Lightning: କରାଚୀରେ ପ୍ରବଳ ବର୍ଷା ଓ ବଜ୍ରପାତରେ ୧୯ ମୃତ

କରାଚୀ: ପାକିସ୍ତାନର କରାଚୀରେ ପ୍ରବଳ ବର୍ଷା, ବଜ୍ରପାତ ଓ ପ୍ରବଳ ପବନ ଯୋଗୁଁ ବିଭିନ୍ନ ବର୍ଷା ସମ୍ବନ୍ଧୀୟ ଘଟଣାରେ ଅନ୍ୟୂନ ୧୯ ଜଣଙ୍କର ମୃତ୍ୟୁ ଘଟିଛି। ବୁଧବାର ରାତିରେ ପ୍ରବଳ ବର୍ଷା ଓ ପବନ ଯୋଗୁଁ ଛାତ ଓ କାନ୍ଥ ଭୁଶୁଡ଼ିବା, ବିଦ୍ୟୁତ୍ ଆଘାତ, ଗଛ ପଡ଼ିବା ଓ ସାଇନବୋର୍ଡ ଖସିବାରୁ ଲୋକ ମୃତାହତ ହୋଇଥିଲେ।

ପାକିସ୍ତାନ ପାଣିପାଗ ବିଭାଗ ଅଧିକ ବର୍ଷା ପାଗ ଓ ପ୍ରବଳ ପବନର ପୂର୍ବାନୁମାନ କରିଛି। କୋରଙ୍ଗିର ଏସ୍ଏସ୍‌ପି ସଂଘାର ମଲିକ କହିଛନ୍ତି, ଏକ ଟେଲିଫୋନ୍ ଏକ୍ସଚେଞ୍ଜର ଛାତ ଓ କାନ୍ଥ ଭୁଶୁଡ଼ି ପଡ଼ିବାରୁ ୧୨ ଜଣଙ୍କର ମୃତ୍ୟୁ ଘଟିଛି। ପ୍ରବଳ ପବନ, ବଜ୍ରପାତ ଓ ବର୍ଷା ଯୋଗୁଁ ସଇଦାବାଦ ଅଞ୍ଚଳର ମୋଚକୋ ଗୋଥ୍ ଭୁଶୁଡ଼ି ପଡ଼ିଛି। ଉଦ୍ଧାରକାରୀ ଦଳ ଏବେ ମଧ୍ୟ ଭଗ୍ନାବଶେଷ ସଫା କରୁଛନ୍ତି ଏବଂ ତଳେ ଅଧିକ ବଞ୍ଚିଥିବା ବ୍ୟକ୍ତି କିମ୍ବା ମୃତଦେହ ଥାଇପାରେ। ଅଧିକାଂଶ ବର୍ଷା ସମ୍ବନ୍ଧୀୟ ଘଟଣା ମହାନଗରର ତଳିଆ ଓ ନିମ୍ନ ଆୟକାରୀ ଅଞ୍ଚଳରେ ଘଟିଛି।

ଦକ୍ଷିଣ ପୁଲିସର ଡେପୁଟି ଇନ୍ସପେକ୍ଟର ଜେନେରାଲ୍ ଅସଦ ରଜା ଗୁରୁବାର ସକାଳେ ଗଣମାଧ୍ୟମକୁ କହିଛନ୍ତି ଯେ, କୋରଙ୍ଗିରେ ଅନ୍ୟ ମୃତାହତଙ୍କ ଖବର ମିଳିଛି, ଯେଉଁଠାରେ ଘରର ଛାତ ଭୁଶୁଡ଼ି ପଡ଼ିବାରୁ ଏକ ଦମ୍ପତିଙ୍କର ମୃତ୍ୟୁ ଘଟିଥିବା ବେଳେ ମାଲିରରେ ଦୁଇ ଜଣ ବ୍ୟକ୍ତି ବଜ୍ରପାତରେ ପ୍ରାଣ ହରାଇଛନ୍ତି। ସେ କହିଛନ୍ତି ଯେ ଲାଣ୍ଡି ଅଞ୍ଚଳର ମାଜିଦ୍ କଲୋନୀରେ ମଧ୍ୟ ମୃତାହତ ଖବର ମିଳିଥିବା ବେଳେ କ୍ଲିଫ୍ଟନ୍ ଅଞ୍ଚଳରେ ଏକ ଖସିପଡିଥିବା ଗଛ ଗଣ୍ଡି ତଳୁ ଜଣେ ମହିଳାଙ୍କ ମୃତଦେହ ଉଦ୍ଧାର କରାଯାଇଛି। କରାଚୀ ମେୟର ମୁର୍ତାଜା ୱାହାବ ଲୋକଙ୍କୁ ଘରେ ରହିବାକୁ ଏବଂ ବର୍ଷାପବନ ବେଳେ ଅନାବଶ୍ୟକ ଯାତ୍ରାରୁ ଦୂରେଇ ରହିବାକୁ ପରାମର୍ଶ ଦେଇଛନ୍ତି।

ସୌଜନ୍ୟ ସମ୍ବାଦ