Pilots Rescued: ହର୍ମୁଜ୍ ନିକଟରେ ଆମେରିକୀୟ ଆପାଚେ ହେଲିକପ୍ଟର ଦୁର୍ଘଟଣାଗ୍ରସ୍ତ: ଦୁଇ ପାଇଲଟ ସୁରକ୍ଷିତ ଉଦ୍ଧାର
ୱାସିଂଟନ:ହର୍ମୁଜ୍ ପ୍ରଣାଳୀ ନିକଟରେ ଆମେରିକୀୟ ସେନାର ଏକ ଆପାଚେ ହେଲିକପ୍ଟର ଦୁର୍ଘଟଣାଗ୍ରସ୍ତ ହୋଇଛି। ଏଥିରେ ଥିବା ଉଭୟ ପାଇଲଟଙ୍କୁ ସୁରକ୍ଷିତ ଭାବରେ ଉଦ୍ଧାର କରାଯାଇଛି। ହେଲିକପ୍ଟରଟି ଇରାନୀ ଆକ୍ରମଣର ଶିକାର ହୋଇଥିଲା ଅବା କୌଣସି ଯାନ୍ତ୍ରିକ ତ୍ରୁଟିର ଶିକାର ହୋଇଥିଲା କି ଅନ୍ୟ କୌଣସି କାରଣ ଯୋଗୁଁ ଦୁର୍ଘଟଣାଗ୍ରସ୍ତ ହୋଇଥିଲା ତାହା ବର୍ତ୍ତମାନ ସ୍ପଷ୍ଟ ହୋଇନାହିଁ। ନ୍ୟୁୟର୍କ ଟାଇମ୍ସର ଏକ ରିପୋର୍ଟ ଅନୁଯାୟୀ, ଦୁର୍ଘଟଣା ସମ୍ପର୍କରେ ଦୁଇଜଣ ଅଧିକାରୀ ନିଶ୍ଚିତ କରିଛନ୍ତି। ତେବେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରଶାସନ ପକ୍ଷରୁ ଏପର୍ଯ୍ୟନ୍ତ ଏହି ବିଷୟରେ କୌଣସି ସରକାରୀ ବିବୃତି ଜାରି କରାଯାଇନାହିଁ। ଆମେରିକାର କେନ୍ଦ୍ରୀୟ କମାଣ୍ଡ ସେଣ୍ଟକମ୍ ଏହି ଘଟଣା ଉପରେ କୌଣସି ମନ୍ତବ୍ୟ ଦେଇନାହିଁ।
ହେଲିକପ୍ଟର ଖସିପଡ଼ିଥିବା ରିପୋର୍ଟ ହୋଇଛି
ଯୁଦ୍ଧ ଆରମ୍ଭ ହେବା ପରଠାରୁ, କିଛି ଆମେରିକା କିଛି ବିମାନ ଶତ୍ରୁପକ୍ଷର କାର୍ଯ୍ୟକଳାପ କିମ୍ବା ଦୁର୍ଘଟଣାବଶତଃ ହରାଇଛି। ତଥାପି, ଏହି ସଂଘର୍ଷରେ ପ୍ରଥମ ଥର ପାଇଁ ଆପାଚେ ହେଲିକପ୍ଟର ଖସିପଡ଼ିଥିବା ରିପୋର୍ଟ ହୋଇଛି। ଆମେରିକା ସେନା ଏହି ଅଞ୍ଚଳରେ ବିଭିନ୍ନ ପ୍ରକାରର ଅସ୍ତ୍ରଶସ୍ତ୍ର ଏବଂ ବିମାନ ବ୍ୟବହାର କରୁଛି। ସେସବୁ ମଧ୍ୟରେ ଆପାଚେ ହେଲିକପ୍ଟର, ଏମକ୍ୟୁ-୯ ରିପର ଡ୍ରୋନ ଏବଂ ଏଫ/ଏ-୧୮ ଏବଂ ଏଫ୍-୩୫ ଲଢୁଆ ବିମାନ ଅନ୍ତର୍ଭୁକ୍ତ। ଏଗୁଡ଼ିକୁ ହର୍ମୁଜ୍ ପ୍ରଣାଳୀରେ ଇରାନର କାର୍ଯ୍ୟକଳାପ ଏବଂ ପ୍ରଭାବକୁ ପ୍ରତିହତ କରିବା ପାଇଁ ବ୍ୟବହାର କରାଯାଉଛି। ରିପୋର୍ଟ ଅନୁଯାୟୀ, ଇରାନ ଏପର୍ଯ୍ୟନ୍ତ ପ୍ରାୟ ୩୦ ରିପର ଡ୍ରୋନ୍କୁ ଖସାଇ ଦେଇଛି।
ଏଏଚ୍-୬୪ ଆପାଚେ ହେଲିକପ୍ଟରକୁ ବିଶ୍ୱର ସବୁଠାରୁ ଘାତକ ଏବଂ ଶକ୍ତିଶାଳୀ ଯୁଦ୍ଧ ହେଲିକପ୍ଟର ମଧ୍ୟରୁ ଗୋଟିଏ ବୋଲି ବିବେଚନା କରାଯାଏ। ଏହା ହେଲଫାୟାର ମିସାଇଲରେ ସଜ୍ଜିତ ଏବଂ ଡ୍ରୋନ୍କୁ ଖସାଇବା, ଛୋଟ ଡଙ୍ଗା ଆକ୍ରମଣରୁ ରକ୍ଷା କରିବା ପାଇଁ ବ୍ୟବହୃତ ହୋଇଥାଏ। ସାମ୍ପ୍ରତିକ ମାସଗୁଡ଼ିକରେ, ଏହି ହେଲିକପ୍ଟରଗୁଡ଼ିକ ଇରାନ ଏବଂ ଉପସାଗରୀୟ ଅଞ୍ଚଳ ନିକଟବର୍ତ୍ତୀ ଅଞ୍ଚଳରେ ଅଧିକ ସକ୍ରିୟ ହୋଇଛନ୍ତି। ଏପ୍ରିଲରେ, ଇରାନ ଏକ ଆମେରିକୀୟ ଏଫ-୧୫-ଏ ଷ୍ଟ୍ରାଇକ୍ ଇଗଲ୍ ବିମାନକୁ ଗୁଳି କରି ଖସାଇ ଦେଇଥିଲା। ଇରାନରୁ ଆମେରିକା ନିଜର ଦୁଇ ଜଣ କ୍ରୁ ସଦସ୍ୟଙ୍କୁ ଉଦ୍ଧାର କରିଥିଲା ।
ସୌଜନ୍ୟ ସମ୍ବାଦ
