Iran: ଫାଶୀ ଦଣ୍ଡ ପୂର୍ବରୁ ଭାବି ସ୍ତ୍ରୀଙ୍କୁ ବିବାହ କଲେ ପ୍ରଦର୍ଶନକାରୀ ଅଲିରେଜା

ନୂଆଦିଲ୍ଲୀ: ମଧ୍ୟ ଇରାନର ଇସ୍ଫାହାନ ସହରରେ ପ୍ରଦର୍ଶନକାରୀ ୨୫ ବର୍ଷୀୟ ଅଲିରେଜା ସେପାହୀଙ୍କୁ ଫାଶୀ ଦିଆଯାଇଛି। ଜାନୁଆରିରେ ହୋଇଥିବା ବିରୋଧ ପ୍ରଦର୍ଶନ ପରେ ତାଙ୍କୁ ଗିରଫ କରାଯାଇଥିଲା। ଜୁଲାଇରେ ତାଙ୍କୁ ସର୍ବସାଧାରଣଙ୍କ ସାମ୍ନାରେ ଫାଶୀ ଦେବାର ଥିଲା, କିନ୍ତୁ ହଠାତ୍ ହୃଦଘାତ ହେବାରୁ ଏହା ସମ୍ଭବ ହୋଇପାରି ନଥିଲା। ଏହା ମଧ୍ୟରେ ସେ ନିଜ ଭାବି ସ୍ତ୍ରୀଙ୍କୁ ବିବାହ କରିଥିଲେ। ଅକ୍ଟୋବର ୫ ସକାଳେ ତାଙ୍କୁ ଇସ୍ଫାହାନର କେନ୍ଦ୍ରୀୟ ଜେଲରେ ଫାଶୀ ଦିଆଯାଇଥିଲା। ଫାଶୀର କିଛି ସମୟ ପୂର୍ବରୁ ତାଙ୍କ ଓକିଲ ଫୋନ୍‌ ମାଧ୍ୟମରେ ୨୨ ବର୍ଷୀୟା ମହଶାଦ କାଶାନୀଙ୍କ ସହ ତାଙ୍କ ବିବାହ କରାଇଥିଲେ। ମହଶାଦ ମଧ୍ୟ ବିରୋଧ ପ୍ରଦର୍ଶନ କାରଣରୁ ଜେଲରେ ଥିଲେ।

ଏପର୍ଯ୍ୟନ୍ତ ୩୪ ଜଣଙ୍କୁ ଫାଶୀ

ଅଧିକାରୀଙ୍କ ଅନୁସାରେ, ଇସ୍ଫାହାନର ଅଲିଖାନୀ ସ୍କୋୟାରରେ ହୋଇଥିବା ବିରୋଧ ପ୍ରଦର୍ଶନ ମାମଲାରେ ଅଲିରେଜା ସେପାହୀ ଏବଂ ୨୧ ବର୍ଷୀୟ ଅଲିରେଜା ରାଏସିଙ୍କୁ ଫାଶୀ ଦିଆଯାଇଛି। ଏହି ପ୍ରଦର୍ଶନରେ ୪ ଜଣ ପୁଲିସ ଅଧିକାରୀଙ୍କ ମୃତ୍ୟୁ ହୋଇଥିଲା। ପ୍ରକାଶିତ ରିପୋର୍ଟ ଅନୁସାରେ, ସେପାହୀଙ୍କୁ ଏକ ସଶସ୍ତ୍ର ଗୋଷ୍ଠୀର ସଦସ୍ୟ ହେବା ଏବଂ ଜାତୀୟ ସୁରକ୍ଷା ପ୍ରତି ବିପଦ ସୃଷ୍ଟି କରିବା ଅଭିଯୋଗରେ ଦୋଷୀ ସାବ୍ୟସ୍ତ କରାଯାଇଥିଲା। ନରୱେସ୍ଥିତ ମାନବାଧିକାର ସଂଗଠନ ଇରାନ ହ୍ୟୁମାନ୍ ରାଇଟ୍ସ ଅନୁସାରେ, ଏହି ବିରୋଧ ପ୍ରଦର୍ଶନ ସହ ଜଡ଼ିତ ମାମଲାରେ ଇରାନ ଏପର୍ଯ୍ୟନ୍ତ ୩୪ ଜଣଙ୍କୁ ଫାଶୀ ଦେଇଛି।

‘ପ୍ରତିଦିନ ଥିଲା ମୃତ୍ୟୁର ଭୟ’

ଅଲିରେଜା ସେପାହୀଙ୍କୁ ଘଟଣାର କିଛି ଦିନ ପରେ ଜାନୁଆରି ୧୦ ତାରିଖରେ ତାଙ୍କ ମାଆଙ୍କ ସହ ଗିରଫ କରାଯାଇଥିଲା। ତାଙ୍କ ମାଆ ଏବେ ମଧ୍ୟ ଜେଲରେ ଅଛନ୍ତି ଏବଂ ୫ ବର୍ଷର ଦଣ୍ଡ ଭୋଗୁଛନ୍ତି। ଜୁଲାଇ ୨୮ରେ ଅଲିଖାନୀ ସ୍କୋୟାରରେ ସର୍ବସାଧାରଣଙ୍କ ସାମ୍ନାରେ ସେପାହୀଙ୍କ ସମେତ ଦୁଇ ଜଣଙ୍କୁ ଫାଶୀ ଦେବାର ଯୋଜନା ଥିଲା। କିନ୍ତୁ ଫାଶୀର କିଛି ସମୟ ପୂର୍ବରୁ ସେପାହୀଙ୍କ ହୃଦଘାତ ହୋଇଥିଲା ଏବଂ ତାଙ୍କୁ ହସ୍ପିଟାଲ ନିଆଯାଇଥିଲା। ସୁସ୍ଥ ହେବା ପରେ ସେ ଜେଲକୁ ଫେରିଥିଲେ ଏବଂ ଶେଷ ପର୍ଯ୍ୟନ୍ତ ପ୍ରତିଦିନ ଫାଶୀର ଭୟରେ ରହିଥିଲେ।

ଫାଶୀର କିଛି ସମୟ ପୂର୍ବରୁ ବିବାହ

ଇସ୍ଫାହାନର ରିଭୋଲ୍ୟୁସନାରୀ କୋର୍ଟ ତାଙ୍କ ଆବେଦନ ଖାରଜ କରିବା ପରେ ପରିବାରର ସଦସ୍ୟମାନଙ୍କୁ ଶେଷ ଥର ପାଇଁ ଦେଖା କରିବାକୁ ଡକାଯାଇଥିଲା। ଏହି ସମୟରେ ସେପାହୀଙ୍କ ଶେଷ ଇଚ୍ଛା ପ୍ରକାଶ କରି ଭାବି ସ୍ତ୍ରୀ ମହଶାଦଙ୍କୁ ବିବାହ କରିବା କଥା କହିଥିଲେ। ଏହାପରେ ତାଙ୍କ ଓକିଲ ମହଶାଦଙ୍କ ସହ ଏକ ଅଡିଓ କଲ୍‌ର ବ୍ୟବସ୍ଥା କରିଥିଲେ। ମହଶାଦ ଇସ୍ଫାହାନର ଅନ୍ୟ ଏକ ଜେଲରେ ବନ୍ଦୀ ଥିଲେ। ଉଭୟଙ୍କ ପିତାଙ୍କ ସମ୍ମତି ପରେ ଫୋନ୍‌ ମାଧ୍ୟମରେ ବିବାହର ଧାର୍ମିକ ରୀତି ସମ୍ପନ୍ନ ହୋଇଥିଲା। ତେବେ ଜେଲ କର୍ତ୍ତୃପକ୍ଷ ଦୁହିଁଙ୍କୁ ସାମ୍ନାସାମ୍ନୀ ଦେଖା କରି ବିବାହ କରିବାକୁ ଅନୁମତି ଦେଇ ନଥିଲେ। ଆଇନଗତ ଭାବେ ବିବାହ ହୋଇଥିଲେ ମଧ୍ୟ ଉଭୟ ଏକାଠି ଉପସ୍ଥିତ ରହି ବିବାହ କରିପାରି ନଥିଲେ। ବିବାହ ପରେ ସେପାହୀଙ୍କୁ ଫାଶୀ ହୋଇଯାଇଥିଲା।

ସୌଜନ୍ୟ ସମ୍ବାଦ