Manipur: ମଣିପୁର ହିଂସା ମାମଲାର ଶୀଘ୍ର ବିଚାର ପାଇଁ ସ୍ୱତନ୍ତ୍ର କୋର୍ଟ ଗଠନ ପାଇଁ ସୁପ୍ରିମକୋର୍ଟଙ୍କ ପ୍ରସ୍ତାବ

ଶୁକ୍ରବାର ସୁପ୍ରିମକୋର୍ଟଙ୍କ ପ୍ରଧାନ ବିଚାରପତି ସୂର୍ଯ୍ୟକାନ୍ତ, ଜୟମାଲ୍ୟ ବାଗ୍‌ଚୀ ଓ ଭି ମୋହନା ମଣିପୁର ହିଂସା ସମ୍ପର୍କିତ କେତେକ ଆବେଦନର ଶୁଣାଣି କରିଥିଲେ। ସିବିଆଇ ଓ ସ୍ବତନ୍ତ୍ର ତଦନ୍ତକାରୀ ଦଳ (ଏସ୍ଆଇଟି) ଦ୍ବାରା ଦାଖଲ ହୋଇଥିବା ଷ୍ଟାଟସ ରିପୋର୍ଟ ଉପରେ ଖଣ୍ଡପୀଠ କହିଛନ୍ତି ଯେ, ବର୍ତ୍ତମାନ ଆଇନକାନୁନ ସ୍ଥିତିରେ ସାକ୍ଷ୍ୟ ପ୍ରମାଣର ପରୀକ୍ଷା କରିବା କଷ୍ଟକର କରିଦେଇଛି। କାରଣ ହିଂସା ଯୋଗୁ ଅନେକ ବିସ୍ଥାପିତ ହୋଇଛନ୍ତି। କୋର୍ଟ ପୀଡିତଙ୍କ ପ୍ରତିନିଧିତ୍ୱ କରୁଥିବା ଆଇନଗତ ସହାୟତା ପରାମର୍ଶଦାତାଙ୍କୁ ଗୁଆହାଟୀ ହାଇକୋର୍ଟ ଓ ମଣିପୁର ହାଇକୋର୍ଟଙ୍କ ମୁଖ୍ୟ ବିଚାରପତିଙ୍କ କାର୍ଯ୍ୟାଳୟକୁ ଯାଇ ଚାର୍ଜସିଟର କପି ପାଇବାକୁ ଅନୁମତି ଦେଇଥିଲେ।

 ଖଣ୍ଡପୀଠ କେନ୍ଦ୍ର ସରକାର, ସିବିଆଇ, ଏସ୍‌ଆଇଟି ଓ ମଣିପୁର ସରକାରଙ୍କ ପକ୍ଷରୁ ଉପସ୍ଥିତ ଅତିରିକ୍ତ ସଲିସିଟର ଜେନେରାଲ ଐଶ୍ୱର୍ଯ୍ୟା ଭଟିଙ୍କୁ ତଦନ୍ତ ସମାପ୍ତ ହୋଇଥିବା ଓ ଚାର୍ଜସିଟ୍ ଦାଖଲ ହୋଇଥିବା ମାମଲା ଓ ବିଚାରାଧୀନ ଥିବା ମାମଲାଗୁଡ଼ିକର ବିବରଣୀ ପ୍ରଦାନ କରିବାକୁ କହିଛନ୍ତି। କୋର୍ଟ କହିଛନ୍ତି, ଏହି ତଥ୍ୟ ଦ୍ବାରା ମଣିପୁର ହିଂସା ମାମଲାରେ ତ୍ବରିତ ବିଚାର ପାଇଁ କେତେ ସଂଖ୍ୟକ ସ୍ବତନ୍ତ୍ର କୋର୍ଟ ଗଠନ କରାଯିବାର ଆବଶ୍ୟକତା ରହିଛି ତାହା ଜଣାପଡ଼ିଯିବ।