Tamilnadu; ବିବାହର ମାସକ ପରେ ଶୋକର ଛାୟା: ମାଙ୍କଡ଼ଙ୍କୁ ଫଳ ଖୁଆଉଥିଲେ ଯୁବତୀ, ଖସିପଡିଲେ ପାହଡ ତଳକୁ

ନୂଆଦିଲ୍ଲୀ ୨୭।୦୬; ତାମିଲନାଡୁରେ ଅଘଟଣ । ନବବିବାହିତ ଦମ୍ପତିଙ୍କ ପାଇଁ ମନ୍ଦିର ଦର୍ଶନ ପାଲଟିଲା ଦୁଃଖଦ ଘଟଣା । ପାହାଡ଼ ଉପରୁ ପଡ଼ି ୨୪ ବର୍ଷୀୟ ମହିଳାଙ୍କ ମୃତ୍ୟୁ ଘଟିଛି। ରିପୋର୍ଟ ଅନୁଯାୟୀ ଯେତେବେଳେ ସେ ମାଙ୍କଡ଼ମାନଙ୍କୁ ଫଳ ଖାଇବାକୁ ଦେଉଥିଲେ, ସେତେବେଳେ ସବୁ ମାଙ୍କଡଙ୍କ ଦଳ ତାଙ୍କୁ ଘେରିଗଲା। ଏହାକୁ ଦେଖି ସେ ଭୟଭୀତ ହୋଇ ପାହାଡ଼ରୁ ଖସିପଡ଼ିଲେ। ଏନେଇ ଘଟଣା ବିଷୟରେ କର୍ତ୍ତୃପକ୍ଷଙ୍କୁ ତୁରନ୍ତ ସୂଚନା ଦିଆଯାଇଥିଲା। ଥୁଥୁକୁଡି ଜିଲ୍ଲାର ଉଚିପିଲ୍ଲୈୟାର ମନ୍ଦିର ଏକ ପ୍ରସିଦ୍ଧ ସ୍ଥାନ। ଯାହା ବହୁ ସଂଖ୍ୟକ ଭକ୍ତଙ୍କୁ ଆକର୍ଷିତ କରେ।

ମୃତ ମହିଳାଙ୍କ ନାମ ଅନିତା, କୋଭିଲପଟ୍ଟି ନିକଟବର୍ତ୍ତୀ ଦକ୍ଷିଣ ଥିଟାଙ୍କୁଲମର ବାସିନ୍ଦା। ସେ ଗତ ମାସରେ ୨୯ ବର୍ଷୀୟ ସୁରେଶଙ୍କୁ ବିବାହ କରିଥିଲେ। ସୁରେଶ ବିଦେଶରେ କାମ କରନ୍ତି । ନିକଟରେ ସେ ତାଙ୍କ ଘରକୁ ଫେରିଥିଲେ। ବିବାହ ପରେ ପ୍ରଥମ ଥର ପାଇଁ ଦର୍ଶନ କରିବାକୁ ଏହି ଦମ୍ପତି ମନ୍ଦିର ଯାଇଥିଲେ। ମନ୍ଦିରରେ ପୂଜା କରିବା ପରେ, ସେମାନେ ପାହାଡ଼ ଉପରେ ଅବସ୍ଥିତ ଉଚିପିଲ୍ଲୈୟାର ମନ୍ଦିର ପରିଦର୍ଶନ କରିଥିଲେ। ପୋଲିସ କହିଛି ଯେ ଯେତେବେଳେ ସେମାନେ ମାଙ୍କଡ଼ମାନଙ୍କୁ ଖାଇବାକୁ ଦେଉଥିଲେ, ସେତେବେଳେ ହଠାତ୍ ଅନେକ ମାଙ୍କଡ ସେମାନଙ୍କ ଚାରିପାଖରେ ଘେରିଗଲେ । ଜଣେ ପୋଲିସ ଅଧିକାରୀ କହିଛନ୍ତି, “ପ୍ରାଥମିକ ଦୃଷ୍ଟିରୁ ମନେ ହେଉଛି ଯେ ସେ ମାଙ୍କଡ଼ମାନଙ୍କ ଯୋଗୁଁ ଭୟଭୀତ ହୋଇଯାଇ ଖସିପଡିଥିଲେ। କିନ୍ତୁ ଆମେ ଘଟଣାକୁ ସବୁ ଦିଗରୁ ତଦନ୍ତ କରୁଛୁ।”

ତାମିଲନାଡୁ ପୋଲିସ ଘଟଣାର ତଦନ୍ତ କରୁଛି। ପ୍ରାଥମିକ ତଦନ୍ତରୁ ଜଣାପଡିଛି ଯେ ଅନିତା ଭୟଭୀତ ହୋଇ ଭାରସାମ୍ୟ ହରାଇ ପାହାଡ଼ ଉପରୁ ପଡ଼ିଯାଇଥିଲେ। ତାଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିଲା, ଯାହା ଫଳରେ ତାଙ୍କ ସ୍ୱାମୀ ଭାଙ୍ଗି ପଡ଼ିଛନ୍ତି। ହୃଦୟ ବିଦାରକ ଦୃଶ୍ୟରେ ସ୍ୱାମୀ ତାଙ୍କ ସ୍ତ୍ରୀଙ୍କ ମୃତଦେହ ପାଖରେ କାନ୍ଦୁଥିବାର ନଜର ଆସିଥିଲେ। ପୋଲିସ ମୃତଦେହ ଉଦ୍ଧାର କରି ପୋଷ୍ଟମର୍ଟମ ପାଇଁ ହସ୍ପିଟାଲକୁ ପଠାଇଥିଲେ। ସ୍ଥାନୀୟ ପୋଲିସ କହିଛି ଯେ ଘଟଣାସ୍ଥଳରୁ ସିସିଟିଭି ଫୁଟେଜ୍ ମଧ୍ୟ ଯାଞ୍ଚ କରାଯାଉଛି। ବିବାହର ପ୍ରାୟ ଗୋଟିଏ ମାସ ପରେ ଯୁବତୀଙ୍କ ମୃତ୍ୟୁ ତାଙ୍କ ପରିବାରରେ ଦୁଃଖର ଲହରୀ ଖେଳିଯାଇଛି।

ସୌଜନ୍ୟ Prameya News7