Lose Belly Fat: ପେଟର ଚର୍ବି ହ୍ରାସ ପାଇଁ ଜୀବନଶୈଳୀରେ ସାମିଲ କରନ୍ତୁ ଏହି ଛୋଟ ଅଭ୍ୟାସ

ପେଟର ଚର୍ବି କମାଇବା ପାଇଁ କେବଳ ବ୍ୟାୟାମ ଯଥେଷ୍ଟ ନୁହେଁ, ବରଂ ଜୀବନଶୈଳୀରେ ପରିବର୍ତ୍ତନ ଆଣିବା ମଧ୍ୟ ଅତ୍ୟାବଶ୍ୟକ। ଦୀର୍ଘ ସମୟ ଧରି ବସି ରହିବା ଏବଂ ଅଧିକ ତେଲ-ମସଲାଯୁକ୍ତ ଖାଦ୍ୟ ଖାଇବା କାରଣରୁ ପେଟରେ ଚର୍ବି ଜମିବା ଆଜିକାଲି ଏକ ସାଧାରଣ ସମସ୍ୟା ହୋଇଗଲାଣି।। ଏହାକୁ କମାଇବା ପାଇଁ ଅନେକ ଲୋକ ଘଣ୍ଟା ଘଣ୍ଟା ଜିମ୍‌ରେ ବ୍ୟାୟାମ କରୁଛନ୍ତି। କିନ୍ତୁ ଚର୍ବି ହ୍ରାସ ପାଇଁ ‌କେବଳ ବ୍ୟାୟାମ କରିବା ଯଥେଷ୍ଟ ନୁହେଁ।

ପେଟର ଚର୍ବି କମାଇବା ପାଇଁ ବ୍ୟାୟାମ ସହ ଦୈନନ୍ଦିନ ଜୀବନଶୈଳୀରେ ମଧ୍ୟ କିଛି ସକାରାତ୍ମକ ପରିବର୍ତ୍ତନ ଆଣିବା ଆବଶ୍ୟକ। ଆସନ୍ତୁ ଜାଣିବା ଏପରି କିଛି ସହଜ ଅଭ୍ୟାସ ….

ପେଟର ଚର୍ବି କମାଇବା ପାଇଁ ପ୍ରଥମେ ଖାଦ୍ୟାଭ୍ୟାସ ଉପରେ ଧ୍ୟାନ ଦିଅନ୍ତୁ। ଅଧିକ ତେଲ-ମସଲାଯୁକ୍ତ ଏବଂ ପ୍ରୋସେସ୍‌ଡ ଖାଦ୍ୟଠାରୁ ଦୂରେଇ ରୁହନ୍ତୁ। ଦିନର ଆରମ୍ଭ ପ୍ରୋଟିନ୍‌ଯୁକ୍ତ ହାଲୁକା ଜଳଖିଆରୁ କରନ୍ତୁ, ଯେପରିକି ଓଟସ ଦହି, ଅଣ୍ଡା କିମ୍ବା ସାଲାଡ୍। ଅଳ୍ପ ଅଳ୍ପ କରି ବାରମ୍ବାର ଖାଇଲେ ମେଟାବୋଲିଜିମ୍ ସକ୍ରିୟ ରହେ ଏବଂ ପେଟ ଭାରି ଲାଗେ ନାହିଁ।ଚିନି ଓ ରିଫାଇନ୍ଡ କାର୍ବୋହାଇଡ୍ରେଟ୍ ଖାଦ୍ୟରେ କମ୍ କରନ୍ତୁ। ମିଠା, ଜଙ୍କ ଫୁଡ୍‌, ବ୍ରେଡ୍‌, କେକ୍‌, କୁକିଜ୍‌ ଓ ସଫ୍ଟ ଡ୍ରିଙ୍କ୍‌ ପରି ଖାଦ୍ୟ ପେଟର ଚର୍ବି ବଢ଼ାଇଥାଏ। ଏହା ବଦଳରେ ବ୍ରାଉନ୍ ରାଇସ୍‌, କ୍ୱିନୋଆ, ଦଲିଆ ଓ ତାଜା ଫଳ ପରି ସ୍ୱାସ୍ଥ୍ୟକର ବିକଳ୍ପ ବାଛନ୍ତୁ।

ପ୍ରୋଟିନ୍‌ ମାଂସପେଶୀକୁ ସୁସ୍ଥ ରଖିବା ସହ ଭୋକକୁ ନିୟନ୍ତ୍ରଣ କରେ। ଅଣ୍ଡା, ଡାଲି, ପନିର୍‌, ଚିକେନ୍‌ କିମ୍ବା ଟୋଫୁକୁ ନିଜ ଖାଦ୍ୟରେ ସାମିଲ କରନ୍ତୁ। ଏହା ପେଟର ଚର୍ବି କମାଇବା ସହ ଦୀର୍ଘ ସମୟ ପର୍ଯ୍ୟନ୍ତ ପେଟ ଭରା ରଖିଥାଏ। ଶରୀରକୁ ହାଇଡ୍ରେଟ୍ ରଖିଲେ ମେଟାବୋଲିଜିମ୍‌ ବଢ଼ିଥାଏ ଏବଂ ଭୋକ ନିୟନ୍ତ୍ରଣରେ ରହେ। ତେଣୁ ପ୍ରତିଦିନ ୨ରୁ ୩ ଲିଟର ପାଣି ପିଅନ୍ତୁ। ଖାଇବାର ୨୦-୩୦ ମିନିଟ୍‌ ପୂର୍ବରୁ ପାଣି ପିଇବା ମଧ୍ୟ ଲାଭଦାୟକ। ନିଦ୍ରାର ଅଭାବ ପେଟର ଚର୍ବି ବଢ଼ାଇପାରେ। କମ୍ ଶୋଇଲେ ଶରୀରରେ ଷ୍ଟ୍ରେସ୍‌ ହର୍ମୋନ୍‌ ବଢ଼ିଥାଏ, ଯାହା ଓଜନ ବୃଦ୍ଧିର କାରଣ ହୋଇପାରେ। ସେଥିପାଇଁ ପ୍ରତିଦିନ ୭ରୁ ୮ ଘଣ୍ଟା ନିଦ୍ରା ନିଅନ୍ତୁ। : ଅଧିକ ଚାପ ନେଲେ ପେଟରେ ଚର୍ବି ଜମିବାର ସମ୍ଭାବନା ବଢ଼େ। ଧ୍ୟାନ, ମେଡିଟେସନ୍‌, ଗଭୀର ଶ୍ୱାସ ନେବା କିମ୍ବା ସବୁଜ ପରିବେଶରେ କିଛି ସମୟ ବିତାଇବା ଷ୍ଟ୍ରେସ୍‌ କମାଇବାର ସହଜ ଉପାୟ। କ୍ରଞ୍ଚେସ୍‌ କିମ୍ବା କାର୍ଡିଓ ନ କରିଲେ ମଧ୍ୟ ହାଲୁକା ଶାରୀରିକ କାର୍ଯ୍ୟକଳାପ ପେଟର ଚର୍ବି କମାଇବାରେ ସାହାଯ୍ୟ କରେ। ପ୍ରତିଦିନ ୨୦-୩୦ ମିନିଟ୍‌ ଦ୍ରୁତ ଚାଲିବା, ସିଢ଼ି ଚଢ଼ିବା, ଘର କାମ କରିବା କିମ୍ବା ହାଲୁକା ଷ୍ଟ୍ରେଚିଂ କରିବା ମଧ୍ୟ ଲାଭଦାୟକ।

ସୌଜନ୍ୟ ସମ୍ବାଦ