ଆର୍ଟ ଅଫ୍ ଲିଭିଂ ଅନ୍ତର୍ଜାତୀୟ କେନ୍ଦ୍ର ଏହି ବର୍ଷ ଅତୁଳନୀୟ ଆଧ୍ୟାତ୍ମିକ ଉତ୍ସାହ ଓ ବିଶାଳ ପରିମାଣରେ ଭବ୍ୟ ମହାଶିବରାତ୍ରି ଉତ୍ସବ ପାଳନ ପାଇଁ ସମ୍ପୂର୍ଣ୍ଣ ପ୍ରସ୍ତୁତ। ଏଥିରେ ୧୮୦ଟି ଦେଶରୁ ଲକ୍ଷାଧିକ ଭକ୍ତ ଯୋଗଦେବେ । ସେମାନେ ଧ୍ୟାନ, ମଙ୍ଗଳମୟ ରୁଦ୍ର ହୋମ, ଭାବବିହ୍ୱଳ ଭଜନ ଓ ଗଭୀର ଆନ୍ତରିକ ନିରବତାରେ ଭିଜିଥିବା ଏକ ସନ୍ଧ୍ୟା – ଶିବ ତତ୍ତ୍ୱର ସର୍ବୋଚ୍ଚ ଉତ୍ସବରେ ସାମିଲ ହେବେ । ବିଶ୍ୱ ପ୍ରସିଦ୍ଧ ଆଧ୍ୟାତ୍ମିକ ଗୁରୁ ଓ ମାନବତାବାଦୀ ନେତା ଗୁରୁଦେବ ଶ୍ରୀ ଶ୍ରୀ ରବି ଶଙ୍କରଙ୍କ ଦିବ୍ୟ ସାନ୍ନିଧ୍ୟରେ ପାଳନ ପାଇଁ ଏକତ୍ରିତ ହେବେ ଶ୍ରଦ୍ଧାଳୁ।
ମହାଶିବରାତ୍ରି, ବୈଦିକ ପରମ୍ପରାର ସର୍ବାଧିକ ପବିତ୍ର ରାତ୍ରିମାନଙ୍କ ମଧ୍ୟରୁ ଗୋଟିଏ। ଏହା ଗଭୀର ବିଶ୍ରାମ, ଉଚ୍ଚତର ସଚେତନତା ଓ ଆନ୍ତରିକ ପରିବର୍ତ୍ତନ ପାଇଁ ଏକ ଶକ୍ତିଶାଳୀ ସୁଯୋଗ ଦେଇଥାଏ। ଆର୍ଟ ଅଫ୍ ଲିଭିଂ ଅନ୍ତର୍ଜାତୀୟ କେନ୍ଦ୍ରରେ ସାରାରାତିର ଉତ୍ସବ ପ୍ରଭାବଶାଳୀ ମନ୍ତ୍ରୋଚ୍ଚାରଣ, ଭବ୍ୟ ବୈଦିକ କ୍ରିୟାକଳାପ ଓ ଆତ୍ମସ୍ପର୍ଶୀ ସଙ୍ଗୀତରୁ ଜନ୍ମ ନେଉଥିବା ଉର୍ଜାମୟ ଓ ଉତ୍ସାହଭରା ପରିବେଶ ପାଇଁ ସାରା ବିଶ୍ୱରେ ପରିଚିତ।
ଏହି ପବିତ୍ର ଅବସରର ଗଭୀର ମହତ୍ତ୍ୱ ବିଷୟରେ ଗୁରୁଦେବ ଶ୍ରୀ ଶ୍ରୀ ରବି ଶଙ୍କର କହିଛନ୍ତି,
“ଶିବରାତ୍ରି ହେଉଛି ଏହି ଭୌତିକ ଜଗତ ଓ ତୁମ ଅନ୍ତର୍ନିହିତ ସୂକ୍ଷ୍ମ ଜଗତ ମଧ୍ୟରେ ଏକ ସେତୁ। ଏହି ଆନ୍ତରିକ ଯାତ୍ରା ବହୁତ ଅଧିକ ବାହ୍ୟ ବ୍ୟସ୍ତତା ବା କୋଳାହଳ ସହିତ ସମ୍ଭବ ନୁହେଁ। ଏହା ଏକ ଆନ୍ତରିକ ସଂଯୋଗର ସ୍ଥାନ, ମନୋରଞ୍ଜନର ନୁହେଁ। କେହି ଏହାକୁ କେବଳ ଏକ ଧାର୍ମିକ କ୍ରିୟା ଭାବେ ଦେଖନ୍ତି, ଆଉ କେହି ମନୋରଞ୍ଜନ ଭାବେ, ଉଭୟ କ୍ଷେତ୍ରରେ ସେମାନେ ପ୍ରଧାନ ବିଷୟକୁ ହରାନ୍ତି – ଯେ ଶିବରାତ୍ରି ହେଉଛି ଧ୍ୟାନମୟ ସଚେତନତା ବିଷୟରେ। ଆନନ୍ଦ ଓ ଭକ୍ତିରେ ଲୀନ ହେବାର ଅବସର।”
ସୁଖ ପଛରେ ଦୌଡ଼ିଲେ କ୍ଲାନ୍ତ ହୋଇଯିବେ
ଗୁରୁଦେବ କହନ୍ତି, “ସୁଖର ପଛରେ ଦୌଡ଼ିଲେ ଆପଣ କ୍ଲାନ୍ତ ହୋଇଯିବେ। ଯେତେବେଳେ ଆପଣ ନିଜ ସ୍ୱରୂପରେ କିଛି ସମୟ ବିଶ୍ରାମ କରିବେ, ପୁନଃ ଶକ୍ତି ଲାଭ କରିବେ, ଯାହା ଶକ୍ତି, ଆନନ୍ଦ ଓ ସୁଖ ଦେଇଥାଏ। ବର୍ଷର କିଛି ରାତ୍ରି ବିଶେଷ ଭାବେ ଶୁଭ ଓ ଅନୁକୂଳ ମନାଯାଏ, ଯେଉଁଠାରେ ଆପଣ ଏହି ବିଶ୍ରାମ ପାଇପାରିବେ। ମହାଶିବରାତ୍ରିର ମୂଳ ସାର ହେଉଛି ଏହି ଗଭୀର ବିଶ୍ରାମର ଅବସ୍ଥାକୁ ପ୍ରାପ୍ତ କରିବା।”
ଅନ୍ତର୍ଜାତୀୟ କେନ୍ଦ୍ରରେ ଉତ୍ସବ ଆଧ୍ୟାତ୍ମିକ ଗଭୀରତା ସହିତ ବିଶାଳ ପ୍ରଶାସନିକ ସମନ୍ୱୟକୁ ମଧ୍ୟ ପ୍ରତିବିମ୍ବିତ କରିବ। ଏହି ଅବସରରେ ଶିବରାତ୍ରି ଦିନ ପ୍ରାୟ ୩ ଲକ୍ଷ ଭକ୍ତଙ୍କ ପାଇଁ ପ୍ରସାଦ ବ୍ୟବସ୍ଥା କରାଯାଉଛି, ଯାହା ଏହି ଉତ୍ସବର ସେବା ଓ ଅତିଥି ସତ୍କାରର ଧର୍ମକୁ ଦର୍ଶାଏ।
ସନ୍ଧ୍ୟାର ମୁଖ୍ୟ ଆକର୍ଷଣ ହେଉଛି ପବିତ୍ର ରୁଦ୍ର ପୂଜା – ଭଗବାନ ରୁଦ୍ରଙ୍କ ଉପାସନା ପାଇଁ ସମର୍ପିତ ଏକ ଶକ୍ତିଶାଳୀ ବୈଦିକ କ୍ରିୟା, ଗୁରୁଦେବଙ୍କ ଉପସ୍ଥିତିରେ ଭଗବାନ ଶିବଙ୍କ କରୁଣାମୟ ରୂପର ଉପାସନା। ଏହି ପୂଜା ଶିବଙ୍କ ପରିବର୍ତ୍ତନଶୀଳ ଶକ୍ତିକୁ ଆହ୍ୱାନ କରେ, ଯାହା ନକାରାତ୍ମକତାର ବିଲୟ ଓ ଉଚ୍ଚତର ସଚେତନତାର ଜାଗୃତିର ପ୍ରତୀକ। ପ୍ରାଚୀନ ବେଦମନ୍ତ୍ର ‘ଶ୍ରୀ ରୁଦ୍ରମ୍’ ଉପରେ ଆଧାରିତ ଏହି ଆଚାର ପରିବେଶକୁ ପବିତ୍ର କରେ, ସାମୂହିକ ସଚେତନତାକୁ ଉନ୍ନତ କରେ ଓ ବ୍ୟକ୍ତି ଏବଂ ସମାଜ ପାଇଁ ଶାନ୍ତି, ସମୃଦ୍ଧି ଓ କଳ୍ୟାଣ ଆଣେ ବୋଲି ବିଶ୍ୱାସ କରାଯାଏ।
କାର୍ଯ୍ୟକ୍ରମ ସୂଚୀ:
ସନ୍ଧ୍ୟା ୭:୧୫ – ୭:୪୫: ଭଜନ (ଭକ୍ତିମୟ ସଙ୍ଗୀତ)
ସନ୍ଧ୍ୟା ୭:୪୫ – ୯:୩୦: ରୁଦ୍ର ପୂଜା
ରାତି ୯:୩୦ – ୧୦:୩୦: ଭଜନ ଓ ଗୁରୁଦେବଙ୍କ ବାଣୀ
ରାତି ୧୧:୩୦: ଗୁରୁଦେବଙ୍କ ସହ ବିଶେଷ ମଧ୍ୟରାତ୍ରି ଧ୍ୟାନ
ପ୍ରଭାତ ୪:୦୦ ରୁ: ରୁଦ୍ର ହୋମ
ଭାରତର ୧୫୦ଟି ସ୍ଥାନରେ ମଧ୍ୟ ଲକ୍ଷାଧିକ ଭକ୍ତମାନେ ନିଜ ନିଜ ସହରରେ ରୁଦ୍ର ପୂଜାର ଦିବ୍ୟ ଅନୁଭୂତି ଲାଭ କରିପାରିବେ।
ଆର୍ଟ ଅଫ୍ ଲିଭିଂ ଆନ୍ତର୍ଜାତୀୟ କେନ୍ଦ୍ରରେ ଆୟୋଜିତ ଏହି ମହାଶିବରାତ୍ରି ଉତ୍ସବ ବିଶ୍ୱର ଲକ୍ଷାଧିକ ସାଧକଙ୍କୁ ଏକତ୍ର କରି ସକାରାତ୍ମକତା, ଆନନ୍ଦ ଓ ଆଧ୍ୟାତ୍ମିକ ଗଭୀରତାର ଏକ ଶକ୍ତିଶାଳୀ ସାମୂହିକ ପରିବେଶ ସୃଷ୍ଟି କରିବ।
ସୌଜନ୍ୟ OTV
