Flood Alert: ଉତ୍ତର ଓଡ଼ିଶାରେ ପୁଣି ବନ୍ୟା ସ୍ଥିତି, ଉଛୁଳିଲା ସୁବର୍ଣ୍ଣରେଖା ଓ ବୈତରଣୀ, ୫ ତାରିଖ ଯାଏ ବିକ୍ଷିପ୍ତ ସ୍ଥାନରେ ବର୍ଷା ଆଶଙ୍କା
ଭୁବନେଶ୍ୱର, ୦୩/୦୯: ଏବେ ଯାଏ ବନ୍ୟାରୁ ଆଶ୍ୱସ୍ତି ମିଳିନଥିଲା । ଅନେକ ଲୋକେ ପାଣି ଘେରରେ ଥିଲେ । ବୋଝ ଉପରେ ନଳିତା ବିଡ଼ା ଭଳି ଉତ୍ତର ଓଡ଼ିଶାରେ ପୁଣି ଥରେ ବନ୍ୟା ସ୍ଥିତି ସୃଷ୍ଟି ହୋଇଛି । ସୁବର୍ଣ୍ଣରେଖା ନଦୀ ଉଛୁଳିବାରୁ ବାଲେଶ୍ୱରର ଅନେକ ସ୍ଥାନ ପୁଣି ଥରେ ଜଳବନ୍ଦୀ ହୋଇଛି ।
ଲଘୁଚାପ ପ୍ରଭାବରେ ଝାଡ଼ଖଣ୍ଡରେ ପ୍ରବଳ ବର୍ଷା ଯୋଗୁ ବୁଢ଼ାବଳଙ୍ଗ ଓ ସୁବର୍ଣ୍ଣରେଖାରେ ଜଳସ୍ତର ବିପଦ ସଙ୍କେତ ପାର୍ କରିଛି । ସନ୍ଧ୍ୟା ସୁଦ୍ଧା ଜାମଶୋଳାଘାଟରେ ସୁବର୍ଣ୍ଣରେଖାର ଜଳସ୍ତର ୫୧.୩୬ ମିଟର ରହିଥିଲା । ରାଜଘାଟରେ ଜଳସ୍ତର ୧୧.୬ ମିଟର ରହିବା ସହ ବିପଦ ସଙ୍କେତ ଉପରେ ଚାଲିଥିଲା । ସୁବର୍ଣ୍ଣରେଖାରେ ବନ୍ୟା ଆସିବାରୁ ଜଳେଶ୍ୱର, ବାଲିଆପାଳ, ଭୋଗରାଇ ବ୍ଲକର ନଦୀ ଉପକୂଳ ଅଞ୍ଚଳରେ ବନ୍ୟା ଜଳ ପଶିଛି । ଭୋଗରାଇ, ବାଲିଆପାଳ ବ୍ଲକରେ ୫୦ରୁ ଊଦ୍ଧ୍ୱର୍ ପଞ୍ଚାୟତର ଲୋକେ ଜଳବନ୍ଦୀ ଅଛନ୍ତି । ଭୋଗରାଇର ୨୦ ପଞ୍ଚାୟତର ୭୦ ହଜାରରୁ ଅଧିକ ଲୋକ ପାଣି ଘେରରେ ଅଛନ୍ତି । ୧୯ଟି ସ୍ଥାନରେ ୧୨ ହଜାରରୁ ଅଧିକ ଲୋକଙ୍କ ରନ୍ଧାଖାଦ୍ୟ ଦିଆଯାଉଛି । ଜୁଲାଇ ୨୮ ତାରିଖରେ ସୁବର୍ଣ୍ଣରେଖାରେ ପ୍ରଥମ ଓ ଅଗଷ୍ଟ ୧୩ରେ ଦ୍ୱିତୀୟ ବନ୍ୟା ଆସିଥିଲା । ବୁଧବାର ଲଗାତର ତୃତୀୟଥର ପାଇଁ ବନ୍ୟା ସ୍ଥିତି ସୃଷ୍ଟି ହୋଇଛି । ଜିଲ୍ଲା ପ୍ରଶାସନର ପ୍ରାଥମିକ ଆକଳନ ଅନୁସାରେ ବୁଧବାର ସୁଦ୍ଧା ଭୋଗରାଇ, ବସ୍ତା, ଜଳେଶ୍ୱର, ବାଲିଆପାଳ, ରେମୁଣା ବ୍ଲକର ୪୧ ପଞ୍ଚାୟତର ୨୧୪ ଗାଁ, ପୌରାଞ୍ଚଳର ଗୋଟିଏ ୱାର୍ଡର ମୋଟ ୧ ଲକ୍ଷ ୫୭ ହଜାର ୭୪୭ ଜଣ ପ୍ରଭାବିତ ହୋଇଛନ୍ତି । ବୁଢ଼ାବଳଙ୍ଗ ବନ୍ୟା ପାଇଁ ବାଲେଶ୍ୱର ପୌରପାଳିକା ପ୍ରଭାବିତ ହୋଇଛି । ସହର ଉପକଣ୍ଠର ବିଭିନ୍ନ ସ୍ଥାନରେ ପାଣି ପଶିଛି ।
ବୁଢ଼ାବଳଙ୍ଗ ନଦୀର ଜଳସ୍ତର ବି ଡରାଇଛି । ଏନଏଚ-୫ ଗୋବିନ୍ଦପୁରଠାରେ ଜଳସ୍ତର ୭.୬୨ ମିଟର ରହିଥିଲା । ଏଠାରେ ବିପଦ ସଙ୍କେତ ସ୍ତର ୮.୧୩ ମିଟର । ଏବେସୁଦ୍ଧା ଏଠାରେ ଜଳସ୍ତର ବିପଦ ସଙ୍କେତ ସ୍ତରଠୁ ତଳେ ଚାଲିଛି । ସୁବର୍ଣ୍ଣରେଖାରେ ବନ୍ୟା ସ୍ଥିତି ରହିଛି ବୋଲି ଜଳସମ୍ପଦ ସର୍ବୋଚ୍ଚ ଯନ୍ତ୍ରୀ ଦିଲ୍ଲୀପ ରାଉତ ସତର୍କ କରାଇଛନ୍ତି । ଗୁରୁବାର ସନ୍ଧ୍ୟା ଯାଏ ଜଳସ୍ତର ବିପଦ ସଙ୍କେତ ଉପରେ ରହିବ । ଏଥିରେ ଜଳେଶ୍ୱର, ଭୋଗରାଇ, ବସ୍ତା, ବାଲିଆପାଳ ପ୍ରଭାବିତ ହେବ । ଅନ୍ୟ କୌଣସି ନଦୀରେ ବନ୍ୟା ସ୍ଥିତି ନାହିଁ । ବୁଢ଼ାବଳଙ୍ଗରେ ଜଳସ୍ତର ବଢ଼ିଥିଲା, କିନ୍ତୁ ଏବେ ଖସିଲାଣି । ମହାନଦୀରେ ବନ୍ୟା ସ୍ଥିତି ନାହିଁ ବୋଲି ସେ କହିଛନ୍ତି । ବୈତରଣୀର ଆଖୁଆପଦାଠାରେ ଜଳସ୍ତର ବିପଦ ସଙ୍କେତ ତଳେ ଚାଲିଛି । ବାରମ୍ବାର ବନ୍ୟା ଯୋଗୁ ଘାଇ ମରାମତି ହୋଇପାରୁନି । ଭଦ୍ରକର ୧୦ରୁ ଅଧିକ ପଞ୍ଚାୟତରେ ପାଣି ପଶିଛି । ଚାନ୍ଦବାଲି ବ୍ଲକର ୪ ପଞ୍ଚାୟତ ସ୍ଥିତି ସାଂଘାତିକ ହୋଇଛି । ଯାଜପୁର-ଆରଡ଼ି ରାସ୍ତାରେ ଜଳ ପ୍ରବାହିତ ହେଉଛି । ଧାମନଗରର ତଳି ଅଞ୍ଚଳରେ ପାଣି ପଶିଛି । ଲଗାଣ ବର୍ଷା ଯୋଗୁ ସୃଷ୍ଟି ହୋଇଥିବା ବନ୍ୟାରେ ମୟୂରଭଞ୍ଜ ଜିଲ୍ଲାର ୨୧ଟି ବ୍ଲକ ସମେତ ବାରିପଦା ପୌରାଞ୍ଚଳ ପ୍ରଭାବିତ ହୋଇଛି ।
ପାଣିପାଗ ବିଭାଗର ପୂର୍ବାନୁମାନ କହୁଛି, ଗୁରୁବାରଠାରୁ ରାଜ୍ୟରେ ବର୍ଷା କମିବ । ୫ ତାରିଖ ଯାଏ ଉତ୍ତର ଓଡ଼ିଶାର ବିକ୍ଷିପ୍ତ ସ୍ଥାନରେ ବର୍ଷା ହୋଇପାରେ । ରାଜ୍ୟରେ ଧୀରେ ଧୀରେ ବର୍ଷା କମିବ । ୮ ତାରିଖ ଯାଏ ବଡ଼ ବର୍ଷା ଆଶଙ୍କା ନାହିଁ ବୋଲି ସୋଆ ଜଳବାୟୁ ଓ ପରିବେଶ କେନ୍ଦ୍ର ନିର୍ଦ୍ଦେଶକ ଡ. ଶରତ ସାହୁ କହିଛନ୍ତି ।
ସୌଜନ୍ୟ ଧରିତ୍ରୀ
