Vigilance Raid: ଆୟ ବହିର୍ଭୂତ ସମ୍ପତ୍ତି ଅଭିଯୋଗ: କାରଖାନା ଓ ବଏଲର ସହକାରୀ ନିର୍ଦ୍ଦେଶକଙ୍କ ୭ ଠିକଣାରେ ଭିଜିଲାନ୍ସ ଚଢ଼ଉ

ଭିଜିଲାନ୍ସର ସୂଚନା ଅନୁଯାୟୀ, ଶ୍ରୀ ସାମନ୍ତରାୟଙ୍କ ଆୟ ଉତ୍ସ ତୁଳନାରେ ଅଧିକ ସମ୍ପତ୍ତି ଥିବା ଅଭିଯୋଗ ଆଧାରରେ ସମ୍ବଲପୁର ସ୍ୱତନ୍ତ୍ର ଭିଜିଲାନ୍ସ ବିଚାରପତିଙ୍କ ଦ୍ୱାରା ଜାରି ସର୍ଚ୍ଚ ୱାରେଣ୍ଟ ବଳରେ ଏହି ତଲାସି ଚାଲିଛି। ଚଢ଼ଉରେ ୮ ଜଣ ଡିଏସ୍‌ପି, ୧୧ ଜଣ ଇନ୍ସପେକ୍ଟର, ୧୧ ଜଣ ଏଏସ୍‌ଆଇଙ୍କ ସମେତ ଅନ୍ୟ ସହାୟକ କର୍ମଚାରୀ ସାମିଲ ହୋଇଛନ୍ତି।

ତଲାସି ସମ୍ପୂର୍ଣ୍ଣ ହେବା ପରେ ମିଳିବ ସବିଶେଷ ତଥ୍ୟ

ଭିଜିଲାନ୍ସ ଟିମ୍‌ ସମ୍ବଲପୁର ଧନକଉଡ଼ାସ୍ଥିତ ସନ୍‌ ସିଟି ଆପାର୍ଟମେଣ୍ଟରେ ଥିବା ତାଙ୍କ ୩ ବିଏଚ୍‌କେ ଫ୍ଲାଟ୍‌, ଭୁବନେଶ୍ୱର ନନ୍ଦନକାନନ ରୋଡ୍‌ ନନ୍ଦନ ବିହାରସ୍ଥିତ ଡୁପ୍ଲେକ୍ସ, ଜଟଣୀ ନିକଟ ବାରକୁଦାରେ ଇଣ୍ଡସ୍‌ କଲେଜ ଅଫ୍‌ ଇଞ୍ଜିନିୟରିଂ ନିକଟସ୍ଥ ତାଙ୍କ କୋଠାରେ ତଲାସି କରୁଛି।ସେହିପରି ପୁରୀ ବାଲିଗୁଆଳିର ଟୋଟା ବେହେରା ସାହିରେ ଥିବା ୩ ମହଲା କୋଠା, ଖୋର୍ଦ୍ଧାଜିଲ୍ଲା ବାଲୁଗାଁ ସୁବାସ ମାର୍ଗରେ ଥିବା ୨ ମହଲା କୋଠା ଏବଂ ବାଲୁଗାଁ ଅଶୋକ ନଗରସ୍ଥିତ ତାଙ୍କ ପୈତୃକ ସ୍ଥାନରେ ଥିବା ୨ ମହଲା କୋଠାରେ ମଧ୍ୟ ଏକକାଳୀନ ତଲାସି ଚାଲିଛି।

ଏହା ସହ ସମ୍ବଲପୁରସ୍ଥିତ କାରଖାନା ଓ ବଏଲର ଉପନିର୍ଦ୍ଦେଶକଙ୍କ କାର୍ଯ୍ୟାଳୟରେ ଥିବା ଶ୍ରୀ ସାମନ୍ତରାୟଙ୍କ ଅଫିସ୍‌ କକ୍ଷରେ ମଧ୍ୟ ଭିଜିଲାନ୍ସ ଟିମ୍‌ ତଲାସି କରୁଛି। ଶେଷ ଖବର ସୁଦ୍ଧା ଚଢ଼ଉ ଓ ସମ୍ପତ୍ତିର ଯାଞ୍ଚ ଜାରି ରହିଛି। ତଲାସି ସମ୍ପୂର୍ଣ୍ଣ ହେବା ପରେ ଠାବ ହୋଇଥିବା ସମ୍ପତ୍ତି, ନଗଦ ଅର୍ଥ, ବ୍ୟାଙ୍କ ଜମା ଓ ଅନ୍ୟାନ୍ୟ ନିବେଶ ସମ୍ପର୍କରେ ସବିଶେଷ ତଥ୍ୟ ମିଳିବ ବୋଲି ଜଣାପଡ଼ିଛି।