US-Iran war: ପାକିସ୍ତାନରେ ଶକ୍ତି ସଙ୍କଟ: ରାତି ୮ଟାରେ ବଜାର ବନ୍ଦ କରିବାକୁ ନିର୍ଦ୍ଦେଶ
ଇସଲାମାବାଦ:ପାକିସ୍ତାନର ରାଜଧାନୀ ଇସଲାମାବାଦରେ ବ୍ୟବସାୟ ପ୍ରତିଷ୍ଠାନଗୁଡ଼ିକ ପାଇଁ ଏକ ନୂତନ ବନ୍ଦ ସମୟସାରଣୀ ଲାଗୁ କରାଯାଇଛି। ଯାହା ଅନୁଯାୟୀ ରାତି ୮ଟା ସୁଦ୍ଧା ବ୍ୟବସାୟ ପ୍ରତିଷ୍ଠାନଗୁଡ଼ିକୁ ବନ୍ଦ କରିବା ବାଧ୍ୟତାମୂଳକ କରାଯାଇଛି। ପଶ୍ଚିମ ଏସିଆରେ ଚାଲିଥିବା ସଂଘର୍ଷ ଯୋଗୁଁ ଶକ୍ତି ମୂଲ୍ୟ ବୃଦ୍ଧି ପାଇଥିବାରୁ ଏହି ପଦକ୍ଷେପ ନିଆଯାଇଛି। ଡେପୁଟି କମିସନର ଇରଫାନ ମେମନଙ୍କ ନେତୃତ୍ୱରେ ଜିଲ୍ଲା ପ୍ରଶାସନ ସୋସିଆଲ ମିଡିଆରେ ଘୋଷଣା କରିଛି ଯେ, ଏଣିକି ନୂତନ ବଜାର ବନ୍ଦ ସମୟ ଲାଗୁ ହେବ। ବଜାରଗୁଡ଼ିକ ରାତି ୮ଟା ସୁଦ୍ଧା ବନ୍ଦ ହେବା ଆବଶ୍ୟକ, ଯେତେବେଳେ ରେଷ୍ଟୁରାଣ୍ଟ ଏବଂ ଜେତରାତି ଦୋକାନଗୁଡ଼ିକ ରାତି ୧୦ଟା ପର୍ଯ୍ୟନ୍ତ ଖୋଲା ରହିପାରିବ।
ଇସଲାମାବାଦ ଜିଲ୍ଲା ପ୍ରଶାସନ ଖର୍ଚ୍ଚ ହ୍ରାସ ପଦକ୍ଷେପର ଅଂଶ ସ୍ୱରୂପ ସଂଶୋଧିତ ବ୍ୟବସାୟ ସମୟ ଲାଗୁ କରିଛି। ବଜାର, ଦୋକାନ ଏବଂ ସପିଂ ମଲ୍ ରାତି ୮ ଟାରେ ବନ୍ଦ ହୋଇଯିବ, ଯେତେବେଳେ ରେଷ୍ଟୁରାଣ୍ଟ, ତେଜରାତି ଦୋକାନ, ବେକରି ଏବଂ ଅନ୍ୟାନ୍ୟ ଖାଇବା ସ୍ଥାନ ରାତି ୧୦ଟା ପର୍ଯ୍ୟନ୍ତ ଖୋଲା ରହିବ। ଏଥିରେ ଆହୁରି କୁହାଯାଇଛି, ବିବାହ ହଲ୍, ମାର୍କି ଏବଂ ଅନ୍ୟାନ୍ୟ କାର୍ଯ୍ୟକ୍ରମ ସ୍ଥାନଗୁଡ଼ିକ ମଧ୍ୟ ରାତି ୧୦ଟାରେ ବନ୍ଦ ହେବ। ଔଷଧ ଦୋକାନ, ହସ୍ପିଟାଲ, ପେଟ୍ରୋଲ ପମ୍ପ, କ୍ଷୀର ଦୋକାନ, କ୍ରୀଡା ସୁବିଧା, କଲ୍ ସେଣ୍ଟର ଏବଂ ଆନ୍ତର୍ଜାତୀୟ ଗ୍ରାହକମାନଙ୍କୁ ସେବା ପ୍ରଦାନ କରୁଥିବା ଆଇଟି କମ୍ପାନିଗୁଡ଼ିକ ସମେତ ଅତ୍ୟାବଶ୍ୟକୀୟ ସେବାଗୁଡ଼ିକୁ ଏହି କଟକଣାରୁ ମୁକ୍ତ କରାଯିବ।
ବିଦ୍ୟୁତ୍ ବ୍ୟବହାର ହ୍ରାସ କରିବା ପାଇଁ ସରକାରଙ୍କ କଠୋର ପଦକ୍ଷେପ
ଏହି କଟକଣାଗୁଡ଼ିକ ବ୍ୟକ୍ତିଗତ ସ୍ଥଳରେ ଆୟୋଜିତ କାର୍ଯ୍ୟକ୍ରମ ଏବଂ ସମାବେଶ ପାଇଁ ମଧ୍ୟ ପ୍ରଯୁଜ୍ୟ। ଇରାନ ଉପରେ ଆମେରିକା-ଇସ୍ରାଏଲ ଆକ୍ରମଣ ପରେ ଇନ୍ଧନ ମୂଲ୍ୟ ଦ୍ରୁତ ଗତିରେ ବୃଦ୍ଧି ପାଇବା ପରେ ମାର୍ଚ୍ଚ ମାସରେ କାର୍ଯ୍ୟ ସମୟ ହ୍ରାସ କରିବାର ନିଷ୍ପତ୍ତି ନିଆଯାଇଥିଲା। ସରକାର ବିଦ୍ୟୁତ୍ ବ୍ୟବହାର ହ୍ରାସ କରିବା ପାଇଁ କଠୋର ପଦକ୍ଷେପ ମଧ୍ୟ ନେଇଥିଲେ, ଯେଉଁଥିରେ ଦୋକାନଗୁଡ଼ିକୁ ଶୀଘ୍ର ବନ୍ଦ କରିବାକୁ ବାଧ୍ୟ କରାଯାଇଥିଲା। ବ୍ୟବସାୟୀ ଏବଂ ବ୍ୟବସାୟ ପ୍ରତିଷ୍ଠାନଗୁଡ଼ିକ ପାରମ୍ପରିକ ଭାବରେ ଏପରି ପଦକ୍ଷେପଗୁଡ଼ିକୁ ପ୍ରତିରୋଧ କରିଆସିଛନ୍ତି। କାରଣ ଅଧିକାଂଶ ବଜାର ସାଧାରଣତଃ ମଧ୍ୟାହ୍ନରେ ଖୋଲିଥାଏ ଏବଂ ରାତି ପର୍ଯ୍ୟନ୍ତ ଖୋଲା ରହିଥାଏ। ମାତ୍ର ଏଭଳି ନିୟମ ଦ୍ବାରା ସେମାନଙ୍କର ବିକ୍ରିବଟା କମିଥିବା କୁହାଯାଉଛି।
ପାକିସ୍ତାନ ନିଜର ଶକ୍ତି ଆବଶ୍ୟକତା ପୂରଣ କରିବା ପାଇଁ ହର୍ମୁଜ୍ ପ୍ରଣାଳୀ ଉପରେ ନିର୍ଭର କରିଥାଏ। ସଙ୍କଟ ସମୟରେ ଏହାର କିଛି ଟ୍ୟାଙ୍କରକୁ ଏହା ଦେଇ ଯିବାକୁ ଅନୁମତି ଦିଆଯାଇଥିବା ବେଳେ, ବିଶ୍ୱ ସ୍ତରରେ ଶକ୍ତି ମୂଲ୍ୟ ବୃଦ୍ଧି ଯୋଗୁଁ ଉପଲବ୍ଧ ପେଟ୍ରୋଲ ଡିଜେଲ ତଥା ଏଲ୍ପିଜି ଅଧିକ ମୂଲ୍ୟରେ ବିକ୍ରି କରାଯାଉଛି।
ସୌଜନ୍ୟ ସମ୍ବାଦ
