ସଂଘର୍ଷରୁ ସଫଳତା; ରିସେପ୍ସନିଷ୍ଟରୁ ହୋଇଗଲେ PepsiCoର CEO

ଚେନ୍ନାଇ : ସଫଳତା କେବେ ବି ଗୋଟିଏ ରାତିରେ ମିଳେନି। ଏହା ପଛରେ ଥାଏ ଅନେକ ଅନିଦ୍ରା ରାତି, ଅସଂଖ୍ୟ ସଂଘର୍ଷ ଓ ଅଦମ୍ୟ ଇଚ୍ଛାଶକ୍ତି। ସଫଳତାର ପଛରେ ଥାଏ କଠିନ ପରିଶ୍ରମ, ଧୈର୍ଯ୍ୟ ଓ ସଂଘର୍ଷର କାହାଣୀ। ଆଜି ବିଶ୍ୱର ସଫଳତମ କର୍ପୋରେଟ୍ ନେତାଙ୍କ ମଧ୍ୟରେ ଗଣାଯାଉଥିବା ବିଶ୍ୱର ଅଗ୍ରଣୀ କମ୍ପାନି PepsiCoର ପୂର୍ବତନ CEO ଇନ୍ଦ୍ରା ନୁୟୀଙ୍କ ଜୀବନ ମଧ୍ୟ ଏଭଳି ସଂଘର୍ଷମୟ ଥିଲା । ବିଦେଶରେ ଉଚ୍ଚଶିକ୍ଷାର ସ୍ୱପ୍ନ ପୂରଣ କରିବା ପାଇଁ ସେ ରାତିସାରା ରିସେପ୍ସନିଷ୍ଟ ଭାବେ କାମ କରୁଥିଲେ। ସକାଳ ୫ଟାରେ ଡ୍ୟୁଟି ଶେଷ କରି ସିଧା କ୍ଲାସ୍କୁ ଯାଉଥିଲେ। ସେହି କଠିନ ଦିନଗୁଡ଼ିକ ହିଁ ତାଙ୍କୁ ଗଢ଼ିଥିଲା ବିଶ୍ୱର ଅନ୍ୟତମ ପ୍ରଭାବଶାଳୀ ବ୍ୟବସାୟିକ ନେତ୍ରୀ ଭାବେ। ଆଜି ଯିଏ ବିଶ୍ୱର ସଫଳ ବ୍ୟବସାୟିକ ନେତୃତ୍ୱର ମୁହଁ, ସେ ବି କେବେ ନିଜ ପଢ଼ା ଖର୍ଚ୍ଚ ଯୋଗାଡ଼ କରିବା ପାଇଁ ରାତିସାରା ରିସେପ୍ସନିଷ୍ଟ ଭାବେ କାମ କରୁଥିଲେ।

ଭାରତର ଚେନ୍ନାଇରେ ଜନ୍ମ ହୋଇଥିବା ଇନ୍ଦ୍ରା ନୁୟୀ ଛୋଟବେଳୁ ଜଣେ ଭଲ ମେଧାବୀ ଥିଲେ । ସେ ମାଦ୍ରାସ କ୍ରିଷ୍ଟିଆନ୍ କଲେଜରୁ ସ୍ନାତକ ହାସଲ କରିବା ପରେ ଭାରତୀୟ ପ୍ରବନ୍ଧନ ସଂସ୍ଥାନ, କୋଲକାତାରୁ ମ୍ୟାନେଜମେଣ୍ଟ ପଢ଼ିଥିଲେ। ଉଚ୍ଚଶିକ୍ଷା ପାଇଁ ସେ ଆମେରିକାର ପ୍ରତିଷ୍ଠିତ ବ୍ୟବସାୟ ପରିଚାଳନା ଶିକ୍ଷାନୁଷ୍ଠାନ ‘ୟେଲ୍ ସ୍କୁଲ୍ ଅଫ୍ ମ୍ୟାନେଜମେଣ୍ଟ’ରେ ଭର୍ତ୍ତି ହୋଇଥିଲେ। କିନ୍ତୁ ବିଦେଶରେ ପଢ଼ିବା ସହଜ ନଥିଲା। ଇନ୍ଦ୍ରା କହିଥିଲେ, “ମୁଁ ମୋ ସମସ୍ତ ଶକ୍ତି ଲଗାଇ ପରିଶ୍ରମ କରିଥିଲି । କାରଣ ମୁଁ ସେଠାକୁ ସାମାଜିକ ଜୀବନ ଉପଭୋଗ କରିବାକୁ ଯାଇନଥିଲି, ବରଂ ପଢ଼ିବା, କଠିନ ପରିଶ୍ରମ କରିବା ଏବଂ ଜୀବନରେ ଆଗକୁ ବଢ଼ିବା ପାଇଁ ଯାଇଥିଲି ।” ସେହି ସମୟରେ ୟେଲ୍ ବିଶ୍ୱବିଦ୍ୟାଳୟର ବାର୍ଷିକ ଶିକ୍ଷା ଫି ବର୍ତ୍ତମାନର ମୂଲ୍ୟ ଅନୁଯାୟୀ ପ୍ରାୟ ୨୦ ହଜାର ଆମେରିକୀୟ ଡଲାର ଥିଲା ଅର୍ଥାତ୍ ଭାରତୀୟ ମୁଦ୍ରାର ୨୦ ଲକ୍ଷ ଟଙ୍କା ସମାନ ଥିଲା। ଇନ୍ଦ୍ରା କହିଥିଲେ ଯେ, ତାଙ୍କ ବାପା-ମା’ ଏତେ ବଡ଼ ଖର୍ଚ୍ଚ ବହନ କରିବାକୁ ସକ୍ଷମ ନଥିଲେ। ସେଥିପାଇଁ ଉଚ୍ଚଶିକ୍ଷା ଜାରି ରଖିବାକୁ ସେ ଦିନରେ ପାଠ ପଢୁଥିଲେ ଏବଂ ରାତିରେ କାମ କରି ନିଜର ଶିକ୍ଷା ପାଇଁ ଖର୍ଚ୍ଚ ଯୋଗାଡ଼ କରୁଥିଲେ।

ଶିକ୍ଷା ଓ ଜୀବନଯାପନର ଖର୍ଚ୍ଚ ବହନ କରିବା ପାଇଁ ସେ ରାତିରେ ରିସେପ୍ସନିଷ୍ଟ ଭାବେ କାମ କରୁଥିଲେ। ଅନେକ ସମୟରେ ସକାଳ ୫ଟା ପର୍ଯ୍ୟନ୍ତ ଡ୍ୟୁଟି କରି ପୁଣି କ୍ଲାସ୍କୁ ଯାଉଥିଲେ। ଇନ୍ଦ୍ରା ନୁୟୀ ନିଜେ ବିଭିନ୍ନ ସାକ୍ଷାତକାରରେ କହିଛନ୍ତି ଯେ, ସେହି ସଂଘର୍ଷର ଦିନଗୁଡ଼ିକ ତାଙ୍କୁ ସମୟର ମୂଲ୍ୟ, ଶୃଙ୍ଖଳା ଓ କଠିନ ପରିଶ୍ରମର ମହତ୍ତ୍ୱ ଶିଖାଇଥିଲା। ପଢ଼ା ଶେଷ କରିବା ପରେ ସେ Boston Consulting Group, Motorola ଏବଂ Asea Brown Boveri ଭଳି ପ୍ରତିଷ୍ଠିତ କମ୍ପାନିରେ କାମ କରିଥିଲେ। ୧୯୯୪ ମସିହାରେ ସେ PepsiCoରେ ଯୋଗ ଦେଇଥିଲେ। ନିଜ ଦୂରଦର୍ଶୀ ଓ ବ୍ୟବସାୟିକ ଦକ୍ଷତା ବଳରେ ସେ ୨୦୦୬ ମସିହାରେ PepsiCoର CEO ହୋଇଥିଲେ। ତାଙ୍କ ନେତୃତ୍ୱରେ କମ୍ପାନି ସ୍ୱାସ୍ଥ୍ୟକର ଖାଦ୍ୟପଦାର୍ଥ, ନବୀନ ଉତ୍ପାଦ ଓ ବିଶ୍ୱବ୍ୟାପୀ ବ୍ୟବସାୟ ବିସ୍ତାର ଉପରେ ଗୁରୁତ୍ୱ ଦେଇଥିଲା। “ସ୍ୱପ୍ନ ବଡ଼ ହେଲେ ସଂଘର୍ଷ ମଧ୍ୟ ବଡ଼ ହୋଇଥାଏ। କିନ୍ତୁ ପରିଶ୍ରମ ଓ ଧୈର୍ଯ୍ୟ ଥିଲେ ସଫଳତା ନିଶ୍ଚିତ ମିଳିଥାଏ ।”

ଆଜି ଇନ୍ଦ୍ରା ନୁୟୀଙ୍କ କାହାଣୀ କେବଳ କର୍ପୋରେଟ୍ ଜଗତର ନୁହେଁ, ବରଂ ଲକ୍ଷ ଲକ୍ଷ ଛାତ୍ରଛାତ୍ରୀ ଓ ଯୁବପିଢ଼ିଙ୍କ ପାଇଁ ପ୍ରେରଣାଦାୟକ ଅଟେ | ସେ ପ୍ରମାଣ କରିଛନ୍ତି ଯେ ପରିସ୍ଥିତି ଯେତେ କଠିନ ହେଉ ପଛେ , ଦୃଢ଼ ସଙ୍କଳ୍ପ ଓ ଅକ୍ଲାନ୍ତ ପରିଶ୍ରମ ସଫଳତାର ପଥ ଖୋଲିଦିଏ। ରାତି ଅନିଦ୍ରା ହୋଇ କାମ କରି ପଢ଼ା ଖର୍ଚ୍ଚ ଯୋଗାଡ଼ କରୁଥିବା ଜଣେ ଛାତ୍ରୀରୁ ବିଶ୍ୱର ସର୍ବବୃହତ କମ୍ପାନୀର CEO ପର୍ଯ୍ୟନ୍ତର ଇନ୍ଦ୍ରା ନୁୟୀଙ୍କ ଜୀବନ ଯାତ୍ରା ଦେଖାଏ ଯେ ସଫଳତା ପାଇଁ ପ୍ରତିଭା ସହ କଠିନ ପରିଶ୍ରମ ଓ ମନୋବଳ ମଧ୍ୟ ସମାନ ଭାବେ ଆବଶ୍ୟକ। ସ୍ୱପ୍ନକୁ ସାକାର କରିବା ପାଇଁ ପରିଶ୍ରମର କୌଣସି ବିକଳ୍ପ ନାହିଁ। ଇନ୍ଦ୍ରା ନୁୟୀଙ୍କ ଏହି ସଂଘର୍ଷମୟ ଯାତ୍ରା ଆଜି ମଧ୍ୟ ସମଗ୍ର ବିଶ୍ୱର ଯୁବପିଢ଼ିଙ୍କୁ ଆଗକୁ ବଢ଼ିବାର ପ୍ରେରଣା ଦେଇଛି ।

ସୌଜନ୍ୟ Prameya News7