ନୂଆଦିଲ୍ଲୀ: ହର୍ମୁଜ ପ୍ରଣାଳୀରେ ଉତ୍ତେଜନା ବୃଦ୍ଧି ପାଇଥିବା ବେଳେ ପାନାମା ପତାକା ଥିବା ଏକ କଣ୍ଟେନର ଜାହାଜ ଉପରେ ଇରାନ ଗୁଳି ଚଳାଇଥିଲା, ଯେଉଁଥିରେ ୨୧ ଜଣ ଭାରତୀୟ କ୍ରୁ ସଦସ୍ୟ ଥିଲେ। ତେବେ ସେମାନେ ଅକ୍ଷତ ଓ ସୁରକ୍ଷିତ ଅଛନ୍ତି ବୋଲି ଗୁରୁବାର ଭାରତର ଜାହାଜ ଚଳାଚଳ ମନ୍ତ୍ରାଳୟ କହିଛି।
ବୁଧବାର ଇସଲାମିକ୍ ରିଭୋଲ୍ୟୁସନାରୀ ଗାର୍ଡ କର୍ପସ୍ (ଆଇଆର୍ଜିସି) ଦ୍ୱାରା ଆକ୍ରମଣର ଶିକାର ହୋଇଥିବା ତିନୋଟି ଜାହାଜ ମଧ୍ୟରୁ ୟୁଫୋରିଆ ହେଉଛି ଅନ୍ୟତମ। ଆକ୍ରମଣ ହୋଇଥିବା ଅନ୍ୟ ଜାହାଜଗୁଡ଼ିକ ହେଉଛି ପାନାମା ପତାକା ଥିବା ଏମ୍ଏସ୍ସି ଫ୍ରାନ୍ସେସ୍କା ଓ ଲାଇବେରିଆ-ପଞ୍ଜୀକୃତ ଏପାମିନୋଣ୍ଡାସ୍ – ଯାହା ଭାରତର ମୁନ୍ଦ୍ରା ବନ୍ଦର ଅଭିମୁଖେ ଯାଉଥିଲା।
ଗୁରୁବାର ଏକ ଆନ୍ତଃମନ୍ତ୍ରିସ୍ତରୀୟ ସାମ୍ବାଦିକ ସମ୍ମିଳନୀରେ ଜାହାଜ ଚଳାଚଳ ମନ୍ତ୍ରଣାଳୟର ଅତିରିକ୍ତ ସଚିବ ମୁକେଶ ମଙ୍ଗଲ କହିଛନ୍ତି, ୟୁଫୋରିଆ ନାମକ ଏକ ଜାହାଜରେ ୨୧ ଜଣ ଭାରତୀୟ ନାବିକ ଥିଲେ ଏବଂ ସମସ୍ତେ ସୁରକ୍ଷିତ ଅଛନ୍ତି। ୟୁଫୋରିଆରେ ଜଣେ ବର୍ମା କ୍ରୁ ସଦସ୍ୟ ମଧ୍ୟ ଅଛନ୍ତି। ଏପାମିନୋଣ୍ଡାସରେ ଜଣେ ଭାରତୀୟ କ୍ରୁ ସଦସ୍ୟ ଥିଲେ ଏବଂ ସେ ମଧ୍ୟ ସୁରକ୍ଷିତ ଅଛନ୍ତି ବୋଲି ମଙ୍ଗଲ କହିଛନ୍ତି। ସେ ଆହୁରି କହିଛନ୍ତି ଯେ ବିଦେଶୀ ପତାକା ଥିବା ଜାହାଜ ଉପରେ ଗୁଳିମାଡ଼ରେ କୌଣସି ଭାରତୀୟ ନାବିକ ଆହତ ହୋଇନାହାନ୍ତି।
ତେବେ ଗୁରୁବାର ବିଳମ୍ବିତ ରାତିରେ ଜାହାଜଟି ଏହାର ମୂଳ ଗନ୍ତବ୍ୟ ସ୍ଥଳ ଜେଦ୍ଦା ଅଭିମୁଖେ ଯାତ୍ରା କରୁଛି ବୋଲି ଜାହାଜ ମନ୍ତ୍ରଣାଳୟର ଜଣେ ବରିଷ୍ଠ ଅଧିକାରୀ କହିଛନ୍ତି। ଏହି ସମୟରେ, ଜିବ୍ରାଲଟର-ପତାକା ଥିବା ବଲ୍କ କ୍ୟାରିଅର୍ ଫ୍ରୋସୋ କେ, ୫୫,୦୦୦ ମେଟ୍ରିକ୍ ଟନ୍ ସଲଫର୍ ନେଇ ବୁଧବାର ହର୍ମୁଜ ପ୍ରଣାଳୀ ଅତିକ୍ରମ କରି ଭାରତର ପାରାଦୀପ ବନ୍ଦର ଅଭିମୁଖେ ଯାତ୍ରା କରିଛି ବୋଲି ଜାହାଜ ଚଳାଚଳ ମନ୍ତ୍ରଣାଳୟ କହିଛି। ପାରସ୍ୟ ଉପସାଗରରୁ ସ୍ଥାନାନ୍ତର ପାଇଁ ସାର ବିଭାଗ ଦ୍ୱାରା ଚିହ୍ନଟ ହୋଇଥିବା ୧୫ଟି ଜାହାଜର ପ୍ରାଥମିକତା ତାଲିକାରେ ଫ୍ରୋସୋ କେ ଥିଲା। ଏପ୍ରିଲ ୧୮ରେ ହର୍ମୁଜ ଅତିକ୍ରମ କରିଥିବା ଅଶୋଧିତ ତୈଳ ଟ୍ୟାଙ୍କର ଦେଶ ଗରିମା ବୁଧବାର ମୁମ୍ବାଇରେ ପହଞ୍ଚିଥିଲା।
ସୌଜନ୍ୟ ସମ୍ବାଦ