ଭୁବନେଶ୍ବର: ଦୁଇ ପୂର୍ବତନ ରଣଜୀ କ୍ରିକେଟର୍ ପ୍ରଶାନ୍ତ ମହାପାତ୍ର ଓ ଶୁଭାଶିଷ ଭୂୟାଁଙ୍କ ସ୍ମୃତିରେ ଆୟୋଜିତ ଖିମ୍ଜୀ କପ୍ ରାଜ୍ୟସ୍ତରୀୟ ବରିଷ୍ଠ କ୍ରିକେଟ୍ ପ୍ରତିଯୋଗିତାରେ ଆୟୋଜକ ମୁକ୍ତେଶ୍ବର କ୍ରିକେଟ୍ କ୍ଲବ୍ ବିଜେତା ହୋଇଛି। ରବିବାର ବିଜେବି କଲେଜ୍ ଗ୍ରାଉଣ୍ଡ୍ରେ ଅନୁଷ୍ଠିତ ଫାଇନାଲ୍ ମ୍ୟାଚ୍ରେ ମୁକ୍ତେଶ୍ବର ରୋମାଞ୍ଚକ ଭାବେ ୧୩ ରନ୍ରେ ପ୍ରଗତି ସ୍ପୋର୍ଟିଂକୁ ପରାସ୍ତ କରିଥିଲା। ଅର୍ସଦା କିଶୋରଙ୍କ ଶତକ ଏବଂ ଆଶୁତୋଷ ମାରାଣ୍ଡି ଓ ଶ୍ରୀରାଜ ପଟ୍ଟନାୟକ ମିଳିତ ଭାବେ ୮ ୱିକେଟ୍ ଦଖଲ କରିବାରୁ ମୁକ୍ତେଶ୍ବର ବିଜୟ ମୁକୁଟ ପାଇଛି।
ପୂର୍ବତନ ଟେଷ୍ଟ୍ କ୍ରିକେଟର୍ ତଥା ବିସିସିଆଇ ଚୟନକର୍ତା ଶିବସୁନ୍ଦର ଦାସ ସକାଳେ ଫାଇନାଲ୍ ମ୍ୟାଚ୍କୁ ଆନୁଷ୍ଠାନିକ ଭାବେ ଉଦ୍ଘାଟନ କରିଥିବାବେଳେ ଟସ୍ ଜିତି ଏମ୍ସିସି ୪୦ ଓଭରରେ ୪ ୱିକେଟ୍ ହରାଇ ୨୭୪ ରନ୍ କରିଥିଲା। ଅର୍ସଦା କିଶୋର (୬୬ ବଲ୍ରୁ ୧୦୨*) ଆକର୍ଷଣୀୟ ଶତକ ହାସଲ କରିଥିବାବେଳେ ଅବିନାଶ ନନ୍ଦ (୪୬), ସ୍ବରୂପ ଭୂୟାଁ (୪୧), ରମଣୀ ଜେନା (୩୪), ଅନୁରାଗ ଷଡ଼ଙ୍ଗୀ (୩୧) ଭଲ ଅବଦାନ ଦେଇଥିଲେ। ଶାନ୍ତନୁ ମିଶ୍ର ୩ ୱିକେଟ୍ ସଫଳତା ପାଇଥିଲେ। ଜବାବରେ ପ୍ରଗତି ୪୦ ଓଭରରେ ୧୬୧/୯ରେ ସୀମିତ ରହିଥିଲା। ୩୪ ରନ୍ରେ ୪ ୱିକେଟ୍ ହରାଇବା ପରେ ପ୍ରଗତି ପାଇଁ ରଘୁନାଥ ମଲ୍ଲ (୯୬) ଓ ଆୟୁଷ ବାରିକ (୮୪) ୧୬୮ ରନ୍ର ଭାଗୀଦାର କରିଥିଲେ। କିନ୍ତୁ ଏହା ଯଥେଷ୍ଟ ହୋଇନଥିଲା। ଦୁଇ ନୂଆ ବଲ୍ ବୋଲର ଆଶୁତୋଷ ମାରାଣ୍ଡି (୫) ଓ ଶ୍ରୀରାଜ ପଟ୍ଟନାୟକ (୩) ମିଳିତ ଭାବେ ୮ ୱିକେଟ୍ ନେବା ପ୍ରଗତିକୁ ପ୍ରଗତି ପଥରୁ ରୋକିଥିଲା। ଅର୍ସଦା କିଶୋର ଫାଇନାଲ୍ର ଶ୍ରେଷ୍ଠ ଖେଳାଳି ଏବଂ ଶ୍ରେଷ୍ଠ ୱିକେଟ୍ରକ୍ଷକ ସମ୍ମାନ ପାଇଥିଲେ। ଅନୁରାଗ ଷଡ଼ଙ୍ଗୀ ପ୍ରତିଯୋଗିତାର ଶ୍ରେଷ୍ଠ ବ୍ୟାଟର୍ ଓ ଶ୍ରେଷ୍ଠ ଖେଳାଳି ସମ୍ମାନ ପାଇଥିଲେ। ଏମ୍ସିସିର ଚନ୍ଦ୍ରାଶୁ ଭାଗେଲ ଶ୍ରେଷ୍ଠ ଫିଲ୍ଡର, ଦିନେଶ ମାଝୀ ଶ୍ରେଷ୍ଠ ଉଦୀୟମାନ ଖେଳାଳି, ପ୍ରଗତି ସ୍ପୋର୍ଟିଂର ମିଲନ ସାମଲ ଶ୍ରେଷ୍ଠ ବୋଲର ବିବେଚିତ ହୋଇଥିଲେ। ବିଜେତାକୁ ୧ ଲକ୍ଷ ଟଙ୍କା ଏବଂ ଉପ ବିଜେତାକୁ ୬୦,୦୦୦ ଟଙ୍କା ସହ ଟ୍ରଫି ପ୍ରଦାନ କରାଯାଇଥିଲା।
ଉଦ୍ଯାପନୀ ଉତ୍ସବରେ ସାଂସଦ ଅପରାଜିତା ଷଡ଼ଙ୍ଗୀ, ଓଡ଼ିଶା କ୍ରିକେଟ୍ ସଂଘ ସଭାପତି ପଙ୍କଜ ଲୋଚନ ମହାନ୍ତି, କୋଷାଧ୍ୟକ୍ଷ ବିକାଶ ପ୍ରଧାନ, ଖିମ୍ଜୀର ପରିଚାଳନା ନିର୍ଦ୍ଦେଶକ ମିତେଶ ଖିମ୍ଜୀ, ପାରାମାଉଣ୍ଟ୍ ସ୍ପୋର୍ଟିଂ ସଭାପତି ପ୍ରତାପ ଜେନା ଅତିଥି ଭାବେ ଯୋଗ ଦେଇଥିଲେ। ବିଧାୟକ ତଥା ଏମ୍ସିସିର ସଭାପତି ବାବୁ ସିଂହ, କାର୍ଯ୍ୟକାରୀ ସଭାପତି ଗୁରଜିତ୍ ସିଂହ ଚୌହାନ, ସମ୍ପାଦକ ଗୌର ପ୍ରସାଦ ନନ୍ଦ, ଉପ ସଭାପତି ସଂଜୀବ ହଂସ, ଶରଣଜିତ୍ ସିଂହ, ଅଜିତ୍ କୁମାର ବିଶ୍ବାଳ, ପ୍ରବୋଧ ମହାନ୍ତିଙ୍କ ସହ ଆଞ୍ଜେଲ ରୋମି ମିଶ୍ର, ଦତ୍ତାତ୍ରେୟ ମିଶ୍ର, ସୁନୀଲ ସାହୁ ପ୍ରମୁଖ ଉପସ୍ଥିତ ଥିଲେ।
ସୌଜନ୍ୟ ସମ୍ବାଦ
