ଭୁବନେଶ୍ୱର: ରାଜଧାନୀରେ ବଢ଼ୁଥିବା ସରକାରୀ ଜମି ଜବରଦଖଲ ସମସ୍ୟାର ସମାଧାନ ପାଇଁ ସରକାର ଏକ ଅତ୍ୟାଧୁନିକ ଆପ୍ ‘ବ୍ଲୁଇସ୍’(ଭୁବନେଶ୍ବର ଲ୍ୟାଣ୍ଡ୍ ୟୁଜ୍ ଇଣ୍ଟେଲିଜେନ୍ସ ସିଷ୍ଟମ) ପ୍ରସ୍ତୁତ କରିଛନ୍ତି। ଜବରଦଖଲ ହେଉଥିବା ସରକାରୀ ଜମିର ନକ୍ସା ଓ ସାଟେଲାଇଟ୍ ଫଟୋଚିତ୍ରକୁ ଏହି ଆପ୍ ସମ୍ପୃକ୍ତ ଅଧିକାରୀଙ୍କୁ ଯୋଗାଇଦେଉଛି। ଏଥିପାଇଁ ବ୍ୟୟବହୁଳ ଆପ୍ ବ୍ୟବହାର କରିବାକୁ ସରକାର କୋଟିକୋଟି ଟଙ୍କା ଗଣୁଛନ୍ତି। ସରକାରୀ ଜମିକୁ ସୁରକ୍ଷା ଦେବା ତଥା ଜବରଦଖଲକାରୀଙ୍କୁ ଉଚ୍ଛେଦ କରିବା ଲକ୍ଷ୍ୟ ନେଇ ସରକାର ଏଭଳି ଏକ ଅତ୍ୟାଧୁନିକ ଆପ୍ର ବ୍ୟବହାର କରି ବିପୁଳ ବ୍ୟୟ କରୁଛନ୍ତି। ମାତ୍ର ପରିତାପର କଥା, ରାଜଧାନୀରେ ସରକାରୀ ଜମି ସୁରକ୍ଷିତ ହୋଇ ରହିପାରୁନି। ଜବରଦଖଲକାରୀମାନେ ଏବେ ବି ଖୋଲାଖୋଲି ସରକାରୀ ଜମି ମାଡ଼ି ବସୁଛନ୍ତି।
୨୦୨୦ ଜୁଲାଇ ୮ରେ ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ‘
ବ୍ଲୁଇସ୍’ ଆପ୍ର ଶୁଭାରମ୍ଭ କରିଥିଲେ। ଏହାର ଉଭୟ ୱେବ୍ ଓ ଆପ୍ ରହିଛି। ଏହା ଏକ ଅତ୍ୟାଧୁନିକ ବୈଷୟିକ ଜ୍ଞାନସଂପନ୍ନ ଆପ୍। ଏହା ଦ୍ବାରା ଭୁବନେଶ୍ବରର ସରକାରୀ ଜମି ଉପରେ ଟିକିନିଖି ନଜର ରଖି ହେବ ଏବଂ ଜବରଦଖଲକୁ ରୋକି ହେବ। ଜବରଦଖଲ ହେଉଥିବା ସରକାରୀ ଜମିର ଫଟୋ ଏହି ଆପ୍ ଜରିଆରେ ସଂପୃକ୍ତ ଅଧିକାରୀଙ୍କ ପାଖକୁ ରିପୋର୍ଟ ଆକାରରେ ମିଳିଥାଏ। ଏଭଳି ଅତ୍ୟାଧୁନିକ ବୈଷୟିକ ଜ୍ଞାନସଂପନ୍ନ ଆପ୍ ବିକଶିତ କରିବାରେ ଓଡ଼ିଶା ଥିଲା ଭାରତର ପ୍ରଥମ ରାଜ୍ୟ। ବଡ଼କଥା ହେଉଛି, ଏହି ଆପ୍ର ମ୍ୟାପ୍ ଓ ସାଟେଲାଇଟ୍ ଫଟୋଚିତ୍ର ବେଶ୍ ବ୍ୟୟବହୁଳ। ତେଣୁ ଏଥିପାଇଁ ସରକାରଙ୍କୁ ବାର୍ଷିକ କୋଟିକୋଟି ଟଙ୍କା ଗଣିବାକୁ ପଡ଼ୁଛି। କିନ୍ତୁ ପରିତାପର କଥା ଏବେ ଏହି ଆପ୍ର ରିପୋର୍ଟକୁ ଅଧିକାରୀମାନେ ଆଡ଼ ନଜରରେ ଦେଖୁଛନ୍ତି। ସମୟ ଓ ମାନବସମ୍ବଳର ଅଭାବ ଆଳରେ ଏହି ଆପ୍ର ରିପୋର୍ଟକୁ ଫାଇଲ ତଳେ ଚାପି ଦେଇ
ଅଧିକାରୀମାନେ ଆଖି ବୁଜିଦେଉଛନ୍ତି। ଏଣୁ ଜବରଦଖଲ ରିପୋର୍ଟ ସଂଖ୍ୟା ବଢ଼ି ବଢ଼ି ଚାଲିଛି। ଏହି ଆପ୍ ଜରିଆରେ ଆସିଥିବା ଶତାଧିକ ଜବରଦଖଲ ରିପୋର୍ଟ ବିଭିନ୍ନ ଅଧିକାରୀଙ୍କ ଫାଇଲ୍ରେ ଚାପି ହୋଇରହିଛି। ଦୟାୱେଷ୍ଟ କେନାଲ ହେଉ କି ପାଣ୍ଡରାରେ ସରକାରୀ ଜମି ହେଉ, ରାଜଧାନୀର ବିଭିନ୍ନ ଅଞ୍ଚଳରେ ଜବରଦଖଲ ମାଡ଼ି ଚାଲିଛି। ଏହି ଆପ୍ର ରିପୋର୍ଟ ଉପରେ ଅଧିକାରୀମାନଙ୍କ ନିଘା ନଥିବାରୁ ଜନସାଧାରଣ ବି ଅଭିଯୋଗ କରିବା ବନ୍ଦ କରିଦେଲେଣି। ରାଜକୋଷରୁ ବିପୁଳ ଖର୍ଚ୍ଚ ହେବା ସତ୍ତ୍ବେ ଏଭଳି ଏକ ଅତ୍ୟାଧୁନିକ ଆପ୍ର ରିପୋର୍ଟକୁ ଅଣଦେଖା କରିବା ପଛରେ କିଛି ଅସାଧୁ ଅଧିକାରୀଙ୍କ ହାତ ରହିଛି ବୋଲି ଅଭିଯୋଗ ହେଉଛି।
ନିୟମାନୁସାରେ ଏହି ଆପ୍ର ରିପୋର୍ଟ କେତେ ଦୂର
କାର୍ଯ୍ୟକାରୀ ହୋଇଛି, ତାହାକୁ ବିଡିଏ ଉପାଧ୍ୟକ୍ଷ ତଥା ବିଏମ୍ସି କମିସନର୍ଙ୍କ ଅଧ୍ୟକ୍ଷତାରେ ସମୀକ୍ଷା କରାଯିବା କଥା। କିନ୍ତୁ ଏହି ସମୀକ୍ଷା ବୈଠକ କରାଯାଉ ନଥିବାରୁ ସଂପୃକ୍ତ ଅଧିକାରୀମାନେ ଫାଇଲ ଚାପି ବସିବା ସହଜ ହେଉଛି ବୋଲି ଅଭିଯୋଗ ହେଉଛି। ଏହି ଆପ୍ କଥା ବିଡିଏ ବୁଝୁଛି ବୋଲି କହି ବିଏମ୍ସି ଡେପୁଟି କମିସନର୍(ଏନ୍ଫୋର୍ସମେଣ୍ଟ) ଅଜୟ କୁମାର ମହାନ୍ତି ସଫେଇ ଦେଇଛନ୍ତି। କିନ୍ତୁ ବିଡିଏ ଯୁଗ୍ମ କମିସନର୍(ଏନ୍ଫୋର୍ସମେଣ୍ଟ) ରଂଜନ କୁମାର ଜେନାଙ୍କ କହିବା କଥା, ଏହି ଆପ୍ ରିପୋର୍ଟ ଉପରେ ଏବେ ବି ଜବରଦଖଲ ଉଚ୍ଛେଦ କରାଯାଉଛି। ତେବେ ଏଥିରେ ବିଏମ୍ସିର ବି ବହୁତ କାମ ରହିଛି ବୋଲି ସେ କହିଛନ୍ତି। ଶ୍ରୀ ଜେନାଙ୍କ କହିବା ଅନୁସାରେ ପ୍ରଥମେ ଏହି ଆପ୍ର ରିପୋର୍ଟ,
ବିଏମ୍ସି ଜୋନାଲ୍ କମିସନର୍, ୱାର୍ଡ ଅଫିସରଙ୍କ ପାଖକୁ ଯାଉଛି। ସେହି ଅନୁସାରେ ବିଏମ୍ସି ନିଜେ ଜବରଦଖଲ ଉଚ୍ଛେଦ କରିବ କିମ୍ବା ବିଡିଏ କରିବ।
ସୌଜନ୍ୟ ସମ୍ବାଦ
