ନୂଆଦିଲ୍ଲୀ/ମସ୍କୋ, ୨୭/୩: ମଧ୍ୟପ୍ରାଚ୍ୟରେ ଜାରି ରହିଥିବା ଇରାନ ଯୁଦ୍ଧ ଓ ହର୍ମୁଜ ପ୍ରଣାଳୀରେ ସୃଷ୍ଟି ହୋଇଥିବା ଅସ୍ଥିରତା ବିଶ୍ୱ ଶକ୍ତି ବଜାରର ସମୀକରଣକୁ ସମ୍ପୂର୍ଣ୍ଣ ବଦଳାଇ ଦେଇଥିବା ବେଳେ ଏହାର ସର୍ବାଧିକ ଫାଇଦା ରୁଷକୁ ମିଳିଥିବା ଦେଖାଯାଉଛି। ଉପସାଗରୀୟ ଦେଶଗୁଡ଼ିକରୁ ତୈଳ ଯୋଗାଣ ବାଧାପ୍ରାପ୍ତ ହେବା ଫଳରେ ଭାରତୀୟ ରିଫାଇନାରୀଗୁଡ଼ିକ ପୁଣିଥରେ ରୁଷୀୟ ଅଶୋଧିତ ତୈଳ ଉପରେ ଅଧିକ ନିର୍ଭରଶୀଳ ହୋଇପଡ଼ିଛନ୍ତି, ଯାହାଫଳରେ ୨୦୨୬ ମାର୍ଚ୍ଚ ମାସରେ ଭାରତର ରୁଷୀୟ ତୈଳ ଆମଦାନୀ ପ୍ରାୟ ୨ ନିୟୁତ ବ୍ୟାରେଲର ସର୍ବକାଳୀନ ସର୍ବାଧିକ ସ୍ତରରେ ପହଞ୍ଚିଛି।
ଅନ୍ୟପଟେ, ରୁଷୀୟ ତୈଳ ରପ୍ତାନି ବନ୍ଦ କରିବା ପାଇଁ ଆମେରିକାର ପ୍ରୟାସ ବିଫଳ ହେବା ସହ ଆନ୍ତର୍ଜାତୀୟ ବଜାରରେ ତୈଳ ଦର ବ୍ୟାରେଲ ପିଛା ୧୦୪ ଡଲାର ଅତିକ୍ରମ କରିଥିବାରୁ ମସ୍କୋ ଏବେ ଦୈନିକ ୧୫୦ ମିଲିୟନ ଡଲାରରୁ ଅଧିକ ଅତିରିକ୍ତ ରାଜସ୍ୱ ପାଇ ନିଜର ଜାତୀୟ ସମ୍ପତ୍ତି ପାଣ୍ଠିକୁ ସୁଦୃଢ଼ କରିବାରେ ଲାଗିଛି, ଯାହା ପୁଟିନଙ୍କୁ ୟୁକ୍ରେନ ବିଜୟ ପାଇଁ ଆବଶ୍ୟକ ଆର୍ଥିକ ଶକ୍ତି ଯୋଗାଇଛି।
ୟୁକ୍ରେନ ଯୁଦ୍ଧ ପାଇଁ ସୁଦୃଢ଼ ହେଲା ପୁଟିନଙ୍କ ପାଣ୍ଠି
ଆନ୍ତର୍ଜାତୀୟ ତୈଳ ବଜାର ଉପରେ ନଜର ରଖୁଥିବା ସଂସ୍ଥା ‘କେପ୍ଲର’ରୁ ମିଳିଥିବା ତଥ୍ୟ ଓ ମାନଚିତ୍ର ଅନୁଯାୟୀ, ରୁଷୀୟ ଅଶୋଧିତ ତୈଳ ବହନ କରୁଥିବା ଶତାଧିକ ଟ୍ୟାଙ୍କର ଏବେ ୟୁରୋପ ପରିବର୍ତ୍ତେ ଦ୍ରୁତ ଗତିରେ ଏସିଆ ଅଭିମୁଖେ ଯାଉଛନ୍ତି। ବିଶେଷ କରି ଚୀନ ଓ ପୂର୍ବ ଏସିଆକୁ ଯାଉଥିବା ଅନେକ ବିଶାଳକାୟ ଟ୍ୟାଙ୍କର ସମୁଦ୍ର ମଧ୍ୟଭାଗରେ ନିଜର ଗତିପଥ ବଦଳାଇ ଭାରତ ଆଡ଼କୁ ମୁହାଁଇଛନ୍ତି, ଯାହାର ଏକ ବଡ଼ ଉଦାହରଣ ହେଉଛି ‘’ଆକ୍ୱା ଟାଇଟାନ୍’’ ଜାହାଜର ମାଙ୍ଗାଲୋର ବନ୍ଦରରେ ଆଗମନ। ଭାରତ ଚଳିତ ମାସରେ ପ୍ରାୟ ୬୦ ନିୟୁତ ବ୍ୟାରେଲ ତେଲ ଆମଦାନୀ କରିବାକୁ ଲକ୍ଷ୍ୟ ରଖିଥିବା ବେଳେ ଚୀନ ମଧ୍ୟ ରୁଷ ଓ ଇରାନଠାରୁ ଶସ୍ତାରେ ତେଲ କିଣି ନିଜର ଭଣ୍ଡାର ପୂର୍ଣ୍ଣ କରିବାରେ ଲାଗିଛି। ସାମୁଦ୍ରିକ ପଥରେ ଅନିଶ୍ଚିତତାକୁ ଏଡାଇବା ପାଇଁ ବେଜିଂ ଏବେ ‘ପାୱାର ଅଫ୍ ସାଇବେରିଆ ୨’ ପାଇପଲାଇନ ମାଧ୍ୟମରେ ରୁଷରୁ ପ୍ରତ୍ୟକ୍ଷ ଭାବେ ଇନ୍ଧନ ଆଣିବାକୁ ଅଧିକ ପ୍ରାଥମିକତା ଦେଉଛି।
ତୈଳ ବଜାରରେ ରୁଷର ଏଭଳି ପ୍ରଭାବ ସତ୍ତ୍ୱେ ଏଲଏନଜି କ୍ଷେତ୍ରରେ କିଛିଟା ସୀମିତତା ପରିଲକ୍ଷିତ ହୋଇଛି। ୟୁରୋପରେ ପ୍ରାକୃତିକ ଗ୍ୟାସ ମୂଲ୍ୟ ବୃଦ୍ଧି ପାଇଥିଲେ ହେଁ, ରୁଷ ସମସ୍ତ ଏସୀୟ ଦେଶର ବର୍ଦ୍ଧିତ ଚାହିଦାକୁ ସମ୍ପୂର୍ଣ୍ଣ ପୂରଣ କରିପାରୁ ନାହିଁ। ଏହାର ମୁଖ୍ୟ କାରଣ ହେଉଛି ଏଲଏନଜି ବ୍ୟବସାୟର ଦୀର୍ଘକାଳୀନ ଚୁକ୍ତିନାମା, ଯାହା ଯୋଗୁଁ ଏସୀୟ ଦେଶଗୁଡ଼ିକ ଏବେ ମଧ୍ୟ ନିଜର ୯୦ ପ୍ରତିଶତ ଗ୍ୟାସ ଆବଶ୍ୟକତା ପାଇଁ ମଧ୍ୟପ୍ରାଚ୍ୟ ଉପରେ ନିର୍ଭରଶୀଳ ରହିଛନ୍ତି। ତଥାପି, ପଶ୍ଚିମା ପ୍ରତିବନ୍ଧକକୁ ବେଖାତିର କରି ଏସୀୟ ବଜାରରେ ରୁଷର ଏହି ବର୍ଦ୍ଧିତ ଦବଦବା ବିଶ୍ୱ ଅର୍ଥନୀତିରେ ଏକ ନୂତନ ଶକ୍ତି ସମୀକରଣକୁ ଜନ୍ମ ଦେଇଛି।
ସୌଜନ୍ୟ ସମ୍ବାଦ
-
-
-
-
-
