LPG gas: କଳାବଜାର ବିରୋଧରେ କାର୍ଯ୍ୟାନୁଷ୍ଠାନ ନିଅ: କେନ୍ଦ୍ର

ସୂଚନା ଓ ପ୍ରସାରଣ ମନ୍ତ୍ରଣାଳୟର ଯୁଗ୍ମ ସଚିବ ସି ସେନ୍ଥିଲ୍‌ ରାଜନ୍‌ କହିଛନ୍ତି ଯେ କଳାବଜାର ରୋକିବାକୁ ରାଜ୍ୟମାନଙ୍କୁ କୁହାଯାଇଛି। ଏଥିସହିତ ରାଜ୍ୟଗୁଡ଼ିକ ଜଣେ ଲେଖାଏଁ ମୁଖପାତ୍ର ନିଯୁକ୍ତ କରିବେ। ସେ ଯାଞ୍ଚ ହୋଇଥିବା ସୂଚନାକୁ ନିୟମିତ ଜନସାଧାରଣଙ୍କ ନିକଟରେ ପହଞ୍ଚାଇବେ। ଭୁଲ ତଥ୍ୟର ପ୍ରଚାର ରୋକିବା ଲାଗି ସେ ଗଣମାଧ୍ୟମ ସଂସ୍ଥାର ସହଯୋଗ ଲୋଡ଼ିଛନ୍ତି ଓ ସେମାନଙ୍କୁ ସ୍ଥାନୀୟ କର୍ତ୍ତୃପକ୍ଷଙ୍କ ସହ ମିଶି କାମ କରିବାକୁ କହିଛନ୍ତି। ଅନ୍ୟପକ୍ଷରେ ପେଟ୍ରୋଲିୟମ ଓ ପ୍ରାକୃତିକ ଗ୍ୟାସ୍‌ ମନ୍ତ୍ରଣାଳୟ କହିଛି ଯେ ଆତଙ୍କିତ ହେବାର କୌଣସି କାରଣ ନାହିଁ। ବୁକିଂ ମଧ୍ୟରେ ସର୍ବନିମ୍ନ ବ୍ୟବଧାନ ୨୧ ଦିନରୁ ବଢ଼ାଇ ୨୫ ଦିନ କରାଯାଇଛି। ତଥାପି ଗ୍ରାହକମାନେ ଆତଙ୍କିତ ହୋଇ ବୁକିଂ କରୁଛନ୍ତି। ଏଭଳି ସ୍ଥିତି ସତ୍ତ୍ବେ ଗ୍ୟାସ୍‌ ଯୋଗାଣ ସ୍ବାଭାବିକ ରହିଛି।

ଆତଙ୍କିତ ହୋଇ ଗ୍ୟାସ୍‌ ବୁକିଂ ନ କରିବାକୁ ପରାମର୍ଶ
ଏଲ୍‌ପିଜି ଭର୍ତ୍ତି ଜାହାଜ ୨-୩ ଦିନରେ ପହଞ୍ଚିବ

ବିତରକ ସ୍ତରରେ ବିଭ୍ରାଟ ରୋକିବାକୁ ଡେଲିଭରି ପ୍ରମାଣୀକରଣ କୋଡ୍ (ଡିଏସି) ବ୍ୟବସ୍ଥା ଲାଗୁ କରାଯାଇଛି। ଦେଶରେ ଏଲ୍‌ପିଜି ଉତ୍ପାଦନ ୨୫ ପ୍ରତିଶତ ବୃଦ୍ଧି ପାଇଛି। ଘରୋଇ ଗ୍ରାହକଙ୍କ ପାଖରେ ଏଲ୍‌ପିଜି ପହଞ୍ଚାଇବାକୁ ପ୍ରାଥମିକତା ଦିଆଯାଉଛି। ଏହା ବ୍ୟତୀତ ହସ୍ପିଟାଲ୍ ଓ ଶିକ୍ଷାନୁଷ୍ଠାନଗୁଡ଼ିକୁ ମଧ୍ୟ ଯୋଗାଣ ଜାରି ରହିଛି। ବାଣିଜ୍ୟିକ ପ୍ରତିଷ୍ଠାନଗୁଡ଼ିକର ଆବଶ୍ୟକତାକୁ ବୁଝିବା ପାଇଁ ତିନି ତୈଳ କମ୍ପାନି ଭାରତୀୟ ତୈଳ ନିଗମ, ଭାରତ ପେଟ୍ରୋଲିୟମ୍ ଓ ହିନ୍ଦୁସ୍ତାନ ପେଟ୍ରୋଲିୟମ୍‌ର କାର୍ଯ୍ୟନିର୍ବାହୀ ଅଧିକାରୀ (ଇଡି)ମାନଙ୍କୁ ନେଇ ଏକ କମିଟି ଗଠନ କରାଯାଇଥିବା ମନ୍ତ୍ରଣାଳୟ ପକ୍ଷରୁ କୁହାଯାଇଛି।

ମିଳିଥିବା ତଥ୍ୟ ଅନୁସାରେ, ଭାରତ ଅଭିମୁଖେ ଏଲ୍‌ପିଜି ଭର୍ତ୍ତି ଜାହାଜ ଆସୁଛି। ତାହା ୨-୩ ଦିନରେ ପହଞ୍ଚିବ। ନୂଆ ଏଲ୍‌ପିଜି ଆସିବା ପରେ ଯୋଗାଣ ଆହୁରି ସ୍ବାଭାବକ ହେବ। ଭାରତ ବର୍ତ୍ତମାନ ଏହାର ଆବଶ୍ୟକତାର ୬୦ ପ୍ରତିଶତ ଏଲ୍‌ପିଜି ଆମଦାନି କରୁଛି। ସେଥିରୁ ୯୦ ପ୍ରତିଶତ ଗ୍ୟାସ୍‌ ଯୁଦ୍ଧ ଦ୍ବାରା ପ୍ରଭାବିତ ଜଳପଥ ହର୍ମୁଜ ପ୍ରଣାଳୀ ଦେଇ ଆସୁଛି। ଏଲ୍‌ପିଜି ଦରବୃଦ୍ଧିର ଏକ ବଡ଼ ଭାଗକୁ ସରକାର ନିଜେ ବହନ କରିବାକୁ ନିଷ୍ପତ୍ତି ନେଇଥିଲେ। ନିକଟରେ ୧୪.୨ କେଜି ବିଶିଷ୍ଟ ଗ୍ୟାସ୍‌ ସିଲିଣ୍ଡର ମୂଲ୍ୟ‌ରେ ୬୦ ଟଙ୍କାର ବୃଦ୍ଧି ହୋଇଛି। ତାହା ଦୈନିକ ୮୦ ପଇସାରୁ କମ୍‌। ଏବେବି ଭାରତର ଏଲ୍‌ପିଜି ଦର ଏହାର ପଡ଼ୋଶୀ ଦେଶଗୁଡ଼ିକଠାରୁ ଯଥେଷ୍ଟ କମ୍‌ ରହିଛି। ସରକାରୀ ସମର୍ଥନ ଯୋଗୁଁ ଉଜ୍ଜ୍ବଳା ଯୋଜନା ସିଲିଣ୍ଡର୍‌ ମୂଲ୍ୟ ୩୨ ପ୍ରତିଶତ ହ୍ରାସ ପାଇଛି। ତୈଳ କମ୍ପାନିଗୁଡ଼ିକର କ୍ଷତି ଭରଣା ପାଇଁ ସରକାର ୩୦ ହଜାର କୋଟି ଟଙ୍କାର ପ୍ୟାକେଜ୍‌ ମଞ୍ଜୁର କରିଥିବା ମନ୍ତ୍ରଣାଳୟ ସୂଚନା ଦେଇଛି।

ସୌଜନ୍ୟ ସମ୍ବାଦ