Heat Wave: ଗୋଟିଏ ଦିନରେ ୩,୪୦୦ ମୃତ୍ୟୁ: ଭାରତରେ ପ୍ରବଳ ଗ୍ରୀଷ୍ମପ୍ରବାହ ଆମ କଳ୍ପନାଠାରୁ ଅଧିକ ଘାତକ
ନୂଆଦିଲ୍ଲୀ: ୨୦୨୬ର ଗ୍ରୀଷ୍ମ ଋତୁରେ ଭାରତର ଅନେକ ସ୍ଥାନରେ ତାପମାତ୍ରା ୪୫ ଡିଗ୍ରି ସେଲସିୟସ ଅତିକ୍ରମ କରିଛି। ଏପରି ଅତ୍ୟଧିକ ଉତ୍ତାପ ଘଟଣା ବାରମ୍ବାର ହେବାରେ ଲାଗିଛି, ଯାହାକୁ ପ୍ରତିବର୍ଷ ସ୍ୱାଭାବିକ ବୋଲି ବିବେଚନା କରାଯାଉଛି। ଗବେଷକମାନେ କହିଛନ୍ତି ଯେ ସମଗ୍ର ଦେଶରେ କେବଳ ଗୋଟିଏ ଦିନର ଅତ୍ୟଧିକ ଉତ୍ତାପ ପ୍ରାୟ ୩,୪୦୦ରୁ ଅଧିକ ମୃତ୍ୟୁ ଘଟାଇପାରେ ଏବଂ କ୍ରମାଗତ ପାଞ୍ଚ ଦିନର ଗ୍ରୀଷ୍ମଲହରି ପ୍ରାୟ ୩୦,୦୦୦ ମୃତ୍ୟୁର କାରଣ ହୋଇପାରେ।
୨୦୨୪ରେ ରାଜସ୍ଥାନର କିଛି ଅଂଶରେ ଉତ୍ତାପ ୫୦.୫ ଡିଗ୍ରି ସେଲସିୟସ ଛୁଇଁଥିବା ବେଳେ ଦିଲ୍ଲୀ ଭଳି ସହରରେ ଅନେକ ବର୍ଷ ମଧ୍ୟରେ ସବୁଠାରୁ ଉତ୍ତପ୍ତ ରାତି ରେକର୍ଡ କରାଯାଇଥିଲା। ଚଳିତ ବର୍ଷ ଉତ୍ତର, କେନ୍ଦ୍ରୀୟ ଓ ପଶ୍ଚିମ ରାଜ୍ୟଗୁଡ଼ିକରେ ସମାନ ଉତ୍ତାପ ଦେଖାଦେଇଛି ଏବଂ ଦିଲ୍ଲୀ-ଏନ୍ସିଆର, ଉତ୍ତରପ୍ରଦେଶ, ମଧ୍ୟପ୍ରଦେଶ ଓ ରାଜସ୍ଥାନ ଭଳି ସ୍ଥାନରେ ପ୍ରବଳ ଗ୍ରୀଷ୍ମ ସତର୍କ ସୂଚନା ଜାରି କରାଯାଇଛି। ଏ ବର୍ଷ ଉପୁଜିଥିବା ଅନ୍ୟ ଏକ ପ୍ରମୁଖ ପ୍ରସଙ୍ଗ ହେଉଛି ଭୀଷଣ ଉଷ୍ମ ରାତି ଯାହା ଶାନ୍ତିରେ ଶୋଇବାକୁ ଦେଇ ନ ଥାଏ।
ସହରାଞ୍ଚଳରେ ଥିବା କଂକ୍ରିଟ୍ ଜନବସତି ସୂର୍ଯ୍ୟ ଅସ୍ତ ହେବା ପରେ ମଧ୍ୟ ଆଖପାଖକୁ ଉଷ୍ମ କରିଥାଏ। ଅବଶ୍ୟ ଉତ୍ତାପ ଲୋକଙ୍କୁ ଅସମାନୁପାତିକ ଭାବରେ ପ୍ରଭାବିତ କରେ। କୃଷକ, ବାହ୍ୟ ଶ୍ରମିକ ଓ ବୃଦ୍ଧମାନେ ପ୍ରାୟତଃ ଏହାର ପ୍ରଭାବ ଭୋଗନ୍ତି, କାରଣ ସେମାନେ ବୃଦ୍ଧି ପାଉଥିବା ତାପମାତ୍ରା ପ୍ରତି ଅଧିକ ଅସୁରକ୍ଷିତ।ଅଧ୍ୟୟନରୁ ମିଳିଥିବା ସଂଖ୍ୟା ଅଧିକ ଚିନ୍ତାଜନକ କାରଣ ଆମେ ଏହି ମୃତ୍ୟୁ ବିଷୟରେ ବହୁତ କମ୍ ଶୁଣିଥାଉ। ଅଂଶୁଘାତ ମୃତ୍ୟୁର ସରକାରୀ ଗଣନା ପ୍ରାୟତଃ କମ୍ ଥାଏ, ବେଳେବେଳେ ଖରାପ ଋତୁରେ ମାତ୍ର କିଛି ଶହ, କାରଣ ଅନେକ ଉତ୍ତାପ ସମ୍ବନ୍ଧୀୟ ମୃତ୍ୟୁ ସରକାରୀ ରେକର୍ଡକୁ ଆସିପାରି ନ ଥାଏ। ହୃଦ୍ରୋଗ, ଶ୍ୱାସକ୍ରିୟା ସମସ୍ୟା କିମ୍ବା ଅନ୍ୟାନ୍ୟ ଅସୁସ୍ଥତା ଥିବା ଲୋକମାନେ ବିଶେଷ ଭାବରେ ଅତ୍ୟଧିକ ଉତ୍ତାପ ହେତୁ ମୃତ୍ୟୁବରଣ କରୁଥିବା ବେଳେ ସେମାନଙ୍କ ମୃତ୍ୟୁର କାରଣ ଭାବେ ସେମାନଙ୍କ ପୂର୍ବ ରୋଗକୁ ଦାୟୀ କରାଯାଇଥାଏ। ଉତ୍ତାପଜନିତ ମୃତ୍ୟୁହାର ଉପରେ ସ୍ପଷ୍ଟ ଓ ବିସ୍ତୃତ ତଥ୍ୟର ଅଭାବ କର୍ତ୍ତୃପକ୍ଷ ଓ ଜନସାଧାରଣଙ୍କ ପାଇଁ ସମସ୍ୟାର ସମ୍ପୂର୍ଣ୍ଣ ପରିମାଣକୁ ବୁଝିବା କଷ୍ଟକର କରିଦେଇଛି।
ୟୁସି ବର୍କଲେର ଗବେଷକ ପୀୟୁଷ ନାରଙ୍ଗ ଓ ଅଶୋକ ଗାଡଗିଲଙ୍କ ଦ୍ୱାରା କରାଯାଇଥିବା ନୂତନ ଅଧ୍ୟୟନ ଏହି ଶୂନ୍ୟସ୍ଥାନ ପୂରଣ କରିବାକୁ ଚେଷ୍ଟା କରିଛି। ଗବେଷକମାନେ କହିଛନ୍ତି, ପାଞ୍ଚ ଦିନର ଗ୍ରୀଷ୍ମ ପ୍ରବାହରେ ଉତ୍ତରପ୍ରଦେଶରେ ୮,୦୦୦ରୁ ଅଧିକ ମୃତ୍ୟୁ ହେବାର ସମ୍ଭାବନା ରହିଛି। ଅହମଦାବାଦ, ଜୟପୁର ଓ ସୁରତ ଭଳି ସହରଗୁଡ଼ିକରେ ଗୋଟିଏ ଦିନରେ ୨୫୦ରୁ ଅଧିକ ମୃତ୍ୟୁ ଘଟିପାରେ। ଅଧ୍ୟୟନରେ ଆହୁରି ଦର୍ଶାଯାଇଛି ଯେ, ଗରିବ ରାଜ୍ୟଗୁଡିକ ଅଧିକ ପ୍ରଭାବିତ ହୋଇଥାନ୍ତି, ଯାହା ନ୍ୟାୟପୂର୍ଣ୍ଣ ସମର୍ଥନ ଓ ଯୋଜନା ଉପରେ ଜରୁରୀ ପ୍ରଶ୍ନ ସୃଷ୍ଟି କରେ। ବିଶ୍ବତାପନ ହେତୁ ପୃଥିବୀ ଉତ୍ତପ୍ତ ହେବା ସହିତ ଗ୍ରୀଷ୍ମ ପ୍ରବାହ ଅଧିକ ବାରମ୍ବାର ହେବାର ଆଶଙ୍କା ଥିବାରୁ ବିଶେଷଜ୍ଞମାନେ କହିଛନ୍ତି ଯେ, ଭାରତକୁ ଉନ୍ନତ ସ୍ଥାନୀୟ ଆଗୁଆ ଚେତାବନୀ, ଗରମ ସମୟରେ ଶକ୍ତିଶାଳୀ ସ୍ୱାସ୍ଥ୍ୟସେବା ପ୍ରସ୍ତୁତି ଏବଂ ଉଚ୍ଚ ବିପଦପୂର୍ଣ୍ଣ ଅଞ୍ଚଳ ପାଇଁ ଉପଯୁକ୍ତ ସହାୟତା ଆବଶ୍ୟକ। ବଢୁଥିବା ଜନସ୍ୱାସ୍ଥ୍ୟ ଜରୁରିକାଳୀନ ପରିସ୍ଥିତି ଉପରେ ଆଲୋକପାତ କରି ଏହି ଗବେଷଣାରେ ଉତ୍ତମ ପ୍ରସ୍ତୁତି ପାଇଁ ଆହ୍ବାନ ଦିଆଯାଇଛି।
ସୌଜନ୍ୟ ସମ୍ବାଦ
