇଁ କାମ କରି ଚାଲିବେ। କ୍ଷମତାରେ ଥିବା ସମୟରେ ଦଳ ଜନ କଲ୍ୟାଣକାରୀ ଯୋଜନା ପ୍ରଣୟନ କରୁଥିଲା। ଏବେ ବିରୋଧୀ ଦଳରେ ରହି ଲୋକଙ୍କ ପାଇଁ ସ୍ୱର ଉତ୍ତୋଳନ କରିବ। ଜନସାଧାରଣଙ୍କ ସମସ୍ୟା ପାଇଁ ଲଢ଼େଇ ଜାରି ରଖିବ।
ଶେଷରେ, ସେ କହିଛନ୍ତି, ପେରିୟାର, ଆନ୍ନା ଏବଂ କରୁଣାନିଧିଙ୍କ ଦ୍ୱାରା ପ୍ରଦର୍ଶିତ ପଥ ଅନୁସରଣ କରି, ଡିଏମ୍କେ ଦ୍ରାବିଡ଼ ଆନ୍ଦୋଳନର ବିଚାରଧାରାକୁ ଆଗକୁ ବଢ଼ାଇବ ଏବଂ ରାଜ୍ୟର ଭାଷା, ସଂସ୍କୃତି ଏବଂ ପରିଚୟକୁ ସୁରକ୍ଷା ପ୍ରଦାନ କରିବ। ଦଳ ପୁଣି ଥରେ ବିଜୟ ହାସଲ କରିବ ବୋଲି ସେ ଆଶା ପ୍ରକଟ କରିଛନ୍ତି।
ସୌଜନ୍ୟ ସମ୍ବାଦ
